ထိုင်းနိုင်ငံ၊ ချင်းမိုင်ခရိုင်၊ ဖန် (Fang) မြို့နယ်ရှိ လုပ်ငန်းတခုတွင် အထောက်အထားမဲ့ မြန်မာလုပ်သားများ ငှားရမ်းထားကြောင်း သတင်းပေးပို့ချက်အရ သွားရောက်စစ်ဆေးရာမှ မြန်မာနိုင်ငံသား ၂ ဦး ဖမ်းဆီးခံခဲ့ရကြောင်း ချင်းမိုင် လူဝင်မှုကြီးကြပ်ရေးဌာနက သတင်းထုတ်ပြန်သည်။

ယမန်နေ့ (ဩဂုတ်လ ၃၁ ရက်) က ဖန်မြို့နယ်၊ ဆန်ဆိုင်း တိုက်နယ်ရှိ လုပ်ငန်းတစ်ခုတွင် တရားမဝင် ရွှေ့ပြောင်းလုပ်သားများ လုပ်ကိုင်နေကြောင်း ဒေသခံတစ်ဦး၏ သတင်းပေးပို့ချက်အတိုင်း ချင်းမိုင် လဝက နှင့် ခရိုင် အလုပ်သမားညွှန်ကြားရေးဦးစီးဌာနတို့ ပူးပေါင်း၍ ဝင်ရောက်စီးနင်းခဲ့ခြင်းဖြစ်သည်။

စစ်ဆေးမှုများအရ သံသယရှိသူ မြန်မာနိုင်ငံသား ၂ ဦးအနက် တစ်ဦးမှာ လွန်ခဲ့သော နှစ်အနည်းငယ်က ထိုင်းနိုင်ငံအတွင်းသို့ တရားမဝင် ဝင်ရောက်ခဲ့ပြီး အဆိုပါ လုပ်ငန်းတွင် အလုပ်လုပ်ကိုင်နေသည်မှာ ၁ နှစ်ခန့် ရှိပြီဖြစ်ကြောင်း ဝန်ခံထွက်ဆိုထားသည်။

အခြားတစ်ဦးမှာ ထိုင်းနိုင်ငံသားမဟုတ်သူ သက်သေခံကတ်ပြား (ပန်းရောင်ကတ်) ကို ကိုင်ဆောင်ထားသော်လည်း တရားဝင် အလုပ်လုပ်ကိုင်ခွင့် ပါမစ် (Work Permit) မရှိဘဲ လွန်ခဲ့သည့် တစ်ပတ်ခန့်ကမှ စတင်အလုပ်လုပ်ကိုင်ခဲ့သူဖြစ်ကြောင်း သိရသည်။

လက်ရှိတွင် အဆိုပါ မြန်မာလုပ်သား ၂ ဦးလုံးကို ခွင့်ပြုချက်မရှိဘဲ ဝင်ရောက်နေထိုင်မှု၊ အလုပ်လုပ်ကိုင်ခွင့် ကတ်မရှိဘဲ အလုပ်လုပ်ကိုင်မှုတို့ဖြင့် တရားစွဲဆိုထားပြီး အရေးယူဆောင်ရွက်နိုင်ရန် ဖန်းရဲစခန်းသို့ လွှဲပြောင်းပေးအပ်ထားသည်။

အာဏာပိုင်များက အဆိုပါဒေသအတွင်း တရားမဝင် ဝင်ရောက်မှုနှင့် ခွင့်ပြုချက်မရှိဘဲ အလုပ်လုပ်ကိုင်နေမှုများကို ဆက်လက် တင်းကြပ်စွာ စစ်ဆေးသွားမည်ဟု သတိပေးထားသည်။

ကိုးကား – Chiangmai Post