ထိုင်းနိုင်ငံမြောက်ပိုင်း ချင်းမိုင်မြို့ရှိ တရုတ်ကောင်စစ်ဝန်ချုပ်ရုံးရှေ့တွင် ယနေ့ (ဇူလိုင် ၆ ရက်) နံနက်က ပြုလုပ်ခဲ့သော ဆန္ဒပြပွဲအတွင်း ရဲတပ်ဖွဲ့ဝင်များနှင့် ဆန္ဒပြသူများအကြား ရုန်းရင်းဆန်ခတ်ဖြစ်ပွားခဲ့ရာ လူ ၂ ဦး ဒဏ်ရာရရှိခဲ့ကြောင်း ထိုင်းသတင်းတွင် ဖော်ပြသည်။

မြန်မာနိုင်ငံအတွင်းရှိ တရုတ်ရင်းနှီးမြှုပ်နှံမှု သတ္တုတွင်းများမှ ထွက်ရှိသော အဆိပ်သင့်ဓာတုပစ္စည်းများက နယ်စပ်ဖြတ်ကျော်ကာ သဘာဝပတ်ဝန်းကျင်ကို ပျက်စီးစေမှုအပေါ် တရုတ်အစိုးရမှ တာဝန်ယူ ဖြေရှင်းပေးရန် Network to Protect River Kok Sai Ruakkhong က ဦးဆောင်၍ ဆန္ဒပြတောင်းဆိုခဲ့ကြသည်။

ဆန္ဒပြပွဲအတွင်း လုံခြုံရေးယူထားသည့် ရဲအရရှိများနှင့် ဆန္ဒပြသူများအကြား တင်းမာမှုများ မြင့်တက်လာကာ ရုန်းရင်းဆန်ခတ်ဖြစ်ပွားခြင်း ဖြစ်ပြီး အဆိုပါဖြစ်စဉ်ကြောင့် ဆန္ဒပြသူ ၂ ဦး ဒဏ်ရာရရှိခဲ့ကြောင်း ထိုင်းသတင်းတွင် ဖော်ပြထားသည်။

ဆန္ဒပြသူများက တရုတ်အစိုးရအနေဖြင့် အိမ်နီးချင်းနိုင်ငံများ၏ သဘာဝပတ်ဝန်းကျင်ကို ပျက်စီးစေသော ၎င်းတို့၏ ကုမ္ပဏီများနှင့် ရင်းနှီးမြှုပ်နှံသူများကို ထိရောက်စွာ အရေးယူပေးရန်နှင့် ယခုဖြစ်ပေါ်နေသည့် မြစ်ရေညစ်ညမ်းမှုများအတွက် တာဝန်ယူဖြေရှင်းပေးရန် တောင်းဆိုထားသည့် အိတ်ဖွင့်ပေးစာတစ်စောင်ကိုလည်း တရုတ်ကောင်စစ်ဝန်ရုံးသို့ ပေးအပ်ခဲ့ကြောင်း သိရသည်။