သျှမ်းပြည် ကျောက်မဲမြို့နယ် ပုံဝိုးကျေးရွာအုပ်စုတွင် စစ်ကော်မရှင်တပ်နှင့် SSPP/SSA ကြား တိုက်ပွဲ ဖြစ်ပွားခဲ့ပြီးနောက် စစ်တပ်ဖမ်းဆီးခဲ့သည့် ရွာသားများထဲမှ အချို့မှာ ပြန်လည် လွတ်မြောက်လာခြင်း မရှိသေးကြောင်း စုံစမ်းသိရသည်။

ပြီးခဲ့သည့် မတ်လ (၁၀) ရက်တွင် ကျောက်မဲမြို့နယ် ပုံဝိုးကျေးရွာအုပ်စုတွင် စစ်ကော်မရှင်တပ်နှင့် ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) ကြား ထိတွေ့တိုက်ပွဲ ဖြစ်ပွားခဲ့သည်။

ထို့နောက် ပုံဝိုးကျေးရွာထဲ စစ်ကော်မရှင်တပ်သားများ ဝင်ရောက်လာကာ ရွာသားများကို ဘုန်းကြီးကျောင်းသို့ ဖမ်းဆီးခေါ်ဆောင် ရိုက်နှက်စစ်ဆေးခဲ့ပြီး ရွာသားအချို့ကို ပြန်လွှတ်ပေးခဲ့သော်လည်း အမျိုးသား (၂) ဦးကို ကျောက်မဲရဲစခန်းတွင် ဆက်လက်ဖမ်းဆီးထားကြောင်း ဒေသခံများက ပြောသည်။

“ရှေ့ရက်ကတော့ ၄ ယောက် ပြန်လွှတ်ပေးလာတယ်၊ နှစ်ယောက်ကိုတော့ ကျောက်မဲ ရဲစခန်းမှာ ဆက်ဖမ်းထားတယ်။ သူတို့ကို တရားစွဲမခံရအောင် အဖွဲ့အစည်းဘက်ကလည်း ကြိုးစားညှိနေတယ်လို့ ကြားတယ်။ ရွာမှာတော့ ထပ်ဖမ်းခံရမှာစိုးလို့ အပြင်မထွက်ရဲကြဘူး” ဟု ဖြစ်စဉ်သိရှိသူ ကျောက်မဲဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

စစ်ကော်မရှင်တပ်နှင့် SSPP/SSA ကြား ထိတွေ့တိုက်ပွဲ ဖြစ်ပွားခဲ့ပြီးနောက် စစ်တပ်လက်အောက်ခံ နမ့်လန်အခြေစိုက် ခြေမြန်တပ်ရင်း ခမရ-၅၀၆ သည် ပုံဝိုးကျေးရွာရှိ ရွာသားအားလုံးကို အိမ်စီးကားများနှင့်အတူ ပုံဝိုးဘုန်းကြီးကျောင်းသို့ စုဝေးခိုင်းပြီး နေအိမ်များထဲ ဝင်ရောက်ရှာဖွေ စစ်ဆေးခဲ့ကြောင်း SSPP Info မှ မတ်လ ၁၂ ရက်တွင် သတင်းထုတ်ပြန်ခဲ့သည်။

ထို့အပြင် ပုံဝိုးဘုန်းကြီးကျောင်းတွင် စစ်ကော်မရှင်တပ် ဖမ်းဆီးထိန်းသိမ်းထားသည့် ရွာသားအချို့ကိုလည်း ရိုက်နှက်စစ်ဆေးခဲ့ပြီး ၎င်းတို့၏ ကျောကုန်းကို ဓားဖြင့် လှီးဖြတ်ကာ စစ်ဆေးမေးမြန်းမှု ပြုလုပ်ခဲ့ကြောင်း SSPP ထုတ်ပြန်ချက်တွင် ရေးသားထားသည်။

လက်ရှိတွင် ကျောက်မဲမြို့နယ် ပုံဝိုးကျေးရွာအုပ်စုအတွင်း စစ်ကော်မရှင်တပ် ဆက်လက်တပ်စွဲထားပြီး အွန်လိုင်းကျားဖြန့် နယ်မြေရှင်းလင်းရေး အကြောင်းပြကာ တိုက်ပွဲ ထပ်မံဖြစ်ပွားမည်ကို စိုးရိမ်နေရကြောင်း ဒေသခံများထံမှ သိရသည်။