အာဏာသိမ်းသမ္မတ ဦးမင်းအောင်လှိုင်သည် တရုတ်နိုင်ငံသမ္မတ ရှီကျင့်ဖျင်၏ ဖိတ်ကြားချက်အရ (၅) ရက်ကြာ နိုင်ငံတော်အဆင့် ချစ်ကြည်ရေးခရီးအဖြစ် ယနေ့ (ဇွန်လ ၁၅ ရက်) တွင် တရုတ်နိုင်ငံသို့ စတင်ထွက်ခွာပြီ ဖြစ်ကြောင်း သိရသည်။ 

ယခုခရီးစဉ်သည် ဦးမင်းအောင်လှိုင် သမ္မတအဖြစ် တာဝန်ယူပြီးနောက်ပိုင်း ဒေသတွင်း အင်အားကြီးနိုင်ငံများထံမှ သံတမန်ရေးရာ အသိအမှတ်ပြုမှုရရှိရန် ကြိုးပမ်းသည့် ဒုတိယမြောက် ပြည်ပခရီးစဉ် ဖြစ်သည်။

တရုတ်နိုင်ငံသမ္မတ ရှီကျင့်ဖျင်၏ ဖိတ်ကြားချက်အရ ဇွန်လ ၁၅ မှ ၁၉ ရက်အထိ သွားရောက်မည့် အဆိုပါခရီးစဉ်အတွင်း ဦးမင်းအောင်လှိုင်သည် သမ္မတ ရှီကျင့်ဖျင်နှင့် တွေ့ဆုံဆွေးနွေးမည် ဖြစ်ကြောင်း Global Times တွင် ဖော်ပြထားသည်။ 

ထို့အပြင် ဝန်းကြိးချုပ် လီချန်း (Li Qiang) နှင့် အမျိုးသားပြည်သူ့ကွန်ဂရက် အမြဲတမ်းကော်မတီဥက္ကဋ္ဌ ကျောက်လဲ့ကျီ (Zhao Leji) တို့နှင့်လည်း သီးခြားစီတွေ့ဆုံရန် စီစဉ်ထားကြောင်း သိရသည်။

ယခုခရီးစဉ် မတိုင်မီ ပြီးခဲ့သည့် (ဇွန်လ ၅ ရက်) ကလည်း အာဏာသိမ်းအစိုးရ နိုင်ငံရေးဝန်ကြီး ဦးတင်မောင်ဆွေသည် ပေကျင်းသို့ သွားရောက်ကာ တရုတ်နိုင်ငံခြားရေးဝန်ကြီး ဝမ်ယိနှင့် တွေ့ဆုံခဲ့သေးသည်။ 

Global Times သတင်းဌာန၏ ပြောပြချက်အရ ယခုခရီးစဉ်အတွင်း နှစ်နိုင်ငံအကြား လက်တွေ့ကျသော ပူးပေါင်းဆောင်ရွက်မှုများကို အဓိထားမည် ဖြစ်ပြီး၊ အထူးသဖြင့် နယ်စပ်ဒေသ တည်ငြိမ်ရေးနှင့် နယ်စပ်ဖြတ်ကျော် ဆိုက်ဘာရာဇဝတ်မှုများကို ပူးပေါင်းနှိမ်နင်းရေး၊ တရုတ်-မြန်မာ စီးပွားရေးစင်္ကြံ (CMEC) နှင့် ကျောက်ဖြူရေနက်ဆိပ်ကမ်း အပါအဝင် အခြေခံအဆောက်အအုံဆိုင်ရာ အဓိကစီမံကိန်းများကို အရှိန်မြှင့်တင်ရေးတို့ ပါဝင်ကြောင်း သိရသည်။

ဦးမင်းအောင်လှိုင်သည် ပြီးခဲ့သည့် မေလ ၃၁ ရက်မှ ဇွန်လ ၃ ရက်အထိ အန္ဒိယနိုင်ငံသို့ ပထမဆုံး ပြည်ပခရီးစဉ်အဖြစ် သွားရောက်ကာ အန္ဒိယသမ္မတ ဒရော်ပါဒီ မူရ်မူ၊ ဝန်းကြီးချုပ် နာရန်ဒရာ မိုဒီတို့နှင့် တွေ့ဆုံခဲ့ပြီးနောက် ရက်ပိုင်းအတွင်းမှာပင် တရုတ်နိုင်ငံသို့ ထပ်မံသွားရောက်ခြင်း ဖြစ်သည်။ 

ထို့အပြင် တရုတ်နိုင်ငံ၏ အမျိုးသားလုံခြုံရေးကို ဘေးအန္တရာယ်ပြုသည်ဟု သံသယရှိသဖြင့် မြန်မာ့မဟာဗျူဟာနှင့် မူဝါဒလေ့လာရေး အင်စတီကျု (ISP – Myanmar)၏ အမှုဆောင်ဒါရိုက်တာ ဦးမင်းဇင်အား သူလျှိုမှုဖြင့် ဖမ်းထားကြောင်း တရုတ်နိုင်ငံခြားရေးဝန်ကြီးဌာနက (ဇွန်လ ၁၂ ရက်) တွင် အတည်ပြုပြောကြားခဲ့ကြောင်း သိရသည်။