သျှမ်းပြည်မြောက်ပိုင်းနမ္မတူမြို့နယ်တွင် ယခုရက်ပိုင်း တိုက်ပွဲများဖြစ်ပွားမှုကြောင့် မန်စံကျေးရွာ နှင့် မိုင်းမု ကျေးရွာတွင် စစ်ဘေးရှောင် ၈၀၀ ကျော်လာရောက်ခိုလှုံနေကြကြောင်းသိရသည်။
အဆိုပါ စစ်ဘေးရှောင်များသည် မြောက်ပိုင်းမဟာမိတ် တပ်ဖွဲ့ဝင်ဖြစ်သည့် တအာင်း(ပလောင်) လွတ်မြောက်ရေး တပ်မတော် (TNLA)၊ သျှမ်းပြည် တိုးတက်ရေးပါတီ၊ သျှမ်းပြည် တပ်မတော် ( SSPP/SSA) နှင့် မြန်မာ့ တပ်မတော်တို့သည့်သြဂုတ် ၂၉ ရက်နေ့မှ စတင်ကာ ယနေ့ထိ တိုက်ပွဲများဖြစ်ပွားနေကြောင်း သိရသည်။
တိုက်ပွဲကြောင့် စစ်ဘေးရှောင်များသည် နမ္မတူမြို့နယ် မန်စံကျေးရွာ ရှိ စစ်ဘေးရှောင်တွင် ၅၀၀ ကျော် နှင့် မိုင်းမုကျေးရွာ ဘုန်းကြီးကျောင်းတွင် ၃၀၀ နီးပါး ရောက်ရှိတိမ်းရှောင်နေကြကြောင်း စစ်ဘေးရှောင်များကို ကူညီပေးနေသည့် စိုင်းမြင့် က ပြောသည်။
“ တိုက်ပွဲတွေကတော့ ၂၉ ရက်က စဖြစ်တာပဲ။ အခုထိ တိုက်ပွဲတွေဖြစ်နေတယ်။ စစ်ရှောင်တွေကတော့ ၂၉ ရက်ကတည်းက ရောက်နေတာ။ ဒီမနက်တောင် ထော်လဂျီ တစီးနဲ့ ထပ်ရောက်လာတယ်” ဟု စိုင်းမြင့် ကပြောသည်။
စစ်ဘေးရှောင်များမှာ နမ့်ဆီလင်း၊ မန်မိုင်၊ မန်ပုံ၊ ဆန်ခါ၊ ကောင်းဟုန်း၊ နောင်ငင်း၊ လွယ်ပန်ပေ့၊ လွယ်ဟန်း ရွာများမှ ရွာသားများဖြစ်ကြောင်း သိရသည်။
လက်ရှိ စစ်ဘေးရှောင်များအတွက် စားနိပ်ရိက္ခာ လုံလောက်မှုရှိသော်လည်း ရက်ရှည်ကြာပါက ရိက္ခာ ပြတ်လပ်မှုများဖြစ်နိုင်ကြောင်း၊ တချို့ စစ်ဘေးရှောင် များ အဝတ်အစားလိုအပ်မှုများရှိကြောင်း စိုင်းမြင့်က ထပ်လောင်းပြောသည်။
စစ်ရှောင်လာသည့် ဆန်ခါ ကျေးရွာ မှ ဒေသခံ တဦးက “ မနေ့က ဆန်ခါကျေးရွာ အနီး မှာ လက်နက်ကြီး ၂ လုံးကျတယ်။ လူတော့မထိဘူး။ အိမ်တော့ထိသွားတယ်။ တိုက်ပွဲကတော့ ခဏခဏဖြစ်တော့ ကျနော်တို့ အတွက် အရမ်းခက်ခဲတယ်” ဟု သျှမ်းသံတော်ဆင့်သို့ ပြောသည်။
တိုင်းရင်းသားလက်နက်ကိုင်နှင့် မြန်မာတပ်မတော်၊ တိုင်းရင်းသားလက်နက်ကိုင် အချင်းချင်း တိုက်ပွဲဖြစ်ကြလျှင် ပြည်သူများ သာ ခံရကြောင်း ကောင်းဟုန်းကျေးရွာမှ အသက် ၄၀ ကျော် လုံးအောင်က ပြောပြသည်။
“ ဟိုနေ့က ကျနော်တို့ ကောင်းဟုန်းကျေးရွာထဲကို တပ်က သြဂုတ် ၂၉ ရက်နေ့ ဝင်လာတော့ မြောက်ပိုင်းမဟာမိတ်က သူတို့ကို မပြောရကောင်းလားဆိုပြီး ကျနော်တို့ ရွာသူကြီးကို လက်ထိပ်ခတ်ပြီး ဖမ်းဆီးခေါ်သွားတယ်။ တပ်ကို အကြောင်းကြားလို့ ဆိုပြီး ဖမ်းသွားတာ။ ၂၄ နာရီ ချုပ်ထားတယ်” ဟု လုံးအောင် က ဆိုသည်။
သျှမ်းပြည်နယ် မြောက်ပိုင်း နမ္မတူ မြို့နယ် အတွင်း တိုက်ပွဲများ မကြာခဏဖြစ်ပွားကာ ဒေသခံများ စစ်ဘေးရှောင်မှု ပြုလုပ်နေရသဖြင့် လယ်ယာ မစိုက်ပျိုးနိုင်ကြောင်း၊ အလုပ်အကိုင် ကောင်းမွန်စွာ မပြုလုပ်နိုင်သည့် အတွက် အခက်အခဲများစွာ ရင်ဆိုင်နေရကြောင်းလည်း ၎င်းဒေသခံ က ပြောသည်။
သျှမ်းပြည်နယ် မြောက်ပိုင်း နမ္မတူ မြို့နယ် အတွင်း မြောက်ပိုင်း မဟာမိတ် တပ်ဖွဲ့ များနှင့် မြန်မာတပ်တော် တိုက်ပွဲဖြစ်ခြင်း၊ မြန်မာတပ်မတော်နှင့် သျှမ်းပြည် ပြန်လည်ထူထောင်ရေး ကောင်စီ၊ သျှမ်းပြည်တပ်မတော် (RCSS/SSA) နှင့် မြောက်ပိုင်းမဟာမိတ်နှင့် RCSS/SSA တို့ကြား အပြိုင် အလှန် တိုက်ပွဲဖြစ်ပွားနေကြောင်း သိရသည်။
