ထိုင်းနိုင်ငံ၊ ချင်းမိုင်မြို့နယ်အတွင်း ခွင့်ပြုထားသည့် အလုပ်လုပ်ခွင့် (Work Permit) အမျိုးအစားနှင့် ကိုက်ညီမှုမရှိဘဲ ရုံးအကူဝန်ထမ်းအဖြစ် ကျော်လွန် လုပ်ကိုင်နေသည့် မြန်မာနိုင်ငံသားတစ်ဦးကို ချင်းမိုင်ခရိုင် လူဝင်မှုကြီးကြပ်ရေးနှင့် အလုပ်အကိုင်ရှာဖွေရေးရုံး ပူးပေါင်းတပ်ဖွဲ့က ဖမ်းဆီးလိုက်ကြောင်း သိရသည်။

ပြီးခဲ့သည့် ဇူလိုင်လ ၂၃ ရက်နေ့က ချင်းမိုင်ခရိုင်၊ ပါတန် (Pa Tan) နယ်မြေရှိ စီးပွားရေးလုပ်ငန်းတစ်ခုတွင် တရားမဝင် နိုင်ငံခြားသားအလုပ်သမားများ ငှားရမ်းထားကြောင်း ထိုင်းနိုင်ငံသားတစ်ဦး၏ သတင်းပေးချက်အရ စုံစမ်းစစ်ဆေးရေး ပူးပေါင်းတပ်ဖွဲ့က သွားရောက် စစ်ဆေးခဲ့ကြသည်။

ထိုစစ်ဆေးမှုကြောင့် လုပ်ငန်းခွင်အတွင်း မြန်မာနိုင်ငံသားတစ်ဦးကို တွေ့ရှိခဲ့ရပြီး ကိုယ်ရေးအချက်အလက်များအရ အထွေထွေလုပ်သားအဖြစ် မှတ်ပုံသော်လည်း အရာရှိများ ဝင်ရောက်လာချိန်တွင် ကုမ္ပဏီအတွင်း၌ နိုင်ငံခြားသား အလုပ်သမားများ၏ စာရွက်စာတမ်းများကို ပြင်ဆင် ဆောင်ရွက်ပေးနေသည်ကို တွေ့ရှိခဲ့ရခြင်း ဖြစ်သည်။

စစ်ဆေးမေးမြန်းမှုများအရ ထိုမြန်မာနိုင်ငံသားအမျိုးသမီးမှာ အဆိုပါကုမ္ပဏီတွင် ရုံးအကူဝန်ထမ်းအဖြစ် လုပ်ကိုင်နေသည်မှာ ၂ နှစ်နီးပါး ရှိပြီဖြစ်ကြောင်း ထွက်ဆိုခဲ့သည်။

၎င်းသည် ကုမ္ပဏီ၏ဖောက်သည်များ ရှာဖွေပေးခြင်းနှင့် အလုပ်လုပ်ခွင့်ကတ် လျှောက်ထားခြင်းဆိုင်ရာ စာရွက်စာတမ်းများ စီမံခန့်ခွဲပေးသည့် တာဝန်များကို ဆောင်ရွက်ပေးခဲ့ကြောင်း သိရသည်။

ထို့ကြောင့် အာဏာပိုင်များက ဥပဒေအရ ခွင့်ပြုထားသည့် အခွင့်အရေးထက် ကျော်လွန်၍ လုပ်ကိုင်မှု၊ အလုပ်စတင်ပြီး ၁၅ ရက်အတွင်း အလုပ်ရှင်၊ လုပ်ငန်းခွင်နှင့် လုပ်ကိုင်သည့် အလုပ်အမျိုးအစားတို့ကို အရာရှိထံ အကြောင်းကြားရန် ပျက်ကွက်မှု စသည့် စွဲချက် နှစ်ခုဖြင့် ဖမ်းဆီးခဲ့သည်။

လက်ရှိတွင် ဥပဒေအရ ဆက်လက် အရေးယူနိုင်ရေးအတွက် ချန်ဖွက် (Chang Phueak) ရဲစခန်းမှ စုံစမ်းစစ်ဆေးရေး အရာရှိများထံ လွှဲပြောင်းပေးအပ်ထားကြောင်း သိရသည်။

ကိုးကား – Chiang Mai News