သျှမ်းပြည်တောင်ပိုင်း တိုက်ပွဲသည် ပြီးခဲ့တဲ့ ဇန်နဝါရီလ ၂၁ ရက်က ဟိုပုံးမြို့နယ် စံဖူးကျေးရွာမှာ ဖြစ်ပွားခဲ့တဲ့ ပအိုဝ်းအမျိုးသားလွတ်မြောက်ရေး တပ်မတော်ရဲ့ PNLA ယာဉ်ကြောင်းကို ပိတ်ဆို့ ဟန့်တားခြင်းကြောင့် စစ်ကောင်စီ စစ်ပတ်နှင့်ပူးပေါင်းထားသော အသွင်းပြည့်ပြည်သူ့စစ် PNO နှင့် PNLA တို့အကြား တိုက်ပွဲစတင်ဖြစ်ပွားခဲ့သည်။

ထိုဖြစ်စဉ်အပြီး နောက်တစ်ရက် (ဇန်နဝါရီလ ၂၂ ရက်) ညတွင် PNLO ဗဟိုဌာနချုပ် နော်ထော်ကျေးရွာကို တိုက်ပွဲဖြစ်ပွားခြင်းမရှိဘဲ စစ်ကောင်စီက လေယာဉ်နဲ့ လာရောက်ဗုံးကြဲ တိုက်ခဲ့သည်။

ထိုချိန်မှစပြီး ဆီဆိုင်မြို့နယ်တွင် တိုက်ပွဲဖြစ်ပွားလာခဲ့ပြီး လက်ရှိမှာ မြို့ပေါ် စစ်ကောင်စီ တပ်စခန်းများ သိမ်းပိုက်လာနိုင်သည့်အထိ တိုက်ပွဲပြင်းထန်လာခဲ့သည်။ ယင်းတိုက်ပွဲကြောင့် မိမိနေရပ်အိုးအိမ်ကို စွန့်ပစ်ပြီး ထွက်ပြေးတိမ်းရှောင်နေရသည့် ဒေသခံ ပြည်သူများအပါအဝင် ဆီဆိုင်မြို့ရောက် ကရင်နီစစ်ဘေးရှောင်များလည်း ထပ်မံထွက်ပြေးတိမ်းရပြန်သည်။

အဆိုပါ တိုက်ပွဲနှင့် ပတ်သက်ပြီး ပအိုဝ်းအမျိုးသားလွတ်မြောက်ရေး တပ်မတော်ရဲ့ PNLA၏ ဦးဆောင်နာယက ဗိုလ်မှူးကြီးခွန်ဉက္ကာကို သျှမ်းသံတော်ဆင့် သတင်းထောက် စိုင်းဟန်လင်းမှ ဆက်သွယ်မေးမြန်းထားပါသည်။

မေး။ ။ အခုဆီဆိုင်မြို့နယ်မှာ တိုက်ပွဲဖြစ်ပွားနေတာနဲ့ ပတ်သက်ပြီး NCAလက်မှတ် ရေးထိုးထာတဲ့ PNLO ဘက်က ပြည်သူလူထုတစ်ရပ်လုံး လိုလားတဲ့ ဖက်ဒရယ်ဒီမိုကရေစီနစ်ကို ဖော်ဆောင်နိုင်တဲ့အထိ ဘဝတူ ညီနောင်မဟာမိတ်တွေ နဲ့အတူ ဆင်နွဲသွားမယ်ဆိုတဲ့ ထုတ်ပြန်ချက်ကြေညာထားတာ ကြားရပါတယ်။ ဒီကစ္စနဲ့ ပတ်သက်ပြီး ဗိုလ်မှူးကြီး ခွန်ဉက္ကာအနေနဲ့ ဘာပြောချင်သလဲ။

ဖြေ။ ။တကယ်တော့ ကျနော်တို့အဖွဲ့အစည်းက အခုရှုပ်ထွေးနေတဲ့ကာလမှာ ဖြစ်နေတယ်။ မှတ်ချက် သိပ်မပေးချင်ဘူး။ ဘာကြောင့်လဲဆိုတော့ ကျနော်တို့က ရန်သူမရှိရေးမှု လုပ်ထားတယ်။ ကရင်နီတွေဘက်က ကျူးကျော်လာတဲ့ PDFတွေက အလုံးအရင်းနဲ့ဝင်ပြီး ဆီဆိုင်မြို့ကိုလာတဲ့ အခါကျတော့ ကျနော်တို့က ဆီဆိုင်မြို့က မြို့သူ၊ မြို့သားတွေ မနာအောင် သွားကာပေးတာ။ ကာပေးတဲ့ဟာမှ ရောထွေးပြီးတော့ ပေါင်းပြီးဝင်တိုက်သလိုလို ဖြစ်သွားတာ။ အခုက သတင်းတွေက ရှုပ်ကုန်တာ။ နည်းနည်း ကြည့်ရသလောက်တော့ အဲ့ဒီဝင်လာတဲ့ PDF တွေ ဖိအားအောက်မှာနဲ့ တူပါတယ်။ စစ်အာဏာရှင်တွေ တိုက်မယ်၊ ဘာညာတွေ သတင်းတွေထွက် လာတော့ တချို့PNLAက စစ်သွေးကြွတွေ နည်းနည်းပါးပါး အစွန်းထွက်တဲ့သူတွေကလည်း နည်းနည်း သွားပူပေါင်းမိတာနဲ့တူတယ်ဗျ။ မူအရကတော့ လုံးဝ NCA အပျက်မခံဘူး။ ပစ်ခတ်ရပ်စဲရေးကိုလည်း ထိန်းတယ်။ အခြေအနေအရ ဖြစ်တယ်နဲ့တူပါတယ်။

