သျှမ်းပြည် အစိုးရအဖွဲ့သစ်အနေဖြင့် သျှမ်းပြည်သားများ၏ ရပိုင်ခွင့်ကို အလေးအနက်ထားသည့် အစိုးရမျိုးဖြစ်သင့်ကြောင်း ရှမ်းတိုင်းရင်းသာများ ဒီမိုကရေစီအဖွဲ့ချုပ် (SNLD) ပါတီ၏ အထွေထွေ အတွေင်းရေးမှူးက ပြောဆိုလိုက်သည်။

နောင်တက်လာမည့် သျှမ်းပြည်အစိုးရသည် တာဝန်ယူမှု တာဝန်ခံမှု အပြည့်အဝ ရှိသည့် အစိုးရမျိုးဖြစ်စေချင်ကြောင်း၊ သျှမ်းပြည် လူထုကို အဓိက အာရုံထားသည့် အစိုးရမျိုးဖြစ်သင့်ကြောင်း (SNLD) ပါတီ၏ အထွေထွေအတွင်းရေးမှူး စိုင်းလိတ် က သျှမ်းသံတော်ဆင့် ကိုပြောသည်။

“ဖွဲ့စည်းပုံအခြေခံ ဥပဒေက ဘယ်လိုရှိနေပေမယ့်လို့ သျှမ်းပြည်နယ်သားတွေရဲ့ အခြေခံ အခွင့်အရေး နဲ့ သျှမ်းပြည်နယ်သားတွေရဲ့ ရပိုင်ခွင့်ကို အလေးအနက်ထားတဲ့ အစိုးရမျိုးဖြစ်သင့်ပါတယ်။ အဓိကအားဖြင့် ရိုးသားကြိုးစားပြီးတော့မှ ပွင့်လင်းမြင်သာမှု ရှိတဲ့အစိုးရ တာဝန်ယူမှု တာဝန်ခံမှု ရှိတဲ့အစိုးရပေါ့။ လူထုကို မျက်နှာမှုတဲ့အစိုးရ ဒီလိုမျိုးဖြစ်ဖို့ လုံးဝ လိုအပ်ပါတယ်ခင်ဗျာ။” ဟု စိုင်းလိတ် ကပြောသည်။

၂၀၂၀ နိုဝင်ဘာ (၈) ရက်မှာကျင်းပသည့် ပါတီစုံ ဒီမိုကရေစီ အထွေထွေ ရွေးကောက်ပွဲသည် တနိုင်ငံလုံး အတိုင်းအတာအနေဖြင့် အမျိုးသားဒီမိုကရေစီအဖွဲ့ချုပ် (NLD) ပါတီသည် ပြန်လည်အနိုင်ရရှိခဲ့ပြီး အစိုးရဖွဲ့ခွင့် ထပ်မံရသည့် ပါတီတခုဖြစ်သည်။

“အစိုးရသစ်ကတော့ သျှမ်းပြည်နယ်အစိုးရဆိုတဲ့ စကားလုံးနဲ့အညီ သျှမ်းပြည်နယ်သူ ပြည်နယ်သား အားလုံးကို ကိုယ်စားပြုနိုင်တဲ့ စုံလင်ကွဲပြားမှုကို ဖော်ဆောင်နိုင်မယ့်အစိုးရမျိုးဖြစ်စေချင်ပါတယ်။” စိုင်းလိတ်က ပြောသည်။

လူမျိုးတစ်မျိုးတည်း ဒါမှမဟုတ် အစုအဖွဲ့ တစ်ခုတည်းဖြင့် ကြီးစိုးနေသည့် အစိုးရမျိုးဆက်ဖြစ်လျှင် သျှမ်းပြည်သူ/သားများ၏ ယုံကြည်ကိုးစားမှုကို ရရှိနိုင်မည်မဟုတ်ကြောင်း စိုင်းလိတ်က ထောက်ပြ ပြောဆိုသည်။

“အဲ့လို ယုံကြည်ကိုးစားမှု မရတာနဲ့ အညီ ကျနော်တို့ရဲ့ ဖက်ဒရယ်ပြည်ထောင်စု တည်ဆောက်ရေးဆိုတဲ့ လမ်းကြောင်းကိုလည်းပဲ ဦးတည်နေမှာမဟုတ်ပါဘူး။ အဲ့ဒါကြောင့်မလို့ တိုင်းရင်းသားလူမျိုးပေါင်း စုပေါင်းနေထိုင်တဲ့ သျှမ်းပြည်နယ်မှာ တိုင်းရင်းသားလူမျိုးပေါင်းစုံ ပါဝင်ခွင့်ရှိတဲ့ အခင်းအကျင်းမျိုးကို ဖော်ဆောင်နိုင်တဲ့ အစိုးရတစ်ရပ် ဖြစ်သင့်တယ်လို့ ပြောလိုပါတယ်” ဟု စိုင်းလိတ် ကပြောသည်။

သျှမ်းပြည်တွင်းရှိ ပြည်သူ့လွှတ်တော် မဲဆန္ဒနယ် ၄၉ နေရာ၊ အမျိုးသားလွှတ်တော် မဲဆန္ဒနယ် ၁၂ နေရာ၊ သျှမ်းပြည်နယ် လွှတ်တော် (၉၈) နေရာ၊ တိုင်းရင်းသားရေးရာ မဲဆန္ဒနယ် (၇) နေရာ၊ စုစုပေါင်း မဲဆန္ဒနယ် (၁၆၆) နေရာတွင် NLD မှ (၅၄) နေရာ ၊ USDP (၄၂) နေရာ၊ SNLD (၄၁) နေရာ၊ TNP (၁၂) နေရာ၊ PNO (၁၁)နေရာ၊ WNP (၃)နေရာ၊ LNDP (၂)နေရာ၊ SNDP(၁) နေရာ၊ KNP(၁) နေရာ နှင့် တစ်သီးပုဂ္ဂလ (၂) နေရာဖြင့် အနိုင်ရရှိခဲ့သည်။

သျှမ်းပြည်တွင်းရှိ ဝ ကိုယ်ပိုင်အုပ်ချုပ်ခွင့်ရဒေသ ဒေသအပါအဝင် သျှမ်းပြည်အရှေ့ပိုင်း အထူးဒေသ(၄) မှ မိုင်းလားမြို့နယ်၊ သျှမ်းပြည်တောင်ပိုင်း မိုင်းကိုင်မြို့နယ် စုစုပေါင်း (၆) မြို့နယ် နှင့် မြို့နယ် အချို့ရှိ ဒေသအချို့တွင် ရွေးကောက်ပွဲ ကျင်းပခွင့် မရသည့် ဒေသများဖြစ်သည်။