သျှမ်းပြည် ကျိုင်းတုံခရိုင် မိုင်းပျဥ်းမြို့ အဝင်/အထွက် ရှိ မိုင်းပျဥ်းမြို့ စစ်ကောင်စီ စစ်ဆေးရေးဂိတ်၌ စစ်သားများက စစ်ဆေးမှု တင်းကြပ်နေသည့် အတွက် ကားသမားများက အခက်တွေ့နေရကြောင်း သတင်း သိရသည်။

ကွန်ဟိန်း – မိုင်းပျဥ်း – တာချီလိတ် လမ်းကြောင်းရှိ မိုင်းပျဥ်း စစ်ကောင်စီ စစ်ဆေးရေးဂိတ်မှ စစ်သားများသည် အိမ်စီးကား အပါအဝင် ကုန်တင်ကားများအားလုံးကို စင်းလုံးစစ်ဆေးမှု ပြုလုပ်ရာ အချိန်ကြာသည့်အတွက် ကားသမားများက အခက်တွေ့နေရကြောင်း ကားသမား တစ်ဦးက သျှမ်းသံတော်ဆင့်ကို ပြောသည်။

“ဒီလိုဖြစ်လာတာကတော့ အာဏာသိမ်းပြီးကတည်းကပဲ၊ တဖြည်းဖြည်း နဲ့ စစ်ဆေးမှုတွေက တင်းကြပ်လာတာ၊ အခုဆိုရင် ကားသမားတွေမှ မဟုတ်ဘူး၊ ခရီးသည်တွေရဲ့ မှတ်ပုံတင်တွေကိုလည်း စစ်ဆေးတယ်၊ ကားတွေ အကုန်လှန်ပြီး စစ်တာ၊ ကားတစ်စီးကို တစ်နာရီ၊ တစ်နာရီခွဲလောက် စစ်ကြတယ်” ဟု ဒေသတွင်း ကားသမား တစ်ဦးက သျှမ်းသံတော်ဆင့်ကို ပြောသည်။

အဆိုပါ စစ်ဆေးမှု တင်းကြပ်သည့် အတွက် ကားသမားများသည် တန်းစီစောင့်ဆိုင်းရပြီး လမ်းခရီးကြန့်ကြာမှု ၊ ကုန်ပစ္စည်း ထိခိုက်မှုများလည်း ရှိလာကြောင်း အထက်ပါ ကားသမားက ဆက်ပြောသည်။

ထို့အပြင် အိမ်စီးကား တစ်စီးကို ပိုက်ဆံ ၃၀၀၀ ကျပ် (သုံးထောင်ကျပ်) တောင်းယူနေပြီး တခြားကုန်တင်ကားများကိုလည်း ကုန်အမျိုးအစား နှင့် ပမာဏပေါ်မူတည်ပြီး ပိုက်ဆံ ကောက်ယူ တောင်းခံနေကြောင်းလည်း သိရသည်။

“စစ်ဆေးမှုတွေ တင်းကြပ်တဲ့ အပြင် ပိုက်ဆံတောင်းတာလည်းများတယ်၊ တချို့ ကားသမားတွေကတော့ သူတို့ တောင်းတာ မပေးနိုင်လို့ ပြန်ငြင်းကြတာလည်း ရှိတယ်၊ အဲ့လိုဆိုရင် အချိန်ပိုကုန်သလို လူကိုလည်း ဆူလား ငေါက်လား လုပ်တယ်၊ တစ်နေ့တစ်နေ့ တန်းစီပြီး စောင့်နေရတဲ့ ကားတွေက ၄၀/၅၀ စီးလောက်ရှိတယ်” ဟု အထက်ပါ ကားသမားက ဆက်ပြောသည်။

မိုင်းပျဥ်း စစ်ဆေးရေးဂိတ်တွင် စစ်သားများ၊ ရဲများ၊ မူးယစ်ဆိုင်ရာ တာဝန်ရှိသူများ နှင့် အချို့ရက်များတွင် လဝက ယူနီဖောင်းဝတ်များလည်း စောင့်ကြကြောင်း သိရသည်။

မိုင်းပျဥ်းဂိတ်သည် မနက် ၆ နာရီမှ ည ၈ နာရီအထိသာ ဖွင့်လှစ် သွားလာခွင့်ပြုပြီး တောင်ကြီး ၊ မိုင်းရှူး ၊ မိုင်းဆတ် စသည်တို့နှင့် မြန်မာပြည်ဘက်မှ တာချီလိတ်ဘက် လာသည့် ကားသမားများ အဓိက ပြေးဆွဲရာ ပြည်ထောင်စု လမ်းမကြီး ဖြစ်ကြောင်းလည်း သိရသည်။

“သျှမ်းအရှေ့ဘက်ကို လာတဲ့ အဓိက လမ်းကြောင်းဖြစ်နေတော့ ကားတွေက များပါတယ်၊ ဒါပေမဲ့ သူတို့ (စစ်သား) တွေက စစ်ဆေးပြီး ၈ နာရီကျော်တာနဲ့ ပေးမဖြတ်တာတွေကြောင့် အချိန်က မကြာသင့်ပဲ ကြာရတယ်၊ အဲ့လိုတွေ ဆို ကျနော်တို့ ကားသမားတွမှ မဟုတ်ဘူး ခရီးသည်တွေလည်း နစ်နာတယ်၊ ကောင်းကောင်းမွန်မွန် သွားလာနိုင်ရင်တော့ ကောင်းတာပေါ့” ဟု ကားသမားတစ်ဦးက ဆက်ဆိုသည်။

လမ်းခရီး အဆင်ပြေရန်နှင့် အချိန်ကုန် သက်သာရန်အတွက် ဂိတ်စောင့် တာဝန်ရှိသူများ စစ်ဆေးမှုကို လျှော့စေလိုကြောင်း နှင့် ကားသမားများကို ပိုက်ဆံလျော့တောင်းကြရန် တောင်းဆိုလိုကြောင်း ဒေသအတွင်း ကားသမားများက ပြောသည်။