သျှမ်းပြည် ဆီဆိုင်မြို့နယ် စစ်ကောင်စီ ၏ ခြေမြန်တပ်ရင်း ခမရ (၄၂၄) ကို သိမ်းပိုက်လိုက်ကြောင်း ပအိုဝ်းအမျိုးသား လွတ်မြောက်ရေး တပ်မတော် (PNLA) က ယနေ့ (ဇန်နဝါရီ ၂၇ ရက်နေ့) တွင် ထုတ်ပြန်သည်။
ယမန်နေ့ (ဇန်နဝါရီလ ၂၆ ရက်နေ့) စစ်ကောင်စီနှင့် တိုက်ပွဲဖြစ်ပွားခဲ့ပြီး ခမရ (၄၂၄) တပ်ရင်းကို သိမ်းပိုက်ခဲ့ရာ လက်နက် ခဲယမ်းများပါ သိမ်းဆည်းရမိခဲ့ကြောင်း PNLA ကဆိုသည်။
အလားတူ ယမန်နေ့ မွန်းလွဲ ၁၂ နာရီ ၅၀ မိနစ်က နေဝင်းထွန်း ဦးဆောင်သည့် PNO အသွင်ပြောင်း ပြည်သူ့စစ်အင်အား ၁၅၀ ခန့် ဆီဆိုင်မြို့နယ်၊ လွယ်ထွဲရွာအနီး PNLA ကို လာရောက် တိုက် ခိုက်ခဲ့ကြောင်း၊ ယင်းပြည်သူ့စစ်အဖွဲ့ကို PNLA က ပြန်လည် မောင်းထုတ်ရာ ပြည်သူ့စစ် အလောင်း တစ်လောင်းနှင့် လက်နက်တစ် လက် ကျန်ခဲ့ကြောင်း ထုတ်ပြန်ချက်တွင် ဖော်ပြသည်။
PNLA အနေဖြင့် ပအိုဝ်း အချင်းချင်း တိုက်ခိုက်ခြင်း မပြုလိုကြောင်း၊ ထို့ကြောင့် PNLA တပ်ရှိသည့် နေရာသို့ မလာရန်၊ စစ်ကောင်စီနှင့်ရောနှောသွားလာခြင်း မပြုရန် အကြိမ်ကြိမ် သတိပေးညှိနှိုင်းသော်လည်း နေဝင်းထွန်း ဦးဆောင်သည့် PNO တပ်က ညှိနှိုင်းမှုကို လက်မခံဘဲ လာရောက်တိုက်ခိုက်သဖြင့် ပြန်လည်မောင်းထုတ်ရခြင်း ဖြစ်ကြောင်း PNLA က ဆိုသည်။
ထို့ကြောင့် စစ်တပ်လက်အောက်ခံ PNO ပြည်သူ့စစ်တပ်ဖွဲ့ဝင်များအနေဖြင့် စစ်အာဏာရှင် ယန္တရား လည်ပတ်စေသည့် အသုံးချခံဘဝမှ အမျိုးသားလွတ်မြောက်ရေးလမ်းကြောင်းပေါ် ကူးပြောင်းရပ်တည်ရန် အထူးတိုက်တွန်းကြောင်း PNLA က တိုက်တွန်းထားသည်။
ယမန်နေ့က ဆီဆိုင်မြို့နှင့် ကျေးရွာများကို စစ်ကောင်စီက တစ်နေကုန် လက်နက်ကြီးဖြင့် ပစ်ခတ် တိုက်ခိုက်ကာဂျက်ဖိုက်တာ၊ Y12 လေယာဉ်များဖြင့် တနေကုန် ဗုံးကြဲတိုက်ခိုက်ခဲ့ရာ ပြည်သူများ၏ အသက် အိုးအိမ် စည်းစိမ်များ ပျက်စီးထိခိုက်ခဲ့ကြောင်း သိရသည်။
