Thursday, April 18, 2024

မြန်မာ – ထိုင်းနယ်စပ် လေထုညစ်ညမ်းမှုကြောင့် ဒေသခံ ကျန်းမာရေး နှင့် စီးပွားရေးများ ထိခိုက်ရ

Must read

မြန်မာ – ထိုင်းနယ်စပ် တစ်လျှောက် လေထုညစ်ညမ်းမှုကြောင့် ဒေသခံများ၏ ကျန်းမာရေး နှင့် စီးပွားရေးများ ထိခိုက်မှု ရှိလာကြောင်း စုံစမ်းသိရသည်။

မြန်မာ-ထိုင်းနယ်စပ် ထိုင်းနိုင်ငံ​မယ်ဆိုင်မြို့

ယနေ့ (မတ်လ ၂၈) ရက်နေ့တွင် လေထုညစ်ညမ်းမှုကို စစ်ဆေးပေးသည့် အဖွဲ့ IQAir က သျှမ်းပြည် တာချီလိတ်မြို့နှင့် နယ်နမိတ်ချင်း ထိစပ်နေသည့် ထိုင်းနိုင်ငံ ချင်းရိုင်းခရိုင် မယ်ဆိုင်မြို့နယ်သည် လေထုညစ်ညမ်းမှု ပထမအဆင့် ဖြစ်နေကြောင်း ထုတ်ပြန်ပြောဆိုထားသည်။

ယင်းကဲ့သို့ လေထုညစ်ညမ်းမှု ပမာဏများပြား မှုကြောင့် မြန်မာ – ထိုင်းနယ်စပ် တစ်လျှောက်ရှိ ဒေသခံများ ကျန်းမာရေး ပြင်းထန်စွာ ထိခိုက်မှု ရှိသည့်အပြင် စီးပွားရေးများလည်း ထိခိုက်လာကြောင်း မယ်ဆိုင်ဒေသခံ နန်းဖောင်းက သျှမ်းသံတော်ဆင့်ကို ပြောသည်။

“အခုဆိုရင် အပြင်ထွက် ဈေးဝယ် ပစ္စည်းဝယ်ဖိုလည်းတော်တော်ကိုခက်ခဲတယ်။ဘာကြောင့်လဲ ဆိုရင် အပြင် ထွက်တာနဲ့ အသက်ရှုရခက်မှန်း တအား သိသာတယ်၊ မျက်စိတွေလည်းစပ်ပြီး အသားအရည်တွေလည်း ယားကျိကျိ ဖြစ်ကုန်တာ၊ စိတ်တွေလည်း ညစ်ပါတယ်၊ ဝင်ငွေရှာဖို့လည်း မဖြစ်နိုင်ဘူး” ဟု နန်းဖောင်း ပြောသည်။

မယ်ဆိုင် လေထုညစ်ညမ်းမှု အခြေအနေ

ထိုင်းနိုင်ငံ၏ ကျန်းမာရေးဆိုင်ရာ တာဝန်ရှိသူများ ထုတ်ပြန်ချက်အရ လေထုညစ်ညမ်းမှုနှုန်း အမြင့်ဆုံးကို ၁ မီတာကို ၅၀ Microgram (Mcg) အဖြစ် သတ်မှတ်ထားသော်လည်း ယနေ့တွင် လေထုညစ်ညမ်းမှုနှုန်းသည် ၆၀၀ Mcg အထိ သတ်မှတ်နှုန်းထက် ၁၀ ဆ မြှင့်တက်လာကြောင်း သိရသည်။

လက်ရှိတွင် ထိုင်းနိုင်ငံ ချင်းရိုင်းခရိုင် မယ်ဆိုင်မြို့အပြင် သျှမ်းပြည် တာချီလိတ်မြို့မှ ပြည်သူများလည်း လေထုညစ်ညမ်းမှု ဒဏ်ကို ခံစားနေရပြီး ကျန်းမာရေးပိုင်းဆိုင်ရာ ထိခိုက်မှုများ ရင်ဆိုင်ကြုံတွေ့နေရကြောင်း တာချီလိတ် ဒေသခံ စိုင်းစိုင်းက သျှမ်းသံတော်ဆင့်ကို ပြောသည်။

