သျှမ်းပြည် တောင်ပိုင်း မိုင်းကိုင်မြို့ မှ သျှမ်းပြည် မြောက်ပိုင်း နမ့်လန်မြို့ကို သွားတဲ့ လမ်းမပေါ်ရှိသည့် SSPP/SSA စစ်ဆေးရေးဂိတ်များ ထပ်မံ ဖြုတ်သိမ်းဆုတ်ခွာရကြောင်း သတင်းရရှိသည်။

ပြီးခဲ့သည့် ရက်ပိုင်းအတွင်း မိုင်းကိုင် – နမ့်လန် ပြည်ထောင်စုလမ်းမကြီးပေါ်ရှိ ရှမ်းပြည်တိုးတက်ရေးပါတီ/ ရှမ်းပြည်တပ်မတော် SSPP/SSA စစ်ဆေးရေးဂိတ်ကို စစ်ကော်မရှင်တပ် က ဖိအားကြောင့် ထပ်မံ ဖြုတ်သိမ်းဆုတ်ခွာရကြောင်း စစ်ရေးသတင်းရင်းမြစ် တစ်ဦးက သျှမ်းသံတော်ဆင့်ကို ပြောသည်။

“ထိန်းချုပ်ထားနယ် မြေတစ်ခုလုံးမှာရှိတဲ့ တပ်တွေကို ဆုတ်ခွာရတာတော့ မဟုတ်ဘူး။ ကားလမ်မကြီးပေါ်မှာရှိတဲ့ ဂိတ်တွေလောက်ပဲ ဖယ်ပေးတာပါ။လမ်းမကြီးနဲ့ ကိုက် ၁၀၀၀ (၁.၆ ကီလိုမီတာခန့်) လောက်ပေါ့။”ဟု စစ်ရေးသတင်းရင်းမြစ် တစ်ဦးက ပြောသည်။

အလားတူပြီးခဲ့သည့် မတ်လ တတိယပတ်တွင် လားရှိုး – မူဆယ် ပြည်ထောင်စုလမ်းမကြီးပေါ်ရှိ SSPP/SSA နှင့် KIA တို့၏ စစ်ဆေးရေးဂိတ်များကို တရုတ်ဖိအားနှင့်အတူ ကိုးကန့်တပ်ဖွဲ့ MNDAA က ဖယ်ရှားခိုင်းခဲ့သည်။

မတ်လ ဒုတိယပတ်တွင်လည်း ရပ်စောက်နှင့် နောင်ချိုမြို့နယ်ကြား ပြည်ထောင်စုလမ်မကြီးပေါ်ရှိ SSPP/SSA စစ်ဆေးရေးဂိတ်အချို့ကို ဖယ်ရှားပေးရန် စစ်ကော်မရှင်တပ်က ဖိအားပေးခဲ့သည်။

ဖေဖော်ဝါရီလ ဒုတိယပတ်တွင်လည်း စစ်ကော်မရှင်တပ်နှင့် ၎င်းလက်အောက်ခံ ပအိုဝ်းပြည်သူ့စစ် (PNO) တို့က မိုင်းပွန်ဒေသရှိ SSPP/SSA တပ်စခန်းများကို ဆုတ်ခွာခိုင်းရာမှ စစ်ရေးတင်းမာမှုများ ဖြစ်ပွားခဲ့သည်။

စစ်ကော်မရှင်တပ်သည် ၂၀၀၈ အခြေခံဖွဲ့စည်းပုံ ဥပဒေ ကို မြဲမြံကိုင်စွဲပြီး၊ ပြည်ထောင်စုလမ်းမကြီးပေါ်ရှိ မည်သည့် လက်နက်ကိုင်တပ်ဖွဲ့ကိုမဆို ဖယ်ရှားခိုင်းမည်ဖြစ်ကြောင်း သျှမ်းနိုင်ငံရေး သမားတစ်ဉီးက သျှမ်းသံတော်ဆင့်ကိုပြောသည်။

“ စစ်တပ်ကတော့ ၂၀၀၈ဖွဲ့စည်းပုံဉပဒေကို ကိုင်စွဲနေမှာပဲ။ ဘယ်လက်နက်ကိုင်တပ်မဆို သူတို့ကို ပေးထားတဲ့နေရာမှာပဲ နေဖို့နဲ့ ပြည်ထောင်စုလမ်းမကြီးဘေးတလျှောက်ရောက်နေတဲ့တပ်တွေအားလုံး ဖယ်ဖို့ နည်းမျိုးစုံဖိအားနေမှာပဲ” ဟု ၎င်းကဆိုသည်။

မိုင်းကိုင် – နမ့်လန် ပြည်ထောင်စုလမ်းမကြီးတကြောတွင် ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) ၊ သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA) နှင့် စစ်ကော်မရှင်တပ်တို့ သွားလာလှုပ်ရှားမှု ရှိနေကြောင်းသိရသည်။