သျှမ်းပြည် အောင်ပန်းမြို့နယ်တွင် စစ်ဘေးရှောင် နှစ်ထောင် ကျော်အတွက် အလှူရှင်များ မရှိ၊စားနပ်ရိက္ခာမျာ နှင့် ဆေးဝါးများ လိုအပ်နေကြောင်း သိရသည်။
သျှမ်း-ကရင်နီနယ်စပ်တကြောမှ အောင်ပန်းသို့ ထွက်ပြေးသိမ်းရှောင်လာသူ နှစ်ထောင်ကျော်သည် လက်ရှိမှာ အလှူရှင် နှစ်လကျော်ကြာ မရှိသဖြင့် စားနပ်ရိက္ခာနှင့် ဆေးဝါးများလိုအပ်နေကြောင်း စစ်ဘေးရှောင်အမျိုးသမီးတစ်ဦးက သျှမ်းသံတော်ဆင့်ကိုပြောသည်။
လက်ရှိအောင်ပန်းစစ်ဘေးရှောင် နှစ်ထောင်ကျော်ထဲမှ အချို့သည် ကြုံရာကျပန်းကို လုပ်ကိုင်ပြီးစားဝတ်နေရေး ကိုဖြေရှင်း နေရသော်လည်း အလုပ်အကိုင်ရှားပါးမှုကြောင့် အခက်အခဲများရင်ဆိုင်နေရသည်။
“အခုချိန်က အလုပ် လုပ်ဖို့ကလည်း ရှာရခက်တယ် အခုချိန်က။လက်ထဲမှာ ပိုက်ဆံလေးမရှိတော့ ဟိုနားက မန်ကျည်းရွက်တွေခူး ဒီနားက အရွက်တွေ ခူးနဲ့ ဖြစ်သလိုပဲ မကျဥ်းရွက်လေးနဲ့ ထမင်းလေးနဲ့ လူကြီးတွေကို အဆင်ပြေအောင် ကျွေးရတာတွေရှိတာပေါ့။စားနပ်ရိက္ခာတွေလည်း လိုတာပေါ့။”ဟု စစ်ဘေးရှောင်အမျိုးသမီးတစ်ဦးက ပြောသည်။
ထို့ပြင် မိသားစုများသည့်သူများထဲတွင် ကျန်းမာရေးမကောင်းသည့် လူကြီးများပါရှိပါက ဆေးဝါး ဝယ်သောက်ရန် အခက်ဖြစ်နေကြောင်းလည်း ၎င်းကပြောသည်။
လက်ရှိ မှာ အောင်ပန်းသို့ရောက်ရှိနေသည့် စစ်ရှောင် နှစ်ထောင်ကျော်သည် ၎င်းတို့ နေရပ်တွင် တိုက်ပွဲများ ဆက်လက်ပြင်းထန်နေသဖြင့် နေအိမ်ပြန်ရန် အဆင်မပြေသေးကြောင်း၊ စစ်ရှောင်ဦးရေများပြီး ကြုံရာကျပန်း အလုပ်နည်းပါးမှုကြောင့် လည်း အခက်အခဲဖြစ်နေကြောင်း စစ်ဘေးရှောင် ကူညီသူအမျိုးသားတစ်ဦးက သျှမ်းသံတော်ဆင့်ကိုပြောသည်။
“တချို့တွေက အဆင်မပြေတာတွေရှိတယ်။မိုးတွင်းမရောက်သေးတော့ အလုပ်ကလည်း ပါးတယ်လေ။ ဘုန်းကြီး ကျောင်းမှာ မနေတဲ့ သူတွေကတော့ ကြုံတဲ့အလုပ်လုပ်ပြီး ဖြေရှင်း ချွေသာသုံး နေရတာပဲ။သူတို့ ပြန်လို့လည်း မရ အလုပ်ကလည်းပါး တချို့ကလည်း ကလေးတွေနဲ့ဆိုတော့ စားဝတ်နေရေးအတွက် စိုးရိမ်ရတာပေ့ါ။”ဟု သူက ဆက် ပြောသည်။
ပြီးခဲ့သည့် ဖေဖော်ဝါရီလ မှစ၍ စစ်ဘေးရှောင်များအတွက် ကူညီသည့် အဖွဲ့များမရှိသည့် အပြင် စားနပ်ရိက္ခားနှင့် ဆေးဝါးများလည်း လိုအပ်နေကြောင်း စစ်ဘေးရှောင်ကူညီသူ တစ်ဦက သျှမ်းသံတော်ဆင့်ကို ပြောသည်။
“စစ်ဘေးရှောင်တွေနဲ့ ချိတ်ထားတာတွေရှိတယ်။ သူတို့မလားဘူးလေ။တချို့အဖွဲ့အစည်းတွေကြတော့ လာမယ်ပြောပြီး မလာတာတွေလည်းရှိတာပေါ့။ စားနပ်ရိက္ခာတွေကတော့ လိုတာပေါ့။အလှူရှင်မရှိတာတောင် ၂ လရှိပြီ။” ဟု စစ်းဘေးရှောင်ကူညီသူ အမျိုးသားတစ်ဦး ကပြောသည်။
သျှမ်း-ကရင်နီတကြော “၁၁.၁၁ စစ်ဆင်ရေး”ကြောင့် ၂၀၂၃ နိုဝင်ဘာလ ဒုတိယပတ်မှ ထွက်ပြေးလာကြပြီး၊ လက်ရှိ စစ်ဘေးရှောင် နှစ်ထောင် ကျော်သည် သျှမ်းပြည် အောင်ပန်းမြို့ရှိ ဘုန်းကြီးကျောင်းများ နှင့် ဆွေမျိုးအိမ် များ သို့ လာရောက် စစ်ဘေးရှောင် နေကြကြောင်းသိရသည်။
