ထိုင်းနိုင်ငံ ချင်းမိုင်မြို့တွင် စစ်ဆေးရေးဂိတ်များကို တိမ်းရှောင်သူများနှင့် ပိုမိုရှုပ်ထွေးလာသော ခေတ်သစ်ရာဇဝတ်မှုများကို ဝေဟင်မှ တဆင့် စောင့်ကြည့်နိုင်ရန် လူမဲ့လေယာဉ် (Unmanned Aerial Vehicles-UAV) များ အသုံးပြုသည့် “ဒရုန်းကင်းလှည့်အဖွဲ့” (Drone Patrol) စစ်ဆင်ရေးကို စတင်အသုံးပြုပြီ ဖြစ်ကြောင်း ချင်းမိုင်သတင်းတွင်ဖော်ပြသည်။

ယမန်နေ့ (ဇွန်လ ၁၅ ရက်) နေ့လယ် ၁၁:၀၀ နာရီအချိန်တွင် ချင်းမိုင်မြို့ရှိ Phu Ping Ratchaniwet Police Station သည် စစ်ဆေးရေးဂိတ်များ ပိတ်ဆို့ရှာဖွေမှုအတွင်း ဒရုန်းအသုံးပြုရှာဖွေစစ်ဆေးမှုများကို စတင်ဆောင်ရွက်နေကြောင်း သတင်းထုတ်ပြန်ထားသည်။

လက်ရှိအသုံးပြုမည့် ဒရုန်းများသည် စစ်ဆေးရေးဂိတ်များသို့ မရောက်ရှိမီ လမ်းခုလတ်မှ လှည့်ပြေးရန် ကြိုးပမ်းသည့် သံသယဖြစ်ဖွယ်ယာဉ်များကို ဝေဟင်မှတဆင့် မပြတ်တမ်းစောင့်ကြည့် ခြေရာခံကာ လိုက်လံဖမ်းဆီး တားဆီးသွားမည်ဖြစ်သည်။

ထို့သို့ ဒရုန်းများ အသုံးပြုရန်ပြင်ဆင်ခြင်းသည် ပြီးခဲ့သည့် ဇွန်လ ၁၁ ရက်က ချင်းမိုင်ခရိုင်ရဲတပ်ဖွဲ့ ခန်းမဆောင်တွင် တရားဝင်ဖွင့်လှစ်ခဲ့သည့် “နည်းဗျူဟာမြောက် ထိရောက်မှု မြှင့်တင်ရေး စီမံကိန်း (ခြောက်ယောက်ပါအဖွဲ့နှင့် ဒရုန်းလှည့်ကင်း)” ၏ နောက်ဆက်တွဲ အစီအစဉ်တစ်ခု ဖြစ်သည်။

ထိုစီမံကိန်း၏ ရည်ရွက်ချက်မှာ ဓားစာခံဖမ်းဆီးခံရမှု၊ အန္တရာယ်ကြီးမားသော မူးယစ်ဆေးဝါး စစ်ဆင်ရေးများ၊ အရေးကြီးလူပုဂ္ဂိုလ် (VIP) ကာကွယ်ရေးနှင့် လူအုပ်ကြား သေနတ်ပစ်ခတ်မှု (Active shooter) ကဲ့သို့သော အသက်အန္တရာယ်ရှိသည့် ရာဇဝတ်မှုများကို တာဝန်ကျ ရဲအရာရှိများက ထိရောက်စွာ ကိုင်တွယ်နိုင်ရန်နှင့် အရပ်သား ထိခိုက်သေဆုံးမှု လျှော့ချနိုင်ရန် ရည်ရွယ်ခြင်းဖြစ်ကြောင်းသိရသည်။

လက်ရှိတွင် စီမံကိန်းကို ထိရောက်စွာ လည်ပတ်နိုင်ရန် ချင်းမိုင်ခရိုင် ရဲတပ်ဖွဲ့မှ အဆင့်မြင့် ဒရုန်းအစင်းရေ ၄၀ ကို ဝယ်ယူထားပြီး ဒေသခံရဲစခန်းများနှင့် မှုခင်းစုံစမ်းစစ်ဆေးရေးဌာနခွဲများသို့ ခွဲဝေချထားသည်။ တပ်ဖွဲ့ဝင်များကိုလည်း ဒရုန်းနည်းပညာအား အရေးကြီးသည့် ကဏ္ဍ ၃ ခုတွင် စနစ်တကျ အသုံးချနိုင်ရန် အထူးပြုဆင်ထားသည်။

လက်ရှိအသုံးပြုမည့် အရေးကြီး ကဏ္ဍ ၃ ခုမှာ အန္တရာယ်ရှိသော ဇုန်များနှင့် စစ်ဆေးရေးဂိတ်များကို ဝေဟင်မှ စောင့်ကြည့်ခြင်း၊ ထွက်ပြေးရှောင်တိမ်းသည့် သံသယရှိသူများကို ခြေရာခံခြင်းနှင့် မြေပုံများ ရေးဆွဲခြင်း၊ ယာဉ်ကြောပိတ်ဆို့မှုများနှင့် မတော်တဆဖြစ်ပွားရာ နယ်မြေများကို တိုင်းတာစစ်ဆေးခြင်း စသည့် ကဏ္ဍများတွင် အသုံးပြုသွားမည်ဖြစ်သည်။

ကိုးကား – Chiang Mai News