သျှမ်းပြည် တောင်ပိုင်း ဆီဆိုင်မြို့နယ်ရှိ စစ်ကော်မရှင် လက်အောက်ခံ ပအိုဝ်းပြည်သူ့စစ် (PNO) စစ်ဆေးရေးဂိတ်များတွင် ကန့်သတ်ကုန်ပစ္စည်းများကို စစ်ဆေးတင်းကြပ်နေကြောင်း စုံစမ်းသိရသည်။

ဆီဆိုင်မြို့နယ်အတွင်း အခြေခံစားသောက်ကုန်များ ၊ ဆေးဝါးများ နှင့် စက်သုံးဆီများကိုသယ်ယူပို့်ဆောင်ရာာတွင် စစ်ကော်မရှင် လက်အောက်ခံ ပအိုဝ်းပြည်သူ့စစ် PNO များက သယ်ယူပို့ဆောင်ရန် ကန့်သတ်မှုများ ပြုလုပ် ထားကြောင်း သိရသည်။

ဆီဆိုင် – နောင်ထော်သွားသည့် လမ်းပိုင်းရှိ PNO စစ်ဆေးရေးဂိတ်များတွင် ကန့်သတ်ကုန်များကို စစ်ဆေးတင်းကြပ်ပြီး၊ ပစ္စည်းများကို သိမ်းယူမှုရှိနေကြောင်း ဆီဆိုင်မြို့နယ် အသက် ၄၀ ဝန်းကျင်ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“‌နောင်ထော်ကနေ ဆီဆိုင်ကို ဈေးလာသုံးရင် စားသောက်ကုန်တွေကို ဝယ်ပြန်ကြတယ်။စားသုံးဆီ ၃ ဘူးဝယ်လာရင် သူတို့က ၁ ဘူး မဟုတ်ရင် ၂ ဘူးယူတယ်။ပစ္စည်းတွေလည်း အများကြီး ဝယ်ပြန်လို့မရတာ။စက်သုံးဆီ ဒီဇယ်တွေကစ ဝယ်ပြန်လို့မရဘူး။ မထင်ရင်မထင်သလိုသိမ်းတက်သေးတယ်”ဟု ၎င်းအမျိုးသမီးကဆိုသည်။

အယခုကဲ့သို့ စက်သုံးဆီနှင့် ကုန်စည်စီးဆင်းမှုများကို PNO က ကန့်သတ်ရသည့် အကြောင်းအရင်းမှာ တော်လှန်ရေးအင်အားစုများထံ ရိက္ခာနှင့် စစ်ရေးအထောက်အပံ့များ မရောက်ရှိ စေရန် ရည်ရွယ်ချက်ဖြင့် ကန့်သတ်ထားခြင်းဖြစ်နိုင်ကြောင်း ဆီဆိုင်မြို့နယ် အသက် ၄၀ ဝန်းကျင်‌ဒေသခံ အမျိုးသမီးတစ်ဦးက ဆက်ပြောသည်။

“ဆီဆိုင်ဘက်မှာ တိုက်ပွဲဖြစ်တုန်းကလည်း ဆေးဝါးတွေ သယ်ရင် အကြောင်းအရင်း ခိုင်လုံမှ သယ်လို့ရတာ ၊ သယ်ဖို့အရမ်းခက်တယ်။ဒီနောင်ထော်ဘက် ပစ္စည်းတွေ ဆေးဝါးတွေ သယ်ပြန်ရင် သူတို့ မယုံတာလည်း ပါတယ်” ဟု ၎င်းကပြောသည်။

အဆိုပါ အခြေခံစားသောက်ကုန်များ၊ ဆေးဝါးများ နှင့် စက်သုံးဆီများကို သတ်မှတ်ထားသည့် ပမာဏအတိုင်း တင်ဆောင်သွင်းခွင့်ပြုပြီး သတ်မှတ်ထားသည့် စံနှုန်းကျော်လွန်သည့် ကုန်ပစ္စည်းများကို သိမ်းယူကြောင်း သိရသည်။

ဆီဆိုင်မြို့ မှ နောင်ထော်သွားသည့် လမ်းပိုင်းတလျှောက် စစ်ကော်မရှင် လက်အောင်ခံ ပအိုဝ်းပြည်သူ့စစ် (PNO) စစ်ဆေးရေးဂိတ် ၃ ဂိတ်ရှိကြောင်း ဒေသခံများကပြောသည်။