ကိုးကန့်တပ် (MNDAA) ထိန်းချုပ်ထားသည့် ချင်းရွှေဟော်မြို့တွင် တရုတ်-မြန်မာ နယ်စပ်ဂိတ်ဟောင်းကို ပြန်လည်ပြုပြင်ချဲ့ထွင်နေပြီး ဂိတ်သစ်တစ်ခုကိုလည်း မကြာမီဖွင့်လှစ်ရန် ပြင်ဆင်နေကြောင်း သတင်းရရှိသည်။

လက်ရှိတွင် ဂိတ်ဟောင်းကို ကုန်တင်ကားကြီးများ အဆင်ပြေစွာ သွားလာနိုင်ရန် ကွင်းပြင်ပုံစံ တိုးချဲ့နေပြီး ခြံစည်းရိုးအသစ်များကိုလည်း ပြန်လည်တည်ဆောက်နေကြောင်း “ဝ”ဒေသတွင်း မီဒီယာတစ်ခုဖြစ်သော Wa News Land တွင် ဖော်ပြထားသည်။

ထို့အပြင် တရုတ်ဘက်က ယခင်သတ်မှတ်ထားသည့် နယ်စပ်စည်းထက် မြန်မာဘက်အခြမ်းသို့ တိုးချဲ့ကာ အုတ်တံတိုင်းနှင့် ခြံစည်းရိုးအသစ်များ ခတ်ယူနေကြောင်း သိရသည်။

အလားတူ နယ်စပ်စည်းရိုး ကျူးကျော်ခတ်ယူမှုများကို ချင်းရွှေဟော်အပြင် လောက်ကိုင်၊ ကြူကုတ် (ပန်ဆိုင်း) နှင့် မူဆယ်မြို့များရှိ နယ်စပ်ဒေသများတွင်လည်း တွေ့ရှိနေရကြောင်း အဆိုပါသတင်းတွင် ဖော်ပြသည်။

“၁၀၂၇ စစ်ဆင်ရေး”အတွင်း MNDAA က သိမ်းပိုက်ခဲ့သည် ချင်းရွှေဟော်ဂိတ်သည် တရုတ်၏ ကြားဝင်စေ့ပ်မှုဖြင့် အပစ်ရပ်စဲပြီးနောက် ကုန်သွယ်ရေး ပြန်လည်စတင်နေသည့် အဓိကနေရာတစ်ခု ဖြစ်သည်။

သို့သော် နယ်မြေပိုင်နက် ကျူးကျော်ခံရမှု သတင်းများနှင့် ပတ်သက်၍ နယ်မြေစိုးမိုးထားသည့် MNDAA အပါအဝင် နေပြည်တော်ရှိ စစ်ကော်မရှင်က တစ်စုံတစ်ရာ တုံ့ပြန်ခြင်းမရှိဘဲ နှုတ်ဆိတ်နေကြသည်။

ထို့အပြင် စစ်ကော်မရှင်ဘက်က ပြည်တွင်း၊ ပြည်ပ မီဒီယာများအနေဖြင့် တရုတ်၏ ခြံစည်းရိုးခတ်မှုအပေါ် ဝေဖန်တိုက်ခိုက်ခြင်းမပြုရန် သတိပေးထားကြောင်းလည်း သိရသည်။

နယ်စပ်စည်းကျော်၍ ခြံစည်းရိုးခတ်မှုများသည် ယခုမှ စတင်ခဲ့ခြင်း မဟုတ်ပေ။

၂၀၂၀ ခုနှစ် ကိုဗစ်-၁၉ ကပ်ရောဂါ ကာလအတွင်းက တရုတ်နိုင်ငံသည် ရောဂါကူးစက်မှု တားဆီးရန်ဟူသော အကြောင်းပြချက်ဖြင့် လောက်ကိုင်မြို့နယ်အတွင်းရှိ နယ်နိမိတ်ကျောက်တိုင် BP-131 အနီးတွင် မြန်မာပိုင်နက်ထဲသို့ မီတာ ၂၀၀ ခန့် ကျူးကျော်ကာ ခြံစည်းရိုး ခတ်ခဲ့ဖူးသည်။

ထိုစဉ်က ရောဂါကင်းစင်ချိန်တွင် ပြန်လည်ဖယ်ရှားပေးမည်ဟု တရုတ်ဘက်က ကတိပြုခဲ့သော်လည်း လက်ရှိအချိန်အထိ ဖယ်ရှားခြင်းမရှိဘဲ ပိုမိုခိုင်မာအောင်ပင် ပြုလုပ်ထားကြောင်း ဒေသခံများက ဆိုသည်။

၂၀၁၈ ခုနှစ်တွင် မူဆယ်ခရိုင် ကြူကုတ်(ပန်ဆိုင်း) နှင့် ၂၀၁၉ ခုနှစ်တွင် ချင်းရွှေဟော် အမှတ် (၂) ရပ်ကွက်ရှိ နယ်နိမိတ်ကျောက်တိုင် BP-144 ဝန်းကျင်၌လည်း အလားတူ အငြင်းပွားမှုများ ဖြစ်ပွားခဲ့ဖူးသည်။

သို့သော် ထိုစဉ်က အစိုးရလက်ထက်တွင် နယ်မြေတိုင်းတာမှုများဖြင့် အဖြေရှာနိုင်ခဲ့သော်လည်း ယခုအခါတွင်မူ မြေပြင်၌ တရုတ်က ၎င်းစိတ်ကြိုက် နယ်မြေပုံဖော်နေခြင်းကို မည်သည့်အဖွဲ့အစည်းကမျှ လူသိရှင်ကြား ကန့်ကွက်နိုင်ခြင်း မရှိသေးပေ။