သျှမ်းပြည် တောင်ကြီးခရိုင် ဆီဆိုင်မြို့နယ်ရှိ စစ်ဘေးရှောင်များကို အကူညီပေးရန်အတွက် အစည်းအဝေး လာတက်ရောက်သည့် နိုင်ငံတကာသံတမန် ယာဉ်တန်းများ ဆီဆိုင်မြို့ မရောင်ခင် ပစ်ခတ်ခံရကြောင်း စစ်ဘေးရှောင်ကူညီသူ ဒေသခံများထံမှ စုံစမ်း သိရှိရသည်။

ယမန်နေ့ (မေလ ၇ ရက်) နံနက်ပိုင်း ၉ နာရီ ဝန်းကျင်တွင် ဟိုပုံး – ဆီဆိုင် ပြည်ထောင်စု ကားလမ်းမပေါ်ရှိ နန်းသြကျေးရွာအနီးတွင် စစ်ရှောင်များကို ကူညီပေးရန်အတွက် နိုင်ငံတကာ အာစီယံ အဖွဲ့အစည်းမှ သံအမတ်ကြီးအပါအဝင် ကိုယ်စားလှယ်များ စီးလာသည့် ယာဉ်တန်း ပစ်ခတ်ခံရကြောင်း ဆီဆိုင်မြို့နယ်ဒေသခံ စစ်ဘေးရှောင် ကူညီပေးနေသည့်ကော်မတီ အဖွဲ့ဝင်တစ်ဦးက သျှမ်းသံတော်ဆင့်ကို ပြောသည်။

“ဟုတ်တယ်။ နိုင်ငံတကာ အာစီယံ အဖွဲ့စည်းက သံအမတ်ကြီးလည်း ပါတယ်။ ဘယ်နှစ်ယောက်လာလည်းတော့ ကျနော်တို့လည်း မသိရဘူး။ သံအမတ်ကြီး ပါတယ်လို့တော့ ပြောတယ်။ သူတို့ယာဉ်တန်းနဲ့လာတာ။ ရဲတွေလည်း ပါတယ်။ ဆီဆိုင် မရောက်ခင် နန်းသြရွာရဲ့ မြောက်ဘက်မှာ ပစ်ခံရတယ်။ သူတို့လည်း ပစ်ခတ်ခံရပြီး လှည့်ပြန်သွားတယ် “ ဟု ၎င်း ကော်မတီဝင် တစ်ဦးက ပြောသည်။

အဆိုပါ ယာဉ်တန်း ပစ်ခတ်ခံရမှုဖြစ်စဉ်အတွင်း ထိခိုက်ဒဏ်ရာ သေဆုံးမှုများ မရှိကြောင်း သိရှိရသော်လည်း သျှမ်းသံတော်ဆင့်သတင်းဌာနမှ အတည်ပြုဖို့ရန် ဆက်လက် စုံစမ်းနေခြင်း ဖြစ်သည်။

အလားတူ ဆီဆိုင်မြို့နယ်ရှိ စစ်ဘေးရှောင်များကို အကူညီပေးဖို့လာသည့် နိုင်ငံတကာ အာစီယံအဖွဲ့အစည်းမှ ယာဉ်တန်း ပစ်ခတ်ခံရခြင်း အမှန်တကယ် ဖြစ်ကြောင်း အစည်းအဝေးအတွင်းသို့ တက်ရောက်ခဲ့သည့် စစ်ဘေးရှောင် ကူညီသူတစ်ဦးက ထပ်လောင်းပြောသည်။

“ ဟုတ်ပါတယ်။ အဲ့ဒါတော့ အမှန်ပါ။ မနေ့က ကျနော်တို့ ကိုယ်ကိုတိုင်လည်း အစည်းအဝေးသွားတော့ ကျနော်တို့ကို လာတွေ့ပြီး စုံစမ်း မေးမြန်းဖို့ အာဆီယံအဖွဲ့ ကိုယ်စားလှယ်တွေ၊ သံအမတ်တွေတောင်လည်း ပါတယ်။ ဒီလမ်း တစ်ဝက်မှာ ခြိမ်းခြောက် ပစ်ခတ်ခံရတယ်လို့ ပြောတယ်“ ဟု ၎င်းက ပြောသည်။

အဆိုပါ ပစ်ခတ်မှုဖြစ်စဉ်အတွင်း မည်သည့်အဖွဲ့အစည်းမှ လက်ချက်ဖြစ်ကြောင်း မသိရသေးပေ။

ဆီဆိုင်မြို့နယ်ရှိ စစ်ဘေးရှောင်များကို တွေ့ဆုံမေးမြန်းရန် လာရောက်သည့် နိုင်ငံတကာ အာဆီယံ အဖွဲ့အစည်း ပစ်ခတ်ခံရမှု နှင့် ပတ်သက်ပြီး စိတ်မကောင်း၊ ဝမ်းနည်းမိကြောင်းလည်း စစ်ရှောင်ကူညီသူ ဒေသခံတစ်ဦးက ထပ်လောင်းပြောသည်။

“ စိတ်ထဲတော့ မကောင်းဘူး။ မနေ့က အစည်းအဝေးထဲမှာတောင် ကျနော်ပြောလိုက်သေးတယ်။ အခု ကျနော်တို့ စစ်ဘေးရှောင်တွေကို အကူညီပေးဖို့လာတာကို ခရီးစဥ်အတွင်းမှာ အဲ့လိုဖြစ်သွားတော့ ဘယ်သူပဲ ဖြစ်ဖြစ်လေ ကောင်းတယ်လို့တော့ မယူဆဘူး။ သူတို့က လုံးဝကို မှားနေတယ်။ အခု နိုင်ငံရေးကိစ္စက ဖြစ်နေတာက ဖြစ်နေပြီလေ။ ဒါပေမယ့် သူများက ကူညီချင်တာလေ၊ ဘာမှလာလုပ်တာလည်း မဟုတ်ဘူး။ အဲ့လိုဖြစ်သွားတော့ လုံးဝစိတ်မကောင်းဘူး “ ဟု ၎င်းက ဖြည့်စွက်ပြောသည်။

ဆီဆိုင်မြို့ နှင့် ဆိုက်ခေါင်စံပြကျေးရွာကြားရှိ နန်းသြကျေးရွာသည် ဆီဆိုင်မြို့ နှင့် ၆ မိုင်ခန့် ကွာဝေးကြောင်းလည်း သိရသည်။

စစ်တပ်က အာဏာသိမ်းပြီးနောက်ပိုင်း သျှမ်း – ကယား နယ်စပ် တိုက်ပွဲကြောင့် ဆီဆိုင်မြို့နယ်တွင် စစ်ဘေးရှောင် ဦးရေ ၈ ထောင်ကျော် ထွက်ပြေးခိုလှုံနေရပြီး စားနပ်ရိက္ခာ၊ ဆေးဝါး၊ ယာယီ အဆောက်အဉီးများ အကူအညီ အရေးပေါ်လိုအပ်နေသေးကြောင်း သိရသည်။