သျှမ်းပြည်တောင်းပိုင်း ညောင်ရွေမြို့နယ် အင်းလေးဒေသအတွင်းရှိ စက်လှေသမားများသည် ခရီးသွားဧည့်သည်များ မရှိသည့်အတွက် စားဝတ်နေရေး ခက်ခဲနေကြောင်း စုံစမ်းသိရသည်။
အင်းလေးကန်ကိုလာရောက်လည်ပတ်သည့် နိုင်ငံခြားဧည့်သည်များနှင့် ပြည်တွင်းခရီးသွားများကိုသာ အားကိုးနေရသည့် စက်လှေသမားများသည် တနှစ်ထက် တစ်နှစ် စားဝတ်နေရေး ပိုခက်ခဲလာကြသည်ဟု စက်လှေသမားများက ပြောဆိုသည်။
၂၀၁၉ ခုနစ် မှစတင်ပြီး ကိုဗစ်-၁၉ ကပ်ရောဂါကြောင့် ခရီးသွားလာမှုရပ်တန့်ခဲ့ပြီး၊ ၂၀၂၁ခုနစ် ဖေဖော်ဝါရီ စစ်အာဏာသိမ်းပြီးနောက် အင်းလေးကန်ကို လာရောက်လည်ပတ်သူများသည် မရှိသလောက် နည်းပါးလာခဲ့ကြောင်း သိရသည်။
“ အင်းလေးကို နိုင်ငံခြားခရီးသွားမပြောနဲ့ ပြည်တွင်းက ဧည့်သည်တောင်မလာတော့ဘူး။ အင်းထဲမှာ လက်ယက်သမားတွေ၊ ဈေးသည်၊ ဟော်တယ်တွေ အကုန်နီးပါးနားထားရတယ်။ တချို့တွေလည်း ဆက်မလုပ်တော့ဘူး၊ ဒီနှစ်သီတင်းကျွတ်ကာလ ပိတ်ရက်တွေမှာတော့ ဘုရားလာဖူးတဲ့ ဧည့်သည်တွေကို မျှော်နေကြတာပေါ့” လို့ အသက် ၄၀နှစ်အရွယ်ရှိ စက်လှေသမားတစ်ဦးက သျှမ်းသံတော်ဆင့်ကိုပြောသည်။
ယခင်တွင် စက်လှေစီးခအတွက် နိုင်ငံခြားသား တစ်ယောက်ကို ဒေါ်လာ ၂၀ ၊ မြန်မာလူမျိုး တစ်ယောက်လျှင် မြန်မာကျပ်ငွေ (နှစ်သောင်း) ဖြင့်အင်းထဲသို့ လှည့်လည်ပို့ဆောင်နိုင်ခဲ့သလို ယခုတွင် လာရောက်လည်ပတ်သော ဧည့်သည်များ မရှိသလောက်နည်းပါးနေကြောင်း ၎င်းက ဆိုသည်။
အလားတူ ပုံမှန်နှစ်တိုင်း သီတင်းကျွတ်လဆန်း (၇) ရက်နေ့ ရောက်ရှိလာလျှင် ဘုရားပွဲ၊ လှေလှော်ပြိုင်ပွဲကို အင်းထဲတွင် (၁၀) ရက်ကျော်အထိ ပြုလုပ်ခဲ့သော်လည်း ယခုနှစ် အပါအဝင် မပြုလုပ်ရသည်မှာ (၃)နှစ်ရှိလာပြီ ဟု အင်းလေး ဒေသခံ တစ်ဦးက ပြောသည်။
“ ကိုဗစ်-၁၉ ရောဂါစဖြစ်လာကတည်းက မပေးလုပ်ဘူး။ ဒီနှစ်လည်းသူတို့မပေးလုပ်ဘူး၊ လှေလှော်ပြိုင်ပွဲလည်း မရှိဘူး။ ဘုရားလာဖူးတဲ့သူတွေတော့ နည်းနည်းပါးပါးတော့ ရှိတယ် “ ဟု ၎င်းဒေသခံတစ်ဦးက ပြောသည်။
ထို့အပြင် စစ်အာဏာသိမ်း (၂) နှစ်နီးပါး ကာလအတွင်းမှာ မြန်မာနိုင်ငံတစ်ဝှမ်းရှိ စီးပွားရေး၊ နိုင်ငံရေး၊ လူမှုရေး ထိခိုက်ပျက်စီးလာခဲ့ပြီးနောက် ပြည်သူများ၏ စားဝတ်နေရေးအတွက်လည်း တစ်နေ့ထက်တစ်နေ့ ပိုမိုကြပ်တည်း လာကြောင်း သတင်းသိရသည်။
