သျှမ်းပြည်တောင်ပိုင်း၊ ရွာငံမြို့နယ်နှင့် ပင်းတယမြို့နယ်တွင် ဇွန်လအတွင်း အမျိုးသားသုံးဦး အသတ်ခံရကြောင်း သတင်းရရှိသည်။
စစ်အာဏာသိမ်းပြီးနောက်ပိုင်း ရွာငံနှင့် ပင်းတယတွင် ကျေးရွာအုပ်ချုပ်ရေးမှူးများ၊ ပျူစောထီးနှင့် အရပ်သားများ မကြာခဏ သတ်ခံနေရကြောင်းသိရသည်။
ပြီးခဲ့သည့် ဇွန်လ ပထမပတ်တွင် ရွာငံမြို့နယ် မြိုင်ကျေးရွာမှ ပျူစောထီး တစ်ဦးကို အမည်မသိလက်နက်ကိုင် အဖွဲ့မှ လာရောက်သတ်ဖြတ်ခဲ့ပြီး အလားတူ ပင်းတယမြို့နယ် စံသီးကုန်းကျေးရွာမှ အုပ်ချုပ်ရေးမှူး ဦးကျော်ဇောကို ဇွန်လ (၁၃)ရက်တွင် အမည်မသိအဖွဲ့မှ လာရောက် သတ်ဖြတ်ခဲ့ကြောင်းသိရသည်။
ထို့အပြင် ဇွန်လ (၁၈)ရက်တွင်လည်း ရွာငံမြို့နယ် လယ်ကိုင်းကျေးရွာအုပ်စု တံတားဖြူကျေးရွာတွင် အသက် (၄၀) ကျော်အရွယ်ရှိ အမျိုးသားတစ်ဦးကို အမည်မသိလက်နက်ကိုင်မှ လာရောက် ပစ်သတ်သွားခဲ့ကြောင်း ဒေသခံများထံမှ သိရသည်။
“ဘာကြောင့် သတ်တာလဲတော့ မသိဘူး ။ဒီဖက်မှာက လူသတ်တာတို့ ခဏခဏ ဖြစ်တယ်၊ အခုတံတားဖြူကဆို ညအချိန်ကို လာသတ်တာ၊ လက်နက်ကိုင်တစ်စုလို့တော့ ပြောတာပဲ။ ဘယ်အဖွဲ့လည်းတော့ မသိဘူး၊”ဟု ရွာငံဒေသခံ အမျိုးသားတစ်ဦးက ပြောသည်။
ထိုသို့ လူသတ်မှုများ မကြာခဏ ဖြစ်နေခြင်းကြောင်း အုပ်ချုပ်ရေးမှုးလုပ်မည့် သူပင်မရှိတော့ကြောင်းနှင့် ဒေသခံများ အသွားလာ အနေထိုင် သတိရှိနေရကြောင်း ၎င်းအမျိုးသားက ဆက်ပြောသည်။
ဆက်လက်ပြီး ပင်းတယမြို့နယ် စံသီးကုန်းကျေးရွာတွင် အုပ်ချုပ်ရေးမှုး အသစ်ပြန်လည်တင်မြောက်ရန် စစ်ကော်မရှင်တပ်က လူရွေးချယ်မှုများ လုပ်ဆောင်နေကြောင်း သိရသည်။
“တချို့ကြတော့လည်း မလုပ်ချင်ကြဘူး အကြောင်းအမျိုးမျိုးပြပြီး ငြင်းပြီး ထွက်ကြတယ်၊ ရွာထဲမှာ ပြောကြတာက အုပ်ချုပ်ရေးမှုးလုပ်ရင် အသက်တိုတယ် ဆိုပြီး ပြောကြတယ်၊ တချို့ကြတော့လည်း လုပ်ပိုင်ခွင့် အာဏာတွေရတော့ လုပ်ချင်တယ်၊ စစ်တပ်လက်အောက်ခံဆိုတဲ့ အတိုင်း သူတို့ခေါ်ရင် သွား ခိုင်းတာလုပ်ရမှာပေါ့၊အခုထိတော့ လူရွေးနေကြတုန်းပဲ။”ဟု ပင်းတယ ဒေသခံ အမျိုးသမီးတစ်ဦးက ပြောသည်။
အုပ်ချုပ်ရေးမှုး မလုပ်လို၍ ဒေသခံအချို့မှာ သာသနာ့ဘောင်ဝင်ရောက်ခြင်း၊ ကျန်းမာရေးအရ အကြောင်းပြခြင်းနှင့် ခရီးထွက်ခြင်း စသည့်အကြောင်းပြ၍ ရှောင်ကြကြောင်း သိရသည်။
ပြီးခဲ့သည့် မေလအတွင်း ရွာငံမြို့နယ်တွင် အုပ်ချုပ်ရေးမှုး၊ အရပ်သားနှင့် ပျူစောထီး (၉)ဦးအသတ်ခံရကြောင်း သျှမ်းသံတော်ဆင့်မှ စုဆောင်းထားသော ဒေတာအချက်လက်များအရ သိရသည်။
Leave a Comments