မူအရကတော့ လုံးဝအပစ်ခတ်ရပ်စဲရေး NCA လမ်းကြောင်းပေါ်မှာပဲ ရှိပါတယ်။ NCA ကတော့ ပျက်ပြယ်သွားတာမရှိဘူး။ ကျနော်တို့ လက်မှတ်ထိုးထားတဲ့ အဖွဲ့ကလည်း မဖျက်ဘူး။ နုတ်လည်းမနုတ်ထွက်ဘူး။ သို့သော် လက်ရှိအခြေအနေက တခြားအင်အားစုဝင်လာပြီးတော့ အကြပ်အတည်း ပေးတဲ့အခါကျတော့ မြေပြင်အခြေအနေပေါ် မူတည်ပြီး လှုပ်ရှားတာနဲ့ တူတယ်။ မူပြောင်းတာတော့ မဟုတ်ဘူး။ အခုက NCA လမ်းကြောင်းရှိသေးတယ် ဒါပေမယ့် မြေပြင်မှာတော့ တိုက်ပွဲဖြစ်နေတာပေါ့။ တိုက်ပွဲကလည်း ရှုပ်ထွေးတဲ့ ကြားထဲမှာဖြစ်တာ။

စစ်ကောင်စီကို ရန်သူ၊ ရဲတွေကို ရန်သူ၊ ပြည်သူ့စစ်တွေကို ရန်သူလို သွားမှတ်ပြီးတော့ သွားတိုက်တာမဟုတ်ဘူး။ မြေပြင်မှာ ရှုပ်ထွေးပြီးတော့ ရောရောနှောနှော ပါနေတဲ့ သဘောမျိုး မရှင်းမရှင်း ဖြစ်နေတယ်။ မူအရစစ်ကြေညာပြီး တိုက်တာ မဟုတ်ဘူး။ NCA လည်းပျက်တာ မဟုတ်ဘူး။ ထို့အတူပဲ PDF တွေကိုလည်း ကျနော်တို့ ရန်သူသွားမှတ်ပြီးတော့ တိုက်တာ မဟုတ်ဘူး။ ကြားညှပ်နေတာ။ အဲ့ဒါကို ကျနော်တို့က ကြားညှပ်တယ်လို့ ခေါ်တာပေါ့။ ဘယ်သူ့ကိုမှ ကျနော်တို့ရန်သူလို မထားဘူး။ ဒါပေမယ့် ကိုယ်ကကြားထဲမှာညှပ်နေတော့ ကိုယ့်ကိုယ်လာပစ်ရင်တော့ ခုခံရမယ်။ နောက်ပြီးတော့ အားလုံးက ဆက်စပ်နေတယ်။

နောက်ပြီး PNLA ထုတ်ပြန်ထားတဲ့ ထုတ်ပြန်ချက်တစ်ခုလည်း အကြပ်အတည်းကြောင့် ထုတ်တာနဲ့ တူပါတယ်။ အဲ့ဒီလိုမှ မထုတ်ရင် သိပ်မလွယ်ဘူး။

မေး။ ။အခုတိုက်ပွဲက ဆီဆိုင်မြို့နယ်၊ ဟိုပုံးမြို့နယ် တကြောမှာ ဖြစ်နေတဲ့အတွက် စစ်ဘေးရှောင် အပါအဝင် ဒေသခံပြည်သူတွေဘက် အထိအခိုက်နည်းအောင် ဘယ်လိုစီမံထားပါသလဲ။
ဖြေ။ ။ဘယ်လိုမှ မလုပ်နိုင်တော့ဘူး။ အရင်တုန်းကတော့ အရင်နီပြည်မှာ ဖြစ်တယ်။ ကျနော်တို့ဆီလာတယ်။ ကျနော်တို့ စောင့်ရှောက်တယ်။ အခုကျနော်တို့ဆီမှာ ထပ်ဖြစ်တော့ စစ်ရှောင်တွေလည်း ဘယ်ပြေးရမှန်း မသိတော့ဘူး။ နှစ်ဆင့် ဖြစ်သွားတာ။ စစ်ရှောင်တွေက နှစ်ခါထွက်ပြေးနေရသလို ဖြစ်သွားတာ။ အခက်အခဲတော့ ဖြစ်တာပေါ့။ ဟိုပုံးကတော့ တိုက်ပွဲမရှိသေးပါဘူး။ ဆီဆိုင်တဝိုက်မှာပဲ အခုရှိနေတာ။

မေး။ ။ဒီတိုက်ပွဲဖြစ်နေတဲ့ ကြားထဲမှာ စစ်ကောင်စီဘက်က ဘယ်လိုတုန့်ပြန်မှုရှိလဲ။
ဖြေ။ ။စစ်ကောင်စီကတော့ ဗုံးကြဲတာပေါ့။ ဗုံးမကြဲပါနဲ့ ပြောလည်း သူတို့က ဗုံးနဲ့ပဲခြိမ်းခြောက်နေတာပေါ့။ ဗုံးကြဲတော့ ရောကော ပေါတော ဖြစ်ကုန်တာပေါ့။ သူတို့လည်း ရန်သူဘာညာမခွဲတော့ဘူး။ ကျနော်တို့က မဟာမိတ်ပဲဆိုတာလည်း သူတို့မခွဲတော့ဘူး။ ရောကောပေါတောနဲ့ ကြဲနေတာပဲ။ အခြေအနေက ရှုပ်ထွေးနေတယ်လို့ ပြောနိုင်တာပေါ့။