သျှမ်းပြည် တောင်ပိုင်း တောင်ကြီး–မိုင်းရှူးလမ်းပိုင်းရှိ စစ်ကော်မရှင်၏ စစ်ဆေးရေးဂိတ်အချို့ကို ဖျက်သိမ်းထားသော်လည်း ကားခနှုန်းထားများနှင့် ကုန်ပစ္စည်းဈေးနှုန်းများ ကျဆင်းလာခြင်း မရှိသေးကြောင်း စုံစမ်းသိရသည်။

လက်ရှိတွင် တောင်ကြီး–ဟိုပုံးလမ်း ၈ မိုင် စစ်ဆေးရေးဂိတ်၊ ပင်လုံမြို့အဝင် စစ်ဆေးရေးဂိတ်နှင့် မိုင်းနောင်–လဲချားလမ်းဆုံ စစ်ဆေးရေးဂိတ်တို့ကို ဖျက်သိမ်းထားသည်။

သို့သော် ၎င်းလမ်းပိုင်းရှိ အခြားစစ်ဆေးရေးဂိတ်များ နှင့် စက်သုံးဆီကန့်သတ်ချက်များကြောင့် သယ်ယူပို့ဆောင်ရေးကုန်ကျစရိတ် မြင့်မားနေဆဲဖြစ်ကြောင်း တောင်ကြီး–မိုင်းရှူးလမ်းပိုင်း ပြေးဆွဲနေသည့် ကားသမားတစ်ဦးက သျှမ်းသံတော်ဆင့်ကို ပြောသည်။

“ဂိတ်တွေကို အကုန်ဖျက်သိမ်းတာတော့ မဟုတ်သေးဘူး။ လဲချားဂိတ်၊ မိုင်းပွန်ဂိတ်နဲ့ ၄ မိုင်ဂိတ်တွေမှာ ပစ္စည်းတွေအလွယ်တကူ ဖြတ်လို့မရသေးဘူး။ ပိုက်ဆံတောင်းတာထက် ပစ္စည်းတွေကို သိမ်းရမလား၊ ဂိတ်မှာချထားခဲ့မလားဆိုပြီးပြောတာတွေ ရှိနေတုန်းပဲ။ အဲဒါကြောင့် ကားခဈေးကို လျှော့ဖို့ ခက်နေပါတယ်” ဟု တောင်ကြီး–မိုင်းရှူးလမ်းပိုင်း ပြေးဆွဲနေသည့် ကားသမားတစ်ဦးကပြောသည်။

ယခုအချိန်ထိ စစ်ကော်မရှင်မှ စက်သုံးဆီကို တစ်ပတ်လျှင် လီတာ ၉၀ သာ ကန့်သတ်ထုတ်ပေးသဖြင့် လမ်းကြောင်း တစ်ကြောင်းပြေးဆွဲရန် မလုံလောက်ဘဲ ပြင်ပပေါက်ဈေးဖြင့် ထပ်မံဝယ်ယူ အသုံးပြု နေရကြောင်း ၎င်းက ဆက်ပြောသည်။

တောင်ကြီးမြို့တွင် စက်သုံးဆီ တစ်လီတာ ၄၈၀၀ ကျပ်ခန့်ရှိသော်လည်း ကန့်သတ်ပမာဏ ကုန်လျှင် ကျပ် ၈,၀၀၀ဝန်းကျင်ဖြင့် ဝယ်ယူနေရပြီး မိုင်းရှူးတွင်လည်း တစ်လီတာ ၈၀၀၀ ကျပ် ဝန်းကျင်ရှိနေကြောင်း၎င်းကပြောသည်။

ထိုအခက်အခဲများကြောင့် ခရီးသည်များအတွက် ကားခများကို ပုံမှန်ဈေးနှုန်းထိ ပြန်လျော့ပေးရန် ခက်ခဲနေကြောင်း ဂိတ်မှူးတစ်ဦးကပြောသည်။

အဆိုပါ တောင်ကြီး – မိုင်းရှူးလမ်းပိုင်းတွင် စစ်ဆေးရေးဂိတ်များ ဖျက်သိမ်းထားသော်လည်း ကုန်ပစ္စည်းဈေးနှုန်းများမှာကျဆင်းခြင်းမရှိသေးကြောင်း မိုင်းရှူးမြို့ရှိ ကုန်စုံဆိုင်ပိုင်ရှင်တစ်ဦးက ပြောသည်။ 

“ဂိတ်တွေ ဖျက်သိမ်းတာတော့ မှန်တယ်။ကုန်တင်ပို့ခက နည်းနည်းကျလာတယ်။ စက်သုံးဆီဈေးလည်း အရင်ထက် ကျလာတယ်။ဒါပေမယ့် ကုန်ပစ္စည်းဈေးတွေ မကျသေးတော့ ရောင်းဝယ်ရေးက ခက်နေတုန်းပါပဲ”ဟု မိုင်းရှူးမြို့ရှိ ကုန်စုံဆိုင်ပိုင်ရှင်တစ်ဦးက ပြောသည်။

စစ်ဆေးရေးဂိတ် ဖျက်သိမ်းထားသော်လည်း ပြည်သူများ၏ သွားလာရေးနှင့် နေထိုင်မှု ကုန်ကျစရိတ်အပေါ် ထိရောက်သည့် အပြောင်းအလဲ မရှိသေးကြောင်း အသက် ၅၀ ဝန်ကျင် ခရီးသည် ဒေသခံအမျိုးသမီးတစ်ဦးက ဆက်ပြောသည်။

“ဂိတ်ဖျက်သိမ်းတာက အဲဒီလောက် ထိရောက်မှု မရှိသေးဘူး။ စစ်ဆေးကြမ်းတဲ့ ဂိတ်တွေ ရှိနေသေးတယ်။ ပြည်သူတွေအနေနဲ့ အရင်လို လမ်းခရီးသွားလာလို့ အဆင်ပြေတဲ့အခြေအနေကိုပဲ မျှော်လင့်တယ်။ကားခတွေလည်း သိသိသာသာ မကျသေးဘူး။ တောင်ကြီးကို ဆေးကုဖို့၊ ဆေးရုံပြဖို့ သွားရတဲ့သူတွေ အတွက် ကုန်ကျစရိတ်က များနေပါတုန်းပဲ” ဟုအသက် ၅၀ ဝန်ကျင် ခရီးသည် ဒေသခံအမျိုးသမီးတစ်ဦးက ပြောသည်။

စစ်ဆေးရေး ဂိတ်များကို ထပ်မံလျှော့ချ ဖျက်သိမ်းပေးရန် နှင့် စက်သုံးဆီကန့်သတ်ချက်များကို ဖြေလျှော့ပေးနိုင်လျှင်ကားခဈေးနှုန်းများ နှင့် ကုန်ပစ္စည်းဈေးနှုန်းများ လျော့ကျလာမည်ကို ပြည်သူများ နှင့် ကုန်သည်များက မျှော်လင့်နေကြောင်း သိရသည်။

တောင်ကြီး-ကျိုင်းတုံ-တာချီလိတ် ပြည်ထောင်စုလမ်းမကြီး၊ တောင်ကြီး-ဟိုပုံးလမ်းပိုင်းရှိ ၈ မိုင် စစ်ဆေးရေး ဂိတ်ကိုဖျက်သိမ်းပြီးနောက် ယင်းဂိတ်နေရာတွင် ပြုလုပ်ထားသည့် Slow Down အတားအဆီးများကိုလည်း ဖယ်ရှားထားပြီဖြစ်ကြောင်း သိရသည်။