ထိုင်းနိုင်ငံ၊ ချင်းမိုင်ခရိုင်၊ ချင်းဒေါင်မြို့နယ်ရှိ Resort တစ်ခုတွင် တရားဝင် ခွင့်ပြုထားသည့် အလုပ်အကိုင်အား‌ ကျော်လွန်လုပ်ကိုင်ပြီး အလုပ်ရှင်နှင့် အလုပ်နေရာ ပြောင်းလဲမှုကို အလုပ်သမားရုံးထဲ အကြောင်းကြားရန် ပျက်ကွက်ခဲ့သည့် မြန်မာရွှေ့ပြောင်း အလုပ်သမား အမျိုးသမီးတစ်ဦးကို ဖမ်းဆီးခဲ့ကြောင်း ချင်းမိုင်သတင်းတွင်ဖော်ပြသည်။

ချင်းမိုင် လူဝင်မှုကြီးကြပ်ရေးဌာနနှင့် စုံစမ်းစစ်ဆေးရေးဌာနခွဲတို့မှ ပူးပေါင်းတပ်ဖွဲ့များ ဝင်ရောက် စစ်ဆေးစဉ် ၎င်းမြန်မာနိုင်ငံသား အမျိုးသမီးသည် အဆိုပါ Resort တွင်လုပ်ကိုင်နေသည်မှာ တစ်လခန့်ရှိပြီဖြစ်ပြီး အလုပ်လုပ်ကိုင်ခွင့်လက်မှတ်မှာလည်း အထွေထွေလုပ်သားအဖြစ်သာ လုပ်ကိုင်ခွင့်ပြုထားကြောင်း စစ်ဆေးတွေ့ရှိခဲ့သည်။

စစ်ဆေးချက်အရ ထိုအမျိုးသမီးမှာ သက်ဆိုင်ရာဌာနတွင် အလုပ်ရှင်နှင့် အဓိက အလုပ်လုပ်ကိုင်သည့် နေရာတို့ကို တရားဝင် ပြောင်းလဲလျှောက်ထားခြင်း မရှိဘဲ၊ တစ်ရက်လျှင် လုပ်အားခ ထိုင်းဘတ်ငွေ ၄၀၀ ဖြင့်လုပ်ကိုင်နေခြင်းဖြစ်သည်။

ထို့ကြောင့် အာဏာပိုင်များမှ အလုပ်စတင်လုပ်ကိုင်သည့် ၁၅ ရက်အတွင်း မိမိ၏ အလုပ်ရှင်၊ လုပ်ငန်းခွင်နှင့် အဓိက အလုပ်အကိုင် အမျိုးအစားတို့အား သက်ဆိုင်ရာထံ အကြောင်းကြားရန် ပျက်ကွက်မှု” ဖြင့် ပြစ်မှုစွဲဆိုထားသည်။

လက်ရှိတွင် သံသယရှိသူ မြန်မာအမျိုးသမီးအား ချင်းဒေါင်မြို့နယ် ရဲစခန်းမှ စစ်ဆေးရေးအရာရှိများထံ လွှဲပြောင်းပေးအပ်ထားပြီး ဥပဒေအတိုင်း ဆက်လက် အရေးယူဆောင်ရွက်သွားမည်ဖြစ်ကြောင်း သိရသည်။

ယခုဖမ်းဆီးမှုဖြစ်စဉ်နှင့် ပတ်သက်ပြီး ထိုင်းနိုင်ငံ အလုပ်သမား ဦးစီးဌာန၏ ဥပဒေအရ ပြဋ္ဌာန်းထားသော အလုပ်အကိုင် အမျိုးအစား ခွဲခြားထားမှုနှင့် ရွှေ့ပြောင်းအလုပ်သမားများ သတိပြုရန် လိုအပ်သည့် အချက်များမှာ အောက်ပါအတိုင်း ဖြစ်သည် –
ထိုင်းအစိုးရသည် ရွှေ့ပြောင်းအလုပ်သမားများ၏ အလုပ်အကိုင်များကို သီးခြားအုပ်စုများ ခွဲခြားထားသည် –

• ကာယလုပ်သား (Kammakon) – ဆောက်လုပ်ရေး၊ စက်ရုံ၊ ကုန်တင်ကုန်ချ၊ စိုက်ပျိုးရေး စသည့် အထွေထွေ ကာယအားစိုက်ရသော အလုပ်များ။
• အိမ်ဖော်/သန့်ရှင်းရေး (Maeban) – နေအိမ်၊ ရီဇော့၊ ဟိုတယ်နှင့် ရုံးများတွင် သန့်ရှင်းရေးနှင့် အိမ်အကူ လုပ်ကိုင်ရသော အလုပ်များ။
ရွှေ့ပြောင်းအလုပ်သမားများ၏ အလုပ်လုပ်ခွင့် (Work Permit) ပေါ်တွင် “ခွင့်ပြုထားသည့် အလုပ်အကိုင် အမျိုးအစား” (Type of Work) ကို တိတိကျကျ ဖော်ပြထားသဖြင့်၊ မိမိ ရရှိထားသည့် အလုပ်လုပ်ခွင့်နှင့် အမှန်တကယ် လုပ်ကိုင်နေသည့် အလုပ်အကိုင် မတူညီပါက “ခွင့်ပြုထားသည့် အလုပ်အကိုင် နယ်ပယ်ပြင်ပ ပြောင်းလဲလုပ်ကိုင်မှု” ဖြင့် အလုပ်သမားရော အလုပ်ရှင်ပါ တရားစွဲဆို အရေးယူခြင်း ခံရနိုင်သည်။
ထို့ကြောင့် “ကာယလုပ်သား” အဖြစ် မှတ်ပုံတင်ထားသူတစ်ဦးသည် “သန့်ရှင်းရေး/အိမ်ဖော်” အလုပ်သို့ ပြောင်းလဲ လုပ်ကိုင်လိုပါက –
• အလုပ်မစတင်မီ သို့မဟုတ် စတင်သည့် ၁၅ ရက်အတွင်း အလုပ်သမား ဦးစီးဌာန (Registrar) ထံတွင် အလုပ်ရှင် အမည်၊ အလုပ်နေရာနှင့် အလုပ်အကိုင် အမျိုးအစား (Type of Work) ကို သန့်ရှင်းရေး/အိမ်ဖော် သို့ တရားဝင် ပြောင်းလဲ လျှောက်ထား ပြင်ဆင်ရမည်ဖြစ်သည်။
• လုပ်ငန်းခွင်သစ်၏ အလုပ်ရှင်ကလည်း လိုအပ်သည့် စာရွက်စာတမ်းများဖြင့် တရားဝင် အမည်ပေါက် ပြောင်းလဲပေးရန် လိုအပ်ပါသည်။

အထက်ပါအတိုင်း စာရွက်စာတမ်း ပြင်ဆင်မှု မပြုလုပ်ဘဲ အလုပ်ပြောင်းလဲ လုပ်ကိုင်ပါက ဥပဒေအရ ဖမ်းဆီး အရေးယူခံရမည် ဖြစ်သည်။

ကိုးကား – Chiang Mai News