စစ်အာဏာသိမ်း သမ္မတ ဦးမင်းအောင်လှိုင်သည် လာအိုနိုင်ငံကို ချစ်ကြည်ရေး ခရီးစဉ် ၃ ရက်ကြာသွားပြီးနောက် မြန်မာ-လာအိုနယ်စပ် ရေကြောင်းဖြတ်သန်းမှုကို (ဇူလိုင် ၁၆ ရက်)တွင် တရားဝင် ပြန်လည် ဖွင့်လှစ်လိုက်ကြောင်း သတင်းရရှိသည်။

ပြီးခဲ့သည့် ဇူလိုင် ၃ ရက်မှ ၅ ရက်အထိ စစ်အာဏာသိမ်း သမ္မတ ဦးမင်းအောင်လှိုင်သည် မြန်မာ-လာအိုနိုင်ငံ ချစ်ကြည်ရေးခရီးစဉ်အဖြစ် သွားခဲ့သည်။

ထိုခရီးစဉ်တွင် မြန်မာ-လာအိုနိုင်ငံအကြား ဖြတ်သန်းစီးဆင်းသည့် မဲခေါင်မြစ်ပေါ်ရှိ လျှပ်စစ်ဓာတ်အား ၂,၇၉၀ မဂ္ဂါဝပ် ထုတ်လုပ်နိုင်မည့် ရေအားလျှပ်စစ်တစ်ခု အကောင်အထည်ဖော်ရန် အတွက်လည်း နှစ်နိုင်ငံအစိုးရက သဘောတူညီချက် လက်မှတ်ရေးထိုးခဲ့ကြသည်။

အဆိုပါစီမံကိန်းကို သျှမ်းပြည်အရှေ့ပိုင်း တာချီလိတ်ခရိုင်နှင့် လာအိုနိုင်ငံ လွမ်နမ်သာခရိုင်တို့အကြား နယ်စပ်အဖြစ် မိုင် ၁၅၀ ခန့် ထိစပ်စီးဆင်းနေသည့် မဲခေါင်မြစ်ကြောင်းတစ်လျှောက်တွင် အကောင်အထည်ဖော်ရန် ရည်ရွယ်ထားသည်။

အလားတူ စစ်အာဏာရှင် သမ္မတ ဦးမင်းအောင်လှိုင်၏ လာအိုခရီးစဉ်တွင် ၎င်းခန့်ထားသည့် အလုပ်သမား ဝန်ကြီး ဦးခင်မောင်စိုးနှင့် လာအိုနိုင်ငံ အလုပ်သမားနှင့် လူမှုဝန်ထမ်းဝန်ကြီးတို့ တွေ့ဆုံပြီး လာအိုရောက် အထောက်အထားမဲ့ မြန်မာအလုပ်သမားများအတွက် Certificate of Identity (CI) ထုတ်ပေးရေး၊ အလုပ်သမားအခွင့်အရေးနှင့် ကာကွယ်စောင့်ရှောက်ရေးကိစ္စရပ်များကိုလည်း
ဆွေးနွေးခဲ့ကြသည်။

ထို့ကြောင့် ကိုဗစ်-၁၉ ကပ်ရောဂါကြောင့် ခြောက်နှစ်နီးပါး ပိတ်ဆိုင်းထားသည့် မြန်မာ-လာအို နယ်စပ် ဝမ်ပုံ-မိန်းမော ရေကြောင်းဖြတ်ကျော်မှုကို ဇူလိုင် ၁၆ ရက်တွင် တရားဝင်ပြန်ဖွင့်လှစ်လိုက်သည်။

“အရင်ပိတ်ထားတုန်းကတော့ လာအိုဘက်သွားအလုပ်လုပ်တဲ့သူတွေက ခိုးသွားကြတာ၊ အခုတော့ မှတ်ပုံတင်ရှိရင် တရားဝင်သွားလို့ရပြီ” ဟု တာချီလိတ်မြို့ခံ အသက် ၄၀ အရွယ်ရှိ စိုင်းတစ်က သျှမ်းသံတော်ဆင့်ကို ပြောသည်။

