ထိုင်းရောက် မြန်မာရွှေ့ပြောင်းအလုပ်သမားများသည် နိုင်ငံကူးလက်မှတ် PJ စာအုပ်ကို မြန်မာသံရုံးထံ ကိုယ်တိုင်သွားရောက် သက်တမ်းတိုးရာတွင် မကြာခဏ ရက်ရွှေ့မှုကြောင့် အခက်အခဲကြုံတွေ့နေရကြောင်း စုံစမ်းသိရသည်။
ပြီးခဲ့သည့် (ဖေဖော်ဝါရီ ၁၄) ရက်က မြန်မာသံရုံးမှ ထုတ်ပြန်ချက်အရ နိုင်ငံကူးလက်မှတ် PJ ကိုင်ဆောင်သူများ အနေဖြင့် ဖောဖော်ဝါရီလ ၁၃ ရက်တွင် အလုပ်လုပ်ကိုင်ခွင့် (work permit) သက်တမ်းကုန်သူများကို မေလ ၁၅ ရက်နေ့အထိ ဆက်လက်နေထိုင်ခွင့်ပြုမည်ဖြစ်ကြောင်း ကြေညာချက်ထုတ်ပြန်ထားသည်။
အဆိုပါ မြန်မာသံရုံးမှ ကြေညာလိုက်ပြီးနောက်ပိုင်း နိုင်ငံကူးလက်မှတ် PJ စာအုပ် ကိုင်ဆောင်ထားသည့် မြန်မာရွှေ့ပြောင်းအလုပ်သမားသည် ကိုယ်တိုင်သွားလုပ်ဆောင်ရန် ရက်ချိန်းတိုကင် မကြာခဏ ပြောင်းလဲခံနေရကြောင်း မြန်မာရွှေ့ပြောင်းအလုပ်သမား နန်းမွန်ခမ်း (အမည်လွှဲ) ကသျှမ်းသံတော်ဆင့်ကို ပြောသည်။
“ ကျမစာအုပ်က သက်တမ်းကုန်သွားလို့ ပထမတစ်ကြိမ် သက်တမ်းတိုးတဲ့အခါတုန်းက ကျမကို ၆ လပိုင်းမှာ သွားလုပ်ဖို့ရက်ချိန်းတယ်။ တကယ်တော့ သက်တမ်းကုန်တဲ့သူကို မေလ ၁၃ ရက်မှာ နောက်ဆုံးထား လုပ်ခိုင်းနေတာ။ ကျမလည်း မဖြစ်ဘူးဆိုပြီး ဒုတိယတစ်ခေါက်ထပ်သွားပါသေးတယ်။ ရုံးပိတ်ရက်ကြီး ထပ်ချိန်းပေးလိုက်တယ်။ အဲ့နေ့ သွားလုပ်တော့လည်း ရုံးပိတ်မို့လို့ ရုံးမဖွင့်ဘူးတဲ့။ သူတို့ကရက်ချိန်းပေးပြီးတော့ အခုလည်း မေလ ၃၁ ရက်မှ လာလုပ်ပါလို့ ချိန်းပြန်တယ် “ ဟု ၎င်းအမျိုးသမီးတစ်ဦးက ပြောသည်။
အဆိုပါ ရက်ချိန်းများ မကြာခဏ ပြောင်းလဲခြင်းကြောင့် အသွားအလာ ကုန်ကျစရိတ်လည်း ကုန်ကျများသည့်အပြင် အချိန်ကုန်ကျခြင်း၊ အလုပ်အကိုင် ပြတ်တောက်ခြင်း စသည့်ဖြင့် အခွင့်အရေးများလည်း ဆုံးရှုံးနေရကြောင်း ၎င်းက ဆက်ပြောသည်။
