သျှမ်းပြည်တောင်ပိုင်း ဟိုပုံးမြို့နယ် ညောင်ဗက်ကျေးရွာမှ နေအိမ်များကို ဖျက်သိမ်းရန် စစ်ကော်မရှင်နှင့် ပအိုဝ်းပြည်သူ့စစ် PNOတပ်က အိမ်ပိုင်ရှင်များကို တစ်အိမ်လျှင် ငွေကျပ် ငါးသိန်းစီ ထပ်မံကောက်ခံနေကြောင်း သတင်းရရှိသည်။

ပြီးခဲ့သည့် ဖေဖော်ဝါရီလ ဒုတိယပတ်မှစပြီး ဟိုပုံးမြို့နယ် ညောင်ဗက်ကျေးရွာရှိ အိမ်ခြေ၂၀၀ ကျော်ကို ကျူးကျော်နေထိုင်သူဟုဆိုကာ ပအိုဝ်းပြည်သူ့စစ် ( PNO) နှင်ပူးပေါင်းသည့် မြေပွဲစားများက သိမ်းယူခဲ့ပြီး အတင်းအဓမ္မ ရွှေ့ပြောင်းရန် ဖိအားပေးခဲ့သည်။

စစ်ကော်မရှင်တပ်နှင့် PNO တပ်ဖွဲ့၏ဖိအားပေးမှုကြောင့် ညောင်ဗက်ကျေးရွာမှ အိမ်ခြေ၂၀၀ကျော်သည် ယခု မေလ ကုန်တွင် အပြီးပြောင်းရွှေ့ရန် ဖိအားပေးသောကြောင့် ဟိုပုံးမြို့နယ် ဘုရားဖြူဘက်သို့ ပြောင်းရွှေ့ခဲ့ကြသည်။

ထိုသို့ ပြောင်းရွှေ့ခဲ့ပြီးနောက် ညောင်ဗက်ကျေးရွာတွင် ကျန်ရှိသည့် နေအိမ်များကို ဖြိုဖျက်ရန် စစ်တပ်နှင့် PNOတပ်က တစ်အိမ်လျှင် ငွေကျပ်ငါးသိန်းစီ ထပ်မံကောက်သောကြောင့် ဒေသခံများ အခက်တွေ့နေကြောင်း ဒေသခံ အမျိုးသားတစ်ဦးက ပြောသည်။

“သူတို့ချပေးတဲ့ မြေနေရာကလည်း သိန်းငါးဆယ် ပြန်ပေးရမယ်လို့ပြောတယ်။ အခုအဲနေရာမှာ တဲထိုးပြီး နေနေရသေးတယ်။အရာအားလုံးကို အစကနေ ပြန်စနေရတော့ အဆင်မပြေဘူး၊ အခုကျန်ခဲ့တဲ့ နေအိမ်ကို ဖြိုဖို့ ငါးသိန်းထပ်ပေးရမယ်တဲ့ စားစရာကမရှိ နေစရာအိမ်မရှိပါဘူးဆို ပိုက်ဆံထပ်တောင်းတာ အရမ်းလွန်တယ်။”ဟု ဒေသခံ အမျိုးသားတစ်ဦးက ပြောသည်။

ထို့အပြင် မြေဝယ်လျှင် နောက်ခံအကြောင်းရာကို သေချာစုံစမ်းပြီးမှ ဝယ်သင့်ကြောင်းနှင့် လက်နက်ကိုင်များနှင့် ဆက်နွယ်နေသည့် မြေများကို ရှောင်ရှားစေလိုကြောင်း ၎င်းအမျိုးသားတစ်ဦးက ပြောသည်။

ပြီးခဲ့သည့် မတ်လ(၃၀)ရက်က မြေသိမ်းမှုကို ကန့်ကွက်ခဲ့သည့် ရွာသူကြီးအပါဝင် ဒေသခံ (၆)ဦးကို စစ်ကော်မရှင်တပ်က မြေယာဥပဒေဖြင့် တရားစွဲထောင်ချလိုက်ပြီး ဒေသခံများကို လက်နက်အာားကိုးဖြင့် ခြိမ်းခြောက် သိမ်းယူသွားကြောင်း ဒေသခံ အသက် (၅၀)ကျော်အမျိုးသမီးတစ်ဦးက ပြောသည်။

“သူတို့ကလက်နက်ရှိတော့ လုပ်ချင်တိုင်းလုပ်တာပေါ့၊ လက်နက်ရှိရင် အာဏာရှိတယ်လေ ပြည်သူတွေပဲ ခံရတာ၊ရွာသား (၆) ဦးကိုလည်း ထောင်ချလိုက်ပြီ၊ ကျမတို့လည်း အခုပြောင်းပေးလိုက်ရပြီ၊ အဆင်မပြေဘူး လုပ်စားဖို့ မြေလည်းမရှိဘူး နေဖို့လည်း အိမ်မဆောက်ရသေးဘူး၊ အဲမြေနဲ့ပဲ စားဖို့၊နေဖို့၊ ပညာသင်ဖို့ အကုန်ဖြေရှင်း လုပ်စားနေရတာ။” ဟု အဆိုပါ အမျိုးသမီးက ပြောသည်။

ထို့အပြင် ပြီးခဲ့သည့် မတ်လ(၃၀)ရက်တွင် ညောင်ဗက်ကျေးရွာသို့ စစ်ကော်မရှင်တပ် လက်အောက်ခံ ရဲနှင့် PNOတပ်သားများက အင်အားသုံးလာရောက်ကာ ညောင်ဗက်ကျေးရွာမှ နေအိမ်များကို ဘူဒိုဇာဖြင့် ဖယ်ရှားရန် လာရောက်ခြိမ်းခြောက်ခဲ့သည်။

လွန်ခဲ့သည့် ၁၉၉၂ ခုနှစ်တွင် ဟိုပုံး-လွိုင်လင် လမ်းမကြီးမှ မြေဧက နှစ်သောင်းနီးပါးကို စစ်တပ်မှ သိမ်းဆည်းခဲ့ပြီး ၂၀၁၅ ခုနှစ်တွင် စစ်ကော်မရှင်မှ ပအိုဝ်းပြည်သူ့စစ် (PNO) မှတစ်ဆင့် ဒေသခံများထံသို့ လွှဲပြောင်းခဲ့သော်လည်း ပအိုဝ်းပြည်သူ့စစ် (PNO) က ဒေသခံများကို မပေးဘဲ ပွဲစားများနှင့် အကွက်ရိုက်ရောင်းချ မှုများ ရှိခဲ့သည်ဟု သိရသည်။