မြန်မာနိုင်ငံတွင် ကိုဗစ် ၁၉ ကူးစက်မှုမြင့်တက်လာသောကြောင့် သျှမ်းပြည် လိမ္မော်ခြံသမားများ အရှုံးပေါ်မှုများရင်ဆိုင်ကြုံတွေ့နေရကြောင်း စုံစမ်းသိရသည်။
မြန်မာနိုင်ငံသည် မတ်လမှစတင်ပြီး ကိုဗစ် ၁၉ ရောဂါကူးစက်မှူပြန်ပွားခဲ့ကာ စီးပွားရေးနယ်ပယ် အသီးသီး ကျဆင်းလာခဲ့ပြီး၊ သျှမ်းပြည်မြောက်ပိုင်း နှစ်စဉ်နှစ်တိုင်း ရောင်းအားကောင်းသည့် လိမ္မော်သီး ၊ နံနတ်သီး များသည်လည်း ယခု ကိုဗစ်-၁၉ ကူးစက်ရောဂါကြောင့် ရောင်းအားကျဆင်းပြီး အရှုံးပေါ်နေသည်ဟု ခြံပိုင်ရှင်များက သျှမ်းသံတော်ဆင့်ကို ပြောသည်။
“ ဒီနှစ်မှာ လိမ္မော်သီးတော့ အသီးတွေအထွက်ကောင်းတယ်။ ဒါပေမယ့်ကိုဗစ်ရောဂါကြောင့် ဝယ်သူတွေမရှိပြီး တခြားမြို့နယ်တွေလည်း မရောင်းရ လာဝယ်တဲ့ကုန်သည်တွေလည်းမရှိတာကြောင့် အသီးတွေပုတ်သိုးပြီး လွှင့်ပစ်ရတယ်။ အရူံးပေါ်နေတယ်”ဟု လားရှိုးမြို့နယ် လိမ္မော်သီးခြံပိုင်ရှင်မှ နန်းပေါင်းဆိုင်ကပြောသည်။
ကိုဗစ်ကာလကြောင့် လိမ္မော်သီးများ မရောင်းထွက်ရသောကြောင့် အပုတ်သိုးများ အရင်ထက်များရှိကြောင်း နန်းပေါင်းဆိုင်က ပြောပြသည်။
“အသီးကတော့ ၂ မျိုးရှိတယ်။ သဘာဝသီးကတော့ အချိန်မီ မရောင်းထွက်နိုင်ရင်တော့ ပုတ်သိုးသွားတယ်။ အခုက ကိုဗစ်ကာလဆိုတော့ သိပ်ပြီးမရောင်းထွက်ရဘူး” ဟု နန်းပေါင်းဆိုင်ကပြောသည်။
သဘာဝသီးများကို အပင်မှ ခူးဆွတ်လာပြီး ၃ ရက်အတွင်းမရောင်းရပါက ပုတ်သိုးသွားကြောင်း၊ ကိုဗစ်-၁၉ ကာလ အလျောက် အသီးလာရောက်ဝယ်ယူသူမရှိသဖြင့် အရှုံးပေါ်နေကြောင်း လိမ္မော်ခြံပိုင်ရှင်ဖြစ်သည့် နန်းနွတ် က သျှမ်းသံတော်ဆင့်ကို ပြောသည်။
“တောင်ပေါ်ကနေသွားယူလာတဲ့ အသီးက ၃ရက်တွင်းဆို မရောင်းရရင် ပုတ်သွားတယ်။ ကိုဗစ်ကာလဆိုတော့ ကိုယ့်ရွာထဲဘဲရောင်းရတယ်။ ကိုယ်ရွာလဲ တအားရောင်းမကောင်းတော့ မခူးရသေးဘဲ အပင်မှာလဲရှိနေသေးတယ်” ဟ နန်းနွတ် ကပြောသည်။
သျှမ်းပြည်အတွင်း ကိုဗစ်-၁၉ ကူးစက်မှုနှုန်းမြင့်တက်လာသည့်အလျောက် ခရီးသွားလာမှုများကလည်း မရှိကြသကဲ့သို့ သစ်သီးများကို တဆင့်ဝယ်ယူရောင်းသူများလည်း မရှိကြပေ။
ထို့ကြောင့် ခြံပိုင်ရှင်များသည့် စီးပွားရေး အရှုံးပေါ်မှုကြောင့် အလုပ်သမားများကိုပါ လျော့ကျရကြောင်း နန်းနွတ် က ဆိုသည်။
“ အရင် ကဆိုရင် ခရီးသွားသူတွေကများတော့ ကားသမားတွေ၊ ခရီးသည်တွေရောင်းရင်တောင် ရတယ်။ ဒီနှစ်ကတော့ ခရီးသွားမရှိသလို အသီးလာဝယ်ပြည်တွင်း၊ပြည်ပ လက်လီ၊လက်ကားလည်း ရောင်းအားမရှိဘူး” ဟု နန်းနွတ်က ထပ်လောင်းပြောသည်။
မြန်မာနိုင်ငံတွင် ဒီဇင်ဘာ ၂ ရက် ည ၈နာရီချိန်ထိ ကိုဗစ် ၁၉ အတည်ပြုလူနာ (၉၃၆၀၀) ရှိပြီး ဆေးရုံဆင်းခွင့်ရသူ(၇၂၆၀၁) နှင့် သေဆုံးသူ(၁၉၉၈) ဦး ရှိကြောင်း ကျန်းမားရေးနှင့် အားကစား ဝန်ကြီးဌာန ထုတ်ပြန်ချက် အရသိရသည်။
Leave a Comments