ကိုဗစ်-၁၉ ကူးစက်ရောဂါကြောင့် ၃နှစ်နီးပါး ပိတ်ထားသည့် မြန်မာ-တရုတ်နယ်စပ် မူဆယ်မြို့ မန့်ဝိန်း-ဂျယ်ဂေါင်ဂိတ်ကို ယနေ့ (ဇန်နဝါရီ ၁၄)ရက် နံနက်ပိုင်းတွင် မြန်မာနိုင်ငံဘက်မှ ပြန်လည်ဖွင့်လှစ်လိုက်ကြောင်း သတင်းရရှိသည်။
မြန်မာ-တရုတ်နယ်စပ် မူဆယ်မြို့ မန့်ဝိန်း- ဂျယ်ဂေါင် နယ်စပ်ဂိတ်ကို ယနေ့ (ဇန်နဝါရီ ၁၄)ရက် နံနက် ၇ နာရီတွင် အကန့်အသတ်ဖြင့် ဖွင့်လှစ်လိုက်ပြီ ဖြစ်ကြောင်း မူဆယ်မြို့ ကုန်သည် အမျိုးသမီး တစ်ဦးက သျှမ်းသံတော်ဆင့်ကို ပြောသည်။
“ မူဆယ် မန့်ဝိန်းဂိတ်က ဒီနေ့ မနက် မှာဖွင့်လှစ်ပါတယ်။ အဓိကတော့ ကုန်ကားတွေ ဝင်၊ထွက်လို့ရပါပြီ။ အကန့်အသတ်တော့ရှိသေးတယ်” ဟု ၎င်းကုန်သည်အမျိုးသမီးက ဆိုသည်။
မြန်မာ-တရုတ်နယ်စပ်တလျောက်ရှိ ဂိတ်များကို တရုတ်နိုင်ငံဘက်မှ ဇန်နဝါရီ ၈ရက်တွင် ပြန်လည်ဖွင့်လှစ်ပေးခဲ့သည်။
ယနေ့ မြန်မာဘက်မှ ပြန်ဖွင့်သည့် နယ်စပ်ဂိတ်သည် ကုန်ပစ္စည်းများနှင့် ယာဥ်မောင်း အကန့်အသတ်ဖြင့်သာ ဝင်၊ထွက်သွားလာခွင့်ရကြောင်း၊ ပြည်သူများ ဝင်၊ထွက်သွားလာခွင့်မရသေးကြောင်း ကုန်သည်အသိုင်းအဝန်းက ပြောသည်။
လက်ရှိ ဖွင့်လှစ်လိုက်သည့် ကျယ်ဂေါင်- မန့်ဝိန်းဂိတ်တွင် တရုတ်နိုင်ငံဘက်မှ ဆောက်လုပ်ရေး၊ လျှပ်စစ်၊ ဆေးဝါး၊ စက်မှု၊ လူသုံးကုန်၊ စားကုန်သောက်ကုန် ပစ္စည်းများကို ဝင်ထွက်ခွင့် ပြုကြောင်း သိရသည်။
ယခုလ (ဇန်နဝါရီ ၁၂)ရက်တွင်လည်း ထိုင်း-မြန်မာနယ်စပ် မဲဆောက် -မြဝတီ အမှတ်(၁) ချစ်ကြည်ရေးတံတားကိုဖွင့်လှစ်ခဲ့ပြီဖြစ်ပြီး၊ မယ်ဆိုင်-တာချီလိတ် အမှတ် (၁) ချစ်ကြည်ရေးတံတားကိုလည်း ပြန်လည်ဖွင့်လှစ်ရန် စီစဥ်နေကြေကြောင်း သိရသည်။
Leave a Comments