“ကျနော်တို့ တာချီလိတ်မှာဆိုရင် ပတ်ဝန်းကျင် တခုလုံး မှုန်ဝါးပြီးတော့ အသက်ရှုပ်ကြပ်တယ်၊ အိမ်ထဲမှာပဲ နေနေရင်တောင် ချောင်းဆိုး နှာချေတာတွေ ဖြစ်လာတယ်၊ တချို့က ချောင်းဆိုးရင် သွေးပါပါတယ်၊ ရောင်းဝယ်ဆိုလည်း အရင်ကလောက် မဖြစ်တော့ဘူး၊ ကုန်တွေလည်း မပို့ဖြစ် မသွင်းဖြစ်တော့ဘူးလေ၊ အရမ်းကို ခံရခက်နေပြီ” ဟု စိုင်းစိုင်းက ပြောသည်။

မြန််မာ-ထိုင်းနယ်စပ်ဂိတ် အခြေအနေ

လေထုညစ်ညမ်းမှုကြောင့် နှာစေး ချောင်းဆိုး ဖျားနှာသူများ လည်းရှိကြပြီး တချို့သည် ဆေးရုံတက်ရသည့် အထိ ဖြစ်ကြောင်း စိုင်းစိုင်းက ဆက်ပြောသည်။

ထို့အပြင် လေထုညစ်ညမ်းမှုကြောင့် တာချီလိတ် လေဆိပ်သို့ ဆင်းသက်မည့် လေယာဥ်များသည် လည်း ဆင်းသက်ခြင်း မပြုနိုင်ဘဲ နောက်ကြောင်း ပြန်လှည့်ရမှုလည်း ရှိနေကြောင်း ယမန်နေ့ (မတ် ၂၇)ရက်တွင် တာချီလိတ် လေဆိပ်မှ တာဝန်ရှိသူ တစ်ဦးက သျှမ်းသံတော်ဆင့်ကို ပြောသည်။

“ကျနော်တို့ မြေပြင်ကနေ အချက်ပြ မီးအနီရောင်နဲ့ ဆင်းသက်ဖို့ နေရာပြပေမယ့် လေထု ညစ်ညမ်းမှုက တအား ထူနေတော့ လေယာဥ်က မဆင်းနိုင်ဘူး ဖြစ်နေတယ်၊ ဆင်းဖို့နေရာကို အကြိမ်ကြိမ် လှည့်ပတ် မောင်းကြည့်ပြီး မရတဲ့ အဆုံး နောက်ကြောင်းကိုပဲ ပြန်လှည့်မောင်းသွားတယ်၊ အဲ့လို နောက်ကြောင်း ပြန်လှည့်မောင်းသွားတာက Air KBZ က ဟဲဟိုးမှာ ဆင်းတယ်၊ Air ThanLwin က ရန်ကုန်ကို ပြန်သွားဆင်းတယ်” ဟု ၎င်းက ဆိုသည်။

ယနေ့အချိန်ထိ တာချီလိတ်မြို့ရှိ လေဆိပ်သို့ လေယာဥ်မဆင်းနိုင်သည့်အတွဥ် ကျိုင်းတုံမြို့လေဆိပ်သို့ သွားရောက်စီးနေရကြကြောင်း တာချီလိတ်ဒေသခံအမျိုးသားတစ်ဦးက ပြောသည်။

သျှမ်းပြည် အတွင်း လေထုညစ်ညမ်းမှု အများဆုံး ခံနေရသည့် ဒေသအဖြစ် ကျိုင်းတုံမြို့နယ်၊ တာချီလိတ် မြို့နယ်၊ မိုင်းဖြတ်မြို့နယ်၊ မိုင်းဆတ်မြို့နယ် နှင့် မိုင်းတုံမြို့နယ်တို့မှ ဖြစ်ကြောင်းလည်း သိရသည်။

လေထုညစ်ညမ်းမှုကြောင့် ကျန်းမာရေးအတွက် ပြင်ဆင်ကာကွယ်မှုများ အနေဖြင့် Mask တပ်ခြင်း၊ အင်္ကျီလက်ရှည်ဝတ်ခြင်းတို့အပြင် အရေးကြီး ကိစ္စရပ်မဟုတ်ပါက အပြင်ထွက် သွားလာခြင်းမှာ မပြုကြရန်လည်း ကျန်းမာရေး အဖွဲ့က ထုတ်ပြန်ပြောဆိုထားသည်။

Leave a Comments

- Advertisement -spot_img

Latest article