ထိုင်းနိုင်ငံသို့ ရောက်ရှိနေသည့် အာဏာသိမ်း သမ္မတ ဦးမင်းအောင်လှိုင် ယနေ့ ဩဂုတ်လ ၇ ရက် (သောကြာနေ့) က ထိုင်းလွှတ်တော်သို့ ရောက်ရှိလာစဉ် ထိုင်းလွှတ်တော်အမတ်တစ်ဦးက “ငြိမ်းချမ်းရေးအတွက်၊ လူသားချင်းစာနာမှုအတွက်” (For peace, for humanity) ဟု ကျယ်လောင်စွာ ကြွေးကြော်၍ ပြင်းပြင်းထန်ထန် ကန့်ကွက်ဆန္ဒပြခဲ့ကြောင်း Khaosod သတင်းတွင်ဖော်ပြသည်။

အာဏာသိမ်း သမ္မတ၏ နှစ်ရက်တာ ခရီးစဉ်အတွင်း ထိုင်းလွှတ်တော်သို့ လာရောက်သည့်အချိန်တွင် ထိုင်းလွှတ်တော်အမတ်တစ်ဦးက လက်သီးလက်မောင်းတန်း၍ ကြွေးကြော်ခဲ့ခြင်းဖြစ်ပြီး လုံခြုံရေးဝန်ထမ်းများက ၎င်းအား တားဆီးထိန်းသိမ်းခဲ့ရသည်။

ယခုခရီးစဉ်နှင့် ပတ်သက်၍ ထိုင်းအရပ်ဘက် အဖွဲ့အစည်းများကလည်း မင်းအောင်လှိုင်အား ထိုင်းအစိုးရက လက်ခံတွေ့ဆုံခြင်းသည် စစ်အာဏာသိမ်းမှုကို နိုင်ငံရေးအရ တရားဝင်မှု ပေးအပ်ရာရောက်ပြီး မြန်မာပြည်သူများ၏ ခံစားဒုက္ခများကို လျစ်လျူရှုခြင်းဖြစ်သည်ဟု ဆိုကာ ပြင်းပြင်းထန်ထန် ရှုတ်ချကန့်ကွက်ထားကြသည်။

ထိုင်းအစိုးရကမူ နယ်စပ်လုံခြုံရေး၊ စီးပွားရေးနှင့် နယ်စပ်ဖြတ်ကျော် ပြဿနာများကို ဖြေရှင်းရန်အတွက် မြန်မာနိုင်ငံနှင့် ထိတွေ့ဆက်ဆံရန် လိုအပ်သည်ဟု ကာကွယ်ပြောဆိုထားသော်လည်း၊ မင်းအောင်လှိုင်၏ ခရီးစဉ်အတွင်း ထိုင်းလွှတ်တော်အတွင်း၌ပါ ယခုကဲ့သို့ တိုက်ရိုက် ကန့်ကွက်ဆန္ဒပြမှုများ ဖြစ်ပေါ်ခဲ့ခြင်း ဖြစ်သည်။

ကိုးကား – Khaosod English