သျှမ်းပြည် နမ့်ခမ်းမြို့တွင် စက်သုံးဆီ သိုလှောင်ထားသည့် ဂိုထောင်တစ်ခု မီးလောင်ကျွမ်းခဲ့ရာ လူနှစ်ဦး ထိခိုက်ဒဏ်ရာရရှိခဲ့ကြောင်း စုံစမ်းသိရသည်။
ယမန်နေ့ (ဒီဇင်ဘာလ ၂၃ ရက်) ည ၈ နာရီခန့်တွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA ထိန်းချုပ်ထားသည့် နမ့်ခမ်းမြို့ သာယာကုန်း ရပ်ကွက်ရှိ စက်သုံးဆီ အမျိုးမျိုးနှင့် အက်စစ်များ သိုလှောင်ထားသည့် ဂိုထောင်တစ်ခု၌ မီးလောင်ကျွမ်းမှု ဖြစ်ပွားခဲ့ရာ လူနှစ်ဦး ထိခိုက်ဒဏ်ရာ ရရှိခဲ့ကြောင်း ဒေသခံများက ပြောသည်။
“ဘယ်လိုကြောင့် မီးလောင်သလဲတော့ မသိရဘူး၊ မနေ့ညကတော့ ဒဏ်ရာရတဲ့လူ ရှိတယ်။ အဲ့နေရာက ပလောင် စီးပွားရေးတာဝန်ခံ တားကောင်းဝဲ ရဲ့ ဂိုထောင်။ အဲ့ထဲမှာ စက်သုံးဆီ အမျိုးမျိုးနဲ့ အက်ဆစ်ရည်တွေလည်း ရှိလို့ မီးပြင်းတယ်၊ ကားတွေရော အိမ်ရော ပါသွားတယ်။ မီးသတ်ကား လေးငါးစီးနဲ့ ၁ နာရီလောက် ကြာအောင် မီးငြိမ်းရတယ်” ဟု နမ့်ခမ်းဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ မီးလောင်မှုအတွင်း ထိခိုက်ဒဏ်ရာရရှိခဲ့သူ နှစ်ဦးမှာ ကင်းစောင့်နေသည့် TNLA တပ်သားဖြစ်နိုင်ကြောင်း ဒေသခံများက ပြောဆိုသော်လည်း TNLA သတင်းနှင့် ပြန်ကြားရေးဌာနမှ တစ်စုံတစ်ရာ သတင်းထုတ်ပြန်လာခြင်း မရှိသေးပါ။
အလားတူ ဒီဇင်ဘာလ (၁၇) ရက်တွင် ကိုးကန့်တပ်ဖွဲ့ (MNDAA) ထိန်းချုပ်ထားသည့် သိန္နီမြို့အဝင်တွင် ဖွင့်လှစ်ထားသော စိန်နဂါး စက်သုံးဆီဆိုင် မီးလောင်မှု ဖြစ်ပွားခဲ့ပြီး စက်သုံးဆီသယ်ယာဉ်များပါ လောင်ကျွမ်းခဲ့ခြင်းကြောင့် ကျပ်သိန်းထောင်ချီ ဆုံးရှုံးခဲ့ကြောင်း ဒေသခံများထံမှ သိရသည်။
ပြီးခဲ့သည့် ဒီဇင်ဘာလ (၁၆) ရက် နေ့လယ်ပိုင်းတွင် တောင်ကြီးမြို့နယ် အေးသာယာမြို့ ထုံးဖိုအတက် အနီးရှိ တပင်ရွှေထီး ဆီပန့်ဆိုင် တွင်လည်း ထမင်းဟင်းချက်ရာမှ ဝိုင်ယာရှော့ခ် ဖြစ်ပြီး ဓာတ်ဆီဆိုင် မီးလောင်မှု ဖြစ်ပွားခဲ့သည်။
ပုံစာ – နမ့်ခမ်းမြို့ သာယာကုန်းရပ်ကွက်တွင် မီးလောင် (ဓာတ်ပုံ-ဒေသခံပေးပို့)
Leave a Comments