ထို့အပြင် မြန်မာသံရုံးမှ နောက်ဆုံးသတ်မှတ်ထားသော မေလ ၁၅ ရက်နေ့တွင် အချိန်မှီ သက်တမ်းမတိုးနိုင်ပါက ထိုင်း လ.ဝ.က ရုံးမှ တစ်ရက်ကို ဘတ် (၅၀၀) ဒဏ်ငွေရိုက်ခြင်း၊ မြန်မာရွှေ့ပြောင်းအလုပ်သမားရုံးမှ အချိန်မှီ သက်တမ်းမတိုးရသည့် စာအုပ်များကို တရားမဝင်စာအုပ်အဖြစ် သတ်မှတ်ပြီး ပယ်ချလုပ်ဆောင်သွားမည် ဖြစ်ကြောင်း ပတ်စပိုစ့်လုပ်ဆောင်ပေးသူ စိုင်းမိန်း (အမည်လွှဲ)က ပြောသည်။
“ သူတို့ကိုယ်တိုင်သွားလုပ်ရင် ပိုက်ဆံသိပ်မကုန်ဘူးလေ။ အရင်က ဘတ် ၈၀၀ ဘဲကုန်တယ်။ အခုမှ သံရုံးက ၁၂၅၀ ဘတ်ဆိုပြီး ဈေးတက်သွားတာ။ ပတ်စပိုစ့်ကိုယ်တိုင်သွားလုပ်တဲ့သူတွေက ပိုက်ဆံသိပ်မကုန်တော့ သံရုံးကလည်း တိုကင်နံပါတ်တွေ အဝေးကြီးချိန်းပေးလိုက်တယ်။ အဲ့မှာ အချိန်မှီမလုပ်နိုင်တော့ ထိုင်း လ.ဝ.က ရုံးက တစ်ရက်ကို ဘတ် (၅၀၀) ဒဏ်ငွေရိုက်ပြီး မြန်မာရွှေ့ပြောင်းအလုပ်သမားရုံးက တရားမဝင်စာအုပ်ဆိုပြီး ပယ်ချလိုက်တယ်။ အဲ့တာ ပိုက်ဆံများများမပေးလို့ လုပ်စားနေတာ “ ဟု စိုင်းမိန်းက ပြောသည်။
လက်ရှိ ချင်းမိုင်မြန်မာသံရုံး၌ နိုင်ငံကူးလက်မှတ်ကို ကိုယ်တိုင်သွားလုပ်နေသူသည် ဦးရေ (၂၀၀၀) ခန့်ရှိနေပြီး နိုင်ငံကူးလက်မှတ်ကို အချိန်မှီ သက်တမ်းမတိုးနိုင်မည်ကို စိုးရိမ်နေကြကြောင်း သိရသည်။
ပွဲစားထံမှ နိုင်ငံကူးလက်မှတ် သက်တမ်းတိုးလျှင် တစ်ယောက်လျှင် ဘတ် (၆၀၀၀)မှ (၇၀၀၀)အထိ ကုန်ကျသဖြင့် မြန်မာ့ရွှေ့ပြောင်းအလုပ်သမား တချို့က မလုပ်နိုင်ကြပေ။
အလားတူ မြန်မာရွှေ့အလုပ်သမားအရေးဆိုင်ရာ Women Worker For Justice Group အဖွဲ့အစည်းမှ တာဝန်ခံ နန်းစောရင် က “ ကိုယ်ကိုယ်တိုင် သွားလုပ်မယ်ဆိုရင်တော့ သူတို့ကိုရှင်းလင်းအောင် မေးရဲမှ ပြောရဲမှ ရတယ်။ မဟုတ်ရင် သူတို့က ရက်ချိန်းကို ခဏခဏပြောင်းတယ်။ ဒီလိုဖြစ်လာရင်တော့ ကျမတို့အဖွဲ့အစည်းကနေ ဆက်သွယ်လာခိုင်းပြီး ကျမတို့အဖွဲ့အစည်းကနေ ကူညီဖြေရှင်းပေးလို့ရတယ် “ ဟု ၎င်းက ပြောသည်။
ဒါ့အပြင် ထိုင်းနိုင်ငံရောက် မြန်မာရွှေ့ပြောင်းအလုပ်သမားသည် အချိန်ကာလ ၃ လ အတွင်း သက်တမ်းတိုးရမည့် အလုပ်သမား အရေအတွက် ၂ သန်းကျော် ရှိနေကြောင်း ထိုသို့ အချိန်မီ သက်တမ်း မတိုးပြီးနိုင်မည်ကို အလုပ်သမားများအနေဖြင့် စိုးရိမ်နေလျက်ရှိကြောင်း သိရသည်။