ထိုင်းနိုင်ငံသားများအတွက်သာ ဥပဒေအရ သီးသန့်ကန့်သတ်ထားသော ဧည့်လမ်းညွှန် (Guide) အလုပ်ကို လုပ်ပိုင်ခွင့်ကျော်လွန်ပြီး မြန်မာခရီးသွားများအား လိုက်လံပို့ဆောင်ကာ ဧည့်လမ်းညွှန်လုပ်နေသည့် မြန်မာနိုင်ငံသားတစ်ဦးကို ဖမ်းဆီးရမိခဲ့ကြောင်း ချင်းမိုင်သတင်းတွင်ဖော်ပြသည်။

ရဲတပ်ဖွဲ့သည် တိုင်ကြားချက်များရရှိပြီးနောက် သံသယရှိသူများနောက်သို့ ၂ ရက်ခန့် အနီးကပ်နောက်ယောင်ခံကာ သက်သေများကို စုဆောင်းခဲ့သည်။ ထို့နောက် ဒွိုင်ဆူတေ့ပ် ဘုရားပေါ်၌ မြန်မာခရီးသွားအဖွဲ့တစ်စုကို လိုက်လံလမ်းညွှန်ပေးနေစဉ်အတွင်း ဝင်ရောက်ဖမ်းဆီးခဲ့ခြင်း ဖြစ်သည်။

စစ်ဆေးချက်များအရ မြန်မာနိုင်ငံသား အမျိုးသမီးသည် ၎င်း၏ကိုယ်ပိုင်အမည်ဖြင့် ဖေ့စ်ဘွတ်ခ်စာမျက်နှာတစ်ခု ဖွင့်လှစ်ကာ မြန်မာခရီးသွားများအတွက် ခရီးစဉ်များ စီစဉ်ပေးခဲ့ပြီး၊ တစ်ခေါက်လျှင် ခန့်မှန်းခြေ ဘတ် ၄,၀၀၀ မှ ၅,၀၀၀ အထိ ဝန်ဆောင်ခများကို ကောက်ခံထားကြောင်းတွေ့ရှိခဲ့သည်။

ရဲတပ်ဖွဲ့မှ တရားဝင်လိုင်စင်မရှိဘဲ ခရီးသွားလုပ်ငန်း လုပ်ကိုင်မှု၊ ဥပဒေအရ သတ်မှတ်ထားသော အခွင့်အရေးများထက် ကျော်လွန်၍ လုပ်ကိုင်နေသော နိုင်ငံခြားသားဖြစ်မှုတို့ဖြင့် စွဲချက်တင်ကာ Phu Ping Ratchaniwet ရဲစခန်းသို့ လွှဲပြောင်းကာ တရားစွဲဆိုထားသည်။

ထိုင်းပြည်သူများ၏ တိုင်ကြားချက်များအရ မြန်မာနိုင်ငံသားများသည် လူမှုကွန်ရက်စာမျက်နှာ၊ ဖေ့စ်ဘွတ်ခ် (Facebook) ပေါ်တွင် မြန်မာဘာသာဖြင့် ပေ့ချ် (Page) များဖွင့်လှစ်ကာ ခွင့်ပြုချက်မရှိဘဲ ခရီးစဉ်များကို ကြော်ငြာခြင်း၊ ခရီးသွားအစီအစဉ်များ ရေးဆွဲပေးခြင်း၊ ဧည့်လမ်းညွှန်အဖြစ်လည်းကောင်း ယာဉ်မောင်းအဖြစ်ပါ တစ်ပြိုင်နက်တည်း လုပ်ဆောင်ခြင်းတို့ကို ပြုလုပ်ခဲ့ကြသည်။

ထိုသို့ တရားဝင်ခွင့်ပြုချက်များကို ကျော်လွန်၍ ဥပဒေပြင်ပမှ လည်ပတ်ပြီး အစိုးရအခွန်များကို တိမ်းရှောင်ကာ တရားဝင် ထိုင်းကုမ္ပဏီများထက် ဈေးနှုန်းများကို သိသိသာသာ လျော့ချကာ ဈေးကွက်ဖျက် ယှဉ်ပြိုင်နေကြသဖြင့် ဥပဒေဘောင်အတွင်းမှ လုပ်ကိုင်နေသော ထိုင်းဧည့်လမ်းညွှန်များကို ပြင်းထန်စွာ ထိခိုက်နစ်နာစေခဲ့ကြောင်းလည်း ဖော်ပြထားသည်။

ကမ္ဘာလှည့်ခရီးသွားရဲတပ်ဖွဲ့ဗျူရိုက အဓိက ခရီးသွားဆွဲဆောင်ရာ နေရာများရှိ တရားမဝင် ခရီးသွားဝန်ဆောင်မှုလုပ်ငန်းများကို အရှိန်အဟုန်ဖြင့် ဆက်လက်နှိမ်နင်းသွားမည်ဖြစ်ကြောင်း၊ စုံစမ်းစစ်ဆေးမှုများနှင့် ဆက်စပ်နေသည့် ကွန်ရက်များကိုလည်း ဆက်လက်စုံစမ်းသွားပြီး ဥပဒေချိုးဖောက်သူအားလုံးကို ဥပဒေအရ ပြင်းထန်စွာ အရေးယူသွားမည်ဖြစ်ကြောင်းပြောကြားထားသည်။

ထိုင်းပြည်သူများနှင့် စီးပွားရေးလုပ်ငန်းရှင်များအနေဖြင့် ယခုကဲ့သို့ တရားမဝင် လှုပ်ရှားမှုများကို တွေ့ရှိပါက ကမ္ဘာလှည့်ခရီးသွားရဲတပ်ဖွဲ့သို့ ဆက်သွယ်တိုင်ကြားရန်လည်း သတိပေးထားကြောင်း သိရသည်။

ကိုးကား – Chiang Mai News