သျှမ်းမြောက် ကျောက်မဲမြို့နယ်အတွင်းရှိ ကျေးရွာများတွင် သေဆုံးမှု မြင့်တက်နေကြောင်း ဒေသခံများထံမှ စုံစမ်းသိရသည်။
ကျောက်မဲမြို့ပေါ်တွင် သာမက ကျေးရွာများတွင်လည်း ကိုဗစ်ကူးစက်လူနာများ ရှိနေပြီး အတည်ပြုလူနာများအပြင် သံသယလူနာများ၊ ကျန်းမာရေးမကောင်းသူများလည်း သေဆုံးနေကြတာဖြစ်ကြောင်းသိရသည်။
“ဒီ ကိုဗစ် တတိယလှိုင်းအတွင်းမှာပဲ ရွာထဲမှာ သေဆုံးသူ (၁၀)ယောက်ကျော်ရှိတယ်၊ ကိုဗစ်နဲ့သေတာလည်းပါတယ်၊ သေဆုံးတာတွေက အရမ်းများလာတယ်” ဟု ကျောက်မဲမြို့နယ် ကျွဲကုန်းကျေးရွာ ဒေသခံအမျိုးသမီး တစ်ဦက သျှမ်းသံတော်ဆင့်ကို ပြောသည်။
ထို့အပြင် ကျောက်မဲမြို့အဝင် ခိုမုန်းကျေးရွာတွင်လည်း ရက်ပိုင်းအတွင်း သေဆုံးသူ (၅)ဦးထိ ရှိခဲ့ပြီး၊ အောက်ဆီဂျင်ရှူနေရသူလည်း ရှိနေကာ သေဆုံးသူများထဲတွင် သက်ကြီးရွယ်အိုများ သာမက လူလတ်ပိုင်းများလည်း ပါဝင်နေကြောင်း ဒေသခံများထံမှ ကြားသိရသည်။
“ရက်ပိုင်းအတွင်းကို နေမကောင်းလို့ ဆိုပြီး သေဆုံးသွားတဲ့သူတွေ (၅)ယောက်လောက်ရှိသွားပြီ၊၊ ခုထိ ရွာထဲမှာ နေမကောင်းလို့ အောက်ဆီဂျင်ရှူနေရတဲ့သူ ရှိနေသေးတယ်” ဟု ခိုမုန်းကျေးရွာမှ ဒေသခံတစ်ဦးက ပြောသည်။
အဆိုပါကျေးရွာတွင် ကျန်းမာရေးဆေးပေးခန်းရှိသော်လည်း စစ်ကောင်စီအာဏာသိမ်းပြီးနောက် ကျန်းမာရေး ဝန်ထမ်းနည်းပါး မှုကြောင့် ပိတ်ထားခဲ့ရတာဖြစ်ကြောင်း ဒေသခံများထံမှ သိရသည်။
ကျောက်မဲမြို့တွင် ကိုဗစ်အတည်ပြုလူနာအပါအဝင် တစ်နေ့လျင် ပျှမ်းမျှ (၇)ဦးခန့် သေဆုံးနေတာဖြစ်ပြီး တစ်ရက်တည်း (၁၃)ဦးသေဆုံးတာလည်း ရှိခဲ့ကြောင်း ကျောက်မဲ ပရဟိတဆောင်ရွက်သူများထံမှ သိရသည်။
“ဒီနောက်ပိုင်း ကျေးရွာတွေမှာ ကိုဗစ်ကူးစက်ခံရတာတွေ၊ ကိုဗစ်လက္ခဏာနဲ့ သေဆုံးတာတွေ ရှိလာတယ်၊ သေဆုံးတာလည်း မြင့်လာတယ်၊ တစ်ရက်တည်းကို (၁၂)ဦး သေဆုံးတာလည်း ရှိခဲ့တယ်” ဟု ပရဟိတအသင်းဝင်တစ်ဦးက ပြောသည်။
ထို့အပြင် ဆေးရုံမှ ဆင်းခွင့်ရသည့် ကိုဗစ်အတည်ပြုလူနာ နေအိမ်သို့ပြန်ရောက်ပြီး (၃)ရက်အကြာတွင် သေဆုံးသွားတာလည်း ရှိခဲ့ကြောင်း ပရဟိတဆောင်ရွက်နေသူများထံမှ သိရသည်။
သျှမ်းမြောက် ကျောက်မဲမြို့တွင် ယမန်နေ့အထိ ကိုဗစ်အတည်ပြုလူနာ (၆၀၀)ထိ ရှိနေပြီး သေဆုံးသူ (၃၀)ကျော် ရှိနေပြီဖြစ်ကြောင်း သိရသည်။
Leave a Comments