သျှမ်းပြည် တောင်ပိုင်း ဟိုပုံးမြို့နယ် မဲနယ်တောင်ဒေသ စံဖူးရွာမှ ထွက်ပြေးတိမ်းရှောင်ရသူများသည် တိုက်ပွဲကြား စိုးရိမ်ပူပန်မှုဖြင့် နေရပ်ပြန်နေကြကြောင်း စုံစမ်းသိရသည်။
ဟိုပုံးနှင့် ဆီဆိုင်ကြားရှိ ဒေသများတွင် တိုက်ပွဲများ ဖြစ်ပွားနေပြီး ဟိုပုံးမြို့ပေါ်တွင်လည်း တိုက်ပွဲများ ကူးစက် ဖြစ်ပွားလာနိုင်သည့်အတွက် ဟိုပုံးမြို့ မဲနယ်တောင်ဒေသ စံဖူးရွာက စစ်ရှောင်များမှာ လုံခြုံရေးအရ စိတ်ချရမှုမရှိသေးသော်လည်းနေရပ်ကို ပြန်နေကြကြောင်း ထပ်မံသိရှိရသည်။
“ ရွာက အေးချမ်းတယ်။ လုံခြုံတယ်လို့တော့ မဟုတ်ဘူး။ ဆီဆိုင်မှာလည်း တိုက်ပွဲဖြစ်တော့ ကျမတို့ အခုက ဟိုပုံးမြို့မှာ ရှောင်နေပေမယ့် ရောက်လာနိုင်တယ်လေ။ မတတ်နိုင်ဘူး။ ရှောင်စရာ နေရာလည်းမ ရှိတော့ဘူး။ ကြောက်ကြောက်နဲ့ ရွာကို ပြန်ရတာပေါ့။” လို့ စံဖူးရွာ ဒေသခံ အမျိုးသမီးက ပြောသည်။
ထို့အပြင် စစ်ရှောင်ချိန် အဝတ်တထည်၊ ကိုယ်တခုဖြင့် အရေးပေါ် တိမ်းရှောင်လာခဲ့ကြသည့်အတွက် စားသောက်နေထိုင်ရန် ခက်ခဲလာ၍ အိမ်ပြန်ရန် ဆုံးဖြတ်လိုက်ကြကြောင်း သိရှိရသည်။
“ဘာမှမပါလာပဲ ထွက်လာတော့ ကြာတော့ တောင့်မခံနိုင်တော့ဘူး၊ စားစရာကအစ သောက်ရေအဆုံး စောင်လည်းမရှိ၊ တောထဲတောင်ထဲ သွားရှောင်တဲ့သူတွေဆိုလည်း ခြင်ကိုက်တာကတစ်မျိုးနဲ့၊ ဒီအခြေအနေမှာ အိမ်အရမ်းပြန်ချင်ကြတာတော့ မဟုတ်ဘူး၊ ရွေးချယ်စရာမရှိတော့လို့သာ အိမ်ပြန်ဖို့ ဆုံးဖြတ်ကြတာ”ဟု စစ်ရှောင်အမျိုးသမီးတစ်ဦးမှ ပြောသည်။
စစ်ရှောင်ပြီးနောက် နေရပ်ကို ပြန်ရောက်လာခဲ့သော်လည်း “ ညဖက်လည်း စိတ်ချ လက်ချ မအိပ်ရဲဘူး။ နားစွင့်ထားရတယ်။ သွားလာ ဂရုစိုက်ရတယ် အကုန်လုံးကို သတိထားကိုင်တွယ်ရတယ်”လို့ ၎င်းအမျိုးသမီးက ထပ်မံပြောသည်။
လက်ရှိအချိန်တွင် ပအိုဝ်းကိုယ်ပိုင်အုပ်ချုပ်ခွင့်ရ ဒေသတွင်းရှိ ဆီဆိုင်မြို့နယ်တွင် PNLA၊ SSPP၊ KNDF၊ PDF မဟာမိတ်တပ်ဖွဲ့များနှင့် စစ်ကောင်စီ၊ PNOပူးပေါင်းတပ်များတို့ကြား တိုက်ပွဲများ ဖြစ်သည့်နေသည့် အပြင် စစ်အာဏာရှင် စနစ်ချုပ်ငြိမ်းပြီး ပြည်သူလူထု တစ်ရပ်လုံးလိုလားတောင်းတသည့် ဖက်ဒရယ်ဒီမိုကရေစီကို ဖော်ဆောင်နိုင်သည့်အထိ ဘဝတူ ညီနောင်မဟာမိတ်များနှင့်အတူ တော်လှန်ရေး ဆင်နွဲသွားမည်ဟု PNLO က ယမန်နေ့ (ဇန်နဝါရီ ၂၇)ရက်တွင် ကြေညာလိုက်သည်။
ပြီးခဲ့သည့် ဇန်နဝါရီ ၂၁ရက် ဟိုပုံးမြို့နယ် မဲနယ်တောင်ဒေသတွင်လည်း စစ်ကောင်စီ၊ PNOပူးပေါင်းပြီး PNLAနှင့် တိုက်ပွဲများ ပြင်းထန်စွာ ဖြစ်ပွားခဲ့၍ နေအိမ် ၂၇ လုံးကျော် မီးလောင်ပျက်ဆီးပြီး ဒေသခံများ တိမ်းရှောင်ထွက်ပြေးခဲ့ရသည်။
Leave a Comments