တာချီလိတ်မြို့နယ်ရှိ ဝမ်ပုံဆိပ်ကမ်းသည် လာအိုနိုင်ငံသို့ သွားရောက်မည့်သူများအတွက်ထိုင်းနှင့် မြန်မာနယ်စပ် မယ်ဆိုင်-တာချီလိတ် ဂိတ်ကဲ့သို့ပင် အရေးပါသည့် ဝင်ပေါက်တစ်ခုဖြစ်သည်။

ဂိတ်များတရားဝင် မဖွင့်လှစ်မီ ကာလများအတွင်း ဒေသတွင်း သွားလာလိုသူများသည် စက်လှေများဖြင့် တရားမဝင် ခိုးကူးခဲ့ကြရပြီး တစ်ဦးလျှင် တရုတ်ယွမ် ၁၀၀ မှ ၂၀၀
ခန့်အထိ ပေးဆောင်ခဲ့ရကြောင်း ဒေသခံများထံမှ သိရသည်။

“အခုတော့ တစ်ယောက်ကို ယာယီနယ်စပ်ဖြတ်ကျော်ခွင့်လက်မှတ် (TBP) အတွက် ကျပ်တစ်ထောင်ဘဲပေးရတော့မယ်” ဟု ၎င်းကဆိုသည်။

ယခုဖွင့်လှစ်သည့် ဝမ်ပုံဂိတ်သည် တာချီလိတ်ဒေသခံများသာမကဘဲ အခြားဒေသမှ လာရောက်သူများပါ နိုင်ငံသားစိစစ်ရေးကတ် သို့မဟုတ် Smart Card ကိုင်ဆောင်ထားရုံဖြင့်
ယာယီဖြတ်ကျော်ခွင့်လက်မှတ် (TBP) ပြုလုပ်ကာ သွားလာနိုင်မည်ဖြစ်ကြောင်း သိရသည်။

သို့သော် နိုင်ငံကူးလက်မှတ် (Passport) ဖြင့် ဖြတ်သန်းခွင့်ရှိ၊ မရှိကိုမူ အာဏာပိုင်များဘက်က ရှင်းလင်းစွာ ထုတ်ပြန်ထားခြင်း မရှိသေးပေ။

ဝမ်ပုံဆိပ်ကမ်းမှ လာအိုနိုင်ငံ မိန်းမောဆိပ်ကမ်းသို့ စက်လှေဖြင့် ဖြတ်ကူးပြီးနောက် လာအိုလူဝင်မှုကြီးကြပ်ရေးရုံးတွင် သတင်းပို့ဝင်ရောက်ရမည်ဖြစ်သည်။

ဂိတ်ပြန်လည်ဖွင့်လှစ်သည့် ပထမဆုံးနေ့တွင် မြန်မာနိုင်ငံသား ၅ ဦးအား ယာယီနယ်စပ်ဖြတ်ကျော်ခွင့်လက်မှတ် (TBP) ထုတ်ပေးခဲ့ပြီး လာအိုနိုင်ငံဘက်သို့ စက်လှေဖြင့် ထွက်ခွာသွားခဲ့ကြောင်း၊ လာအိုဘက်မှ မြန်မာနိုင်ငံသို့ ဝင်ရောက်လာသူမူ မရှိသေးကြောင်း လူဝင်မှုကြီးကြပ်ရေးဌာန၏ မှတ်တမ်းများအရ သိရသည်။

လာအိုနိုင်ငံတွင် တရားမဝင် အလုပ်လုပ်ကိုင်နေသည့် အထောက်အထားမဲ့ မြန်မာနိုင်ငံသား ၆ သောင်း ဝန်းကျင်ရှိကြောင်း စစ်ကော်မရှင်လက်အောက်ခံ အလုပ်သမားဝန်ကြီးဌာနက ၂၀၂၅ ခုနှစ် ဇန်နဝါရီလအတွင်း ထုတ်ပြန်ခဲ့သည်။