သျှမ်းပြည် ကျောက်မဲမြို့နယ် ပုံဝိုးကျေးရွာအုပ်စုတွင် စစ်ကော်မရှင်တပ်နှင့် SSPP/SSA ကြား တိုက်ပွဲဖြစ်ပွားခဲ့ပြီးနောက် ရွာသားများကို စစ်ကော်မရှင်တပ်ဘက်မှ ဖမ်းဆီးရိုက်နှက် စစ်ဆေးနေကြောင်း စုံစမ်းသိရသည်။
မတ်လ (၁၀) ရက် နေ့လယ်ပိုင်းတွင် ကျောက်မဲမြို့နယ် ပုံဝိုးကျေးရွာအုပ်စုအတွင်း စစ်ကော်မရှင်တပ်နှင့် ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) ကြား တစ်နာရီကျော်ကြာ ထိတွေ့တိုက်ပွဲ ဖြစ်ပွားခဲ့သည်။
ထို့နောက် ၎င်းတစ်ရက်တည်း ညနေ (၅)နာရီခွဲကျော်တွင် ပုံဝိုးကျေးရွာထဲ စစ်ကော်မရှင်တပ်သားများ ဝင်ရောက်လာကာ ရွာသားများကို ဘုန်းကြီးကျောင်းသို့ ဖမ်းဆီးခေါ်ဆောင် ရိုက်နှက်စစ်ဆေးခဲ့ပြီး ရွာသားအချို့ကို ပြန်လွှတ်ပေးခဲ့သော်လည်း အမျိုးသား (၅) ဦးကို ဆက်လက်ဖမ်းဆီးထားကြောင်း ဒေသခံများက ပြောသည်။
“စစ်တပ်က ဖမ်းသွားတဲ့လူ (၁၀) ယောက်ကျော်ထဲက တချို့ပြန်လွှတ်လာတယ်၊ ရွာသား (၅) ယောက်ကတော့ အခုထိ ပြန်မလွှတ်သေးဘူး။ ရွာမှာလည်း ရှုပ်ယှက်ခတ်နေတယ်၊ ပုံဝိုးဘုန်းကြီးကျောင်းမှာ ရှင်လောင်းပွဲလုပ်ဖို့ စီစဉ်ထားတာလည်း တိုက်ပွဲဖြစ်လို့ ရက်ရွှေ့လိုက်ရတယ်” ဟု ကျောက်မဲမြို့နယ် ပုံဝိုးဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
စစ်ကော်မရှင်တပ်လက်အောက်ခံ နမ့်လန်အခြေစိုက် ခြေမြန်တပ်ရင်း ခမရ-၅၀၆ သည် ပုံဝိုးကျေးရွာရှိ ရွာသားအားလုံးကို အိမ်စီးကားများနှင့်အတူ ပုံဝိုးဘုန်းကြီးကျောင်းသို့ စုဝေးခိုင်းပြီး နေအိမ်များထဲ ဝင်ရောက်ရှာဖွေ စစ်ဆေးခဲ့ကြောင်း SSPP Info မှ ယနေ့ (မတ်လ ၁၂ ရက်) နံနက်ပိုင်းတွင် သတင်းထုတ်ပြန်ခဲ့သည်။
ထို့အပြင် ပုံဝိုးဘုန်းကြီးကျောင်းတွင် စစ်ကော်မရှင်တပ် ဖမ်းဆီးထိန်းသိမ်းထားသည့် ရွာသားအချို့ကိုလည်း ရိုက်နှက်စစ်ဆေးခဲ့ပြီး ၎င်းတို့၏ ကျောကုန်းကို ဓားဖြင့် လှီးဖြတ်ကာ စစ်ဆေးမေးမြန်းမှု ပြုလုပ်ခဲ့ကြောင်း SSPP ထုတ်ပြန်ချက်တွင် ရေးသားထားသည်။
လက်ရှိတွင် ကျောက်မဲမြို့နယ် ပုံဝိုးကျေးရွာအုပ်စုအတွင်း စစ်ကော်မရှင်တပ်နှင့် သျှမ်းတပ် SSPP/SSA ကြား စစ်ရေးတင်းမာမှု ဆက်ရှိနေပြီး တိုက်ပွဲထပ်မံ ဖြစ်ပွားမည်ကို စိုးရိမ်နေရခြင်းကြောင့် မတ်လ ၁၄ ရက်မှ ၁၆ ရက်နေ့တွင် ကျင်းပပြုလုပ်ရန် စီစဉ်ထားသည့် ရှင်လောင်းပွဲနှင့် ကျောင်းရေစက်ချပွဲတို့ကို ရက်ပြောင်းရွှေ့ထားရကြောင်း ဒေသခံများထံမှ သိရသည်။
Leave a Comments