Sunday, May 26, 2024

ကျောက်မဲမြို့နယ်အတွင်း ဒေသခံများကို TNLA တပ်ဖွဲ့က လိုက်လံဖမ်းဆီးနေ

Must read

သျှမ်းပြည် ကျောက်မဲမြို့နယ်အတွင်း နေထိုင်သည့် ဒေသခံများကို တအာင်း (ပလောင်) အမျိုးသား လွတ်မြောက်ရေး တပ်မတော် TNLA တပ်ဖွဲ့က လိုက်လံ ဖမ်းဆီးနေကြောင်း သတင်းသိရသည်။

TNLA

ယမန်နေ့ မတ်လ ၂၈ ရက်နေ့ နံနက် ၂ နာရီခွဲဝန်းကျင်တွင် ကျောက်မဲမြို့နယ် ခိုမုန်းကျေးရွာအုပ်စု နမ့်ဟူးကျေးရွာ အတွင်းသို့ TNLA စစ်သားများ ဝင်ရောက်လာပြီး ရွာသားများကို ဖမ်းဆီးခေါ်ဆောင်သွားကြောင်း ဒေသခံများက သျှမ်းသံတော်ဆင့်ကို ပြောသည်။

“ခြံဝင်းထဲ ခုန်ဝင်ပြီး၊ နေအိမ်တံခါးတွေကို လိုက်ထုနေတယ်၊ တချို့ကလည်း ဝင်လို့ မရတော့ အပြင် ကနေ အော်ခေါ်တာ၊ ယောက်ျားလေးတွေကို စစ်သားတွေ လုပ်ရမယ် ဆိုပြီးတော့ ဖမ်းခေါ်သွားတယ်၊ စုစုပေါင်း ၇/၈ ယောက်လောက်ရှိမယ်” ဟု အမည်မဖော်လိုသူ ဒေသခံအမျိုးသား တစ်ဦးက သျှမ်းသံတော်ဆင့်ကို ပြောသည်။

အဆိုပါ နေ့တွင် ဖမ်းဆီးခံရသူ ၈ ယောက်ထက်မနည်း ရှိနေပြီး လူငယ်များအပြင် သက်ကြီး အမျိုးသားများ လည်း ဖမ်းဆီးခံရမှု ရှိနေကြောင်းလည်း သိရသည်။

ထို့အပြင် ကျောက်မဲမြို့နယ် တိလင်ရပ်ကွက် (ရပ်ကွက် ၉) ဘက်မှာလည်း TNLA စစ်သားများ ဝင်ရောက်ပြီး ဒေသခံများကို စစ်သားလုပ်ဆောင်ရန်အတွက် ဟုဆိုကာ အမျိုးသားများကို ဖမ်းဆီးခေါင်ဆောင်မှု ရှိခဲ့ကြောင်း လည်း အသက် ၅၀ကျော် အမျိုးသမီးတစ်ဦးက သျှမ်းသံတော်ဆင့်ကိုပြောသည်။

TNLA

“တိလင်ဘက်ကို နေ့ဘက်ရော ညဘက်ရော ဝင်တယ်၊ အစကတော့ ပလောင် (တအာင်း) ကိုပဲ ယူမယ်ဆိုပြီး တော့ မဆိုင်တဲ့သူတွေကိုလည်း ခေါ်သွားတယ်၊ အဲ့ဘက်မှာသျှမ်းတွေ အနေများတယ်လေ၊ တိလင်ဘက်က တော်တော်များများပါသွားတယ်၊ အတိအကျတော့ မသိရဘူး” ဟု ၎င်းအမျိုးသမီးက ဆိုသည်။

TNLA တပ်ဖွဲ့သည် ဒေသခံများကို စစ်သားသစ် စုဆောင်းရေးအတွက် ဖမ်းဆီးခြင်း ဖြစ်သည်ဟု သိရပြီး တအာင်း(ပလောင်) လူမျိုးများအပြင် သျှမ်းလူမျိုးများကိုလည်း ဖမ်းဆီးခေါ်ဆောင်မှု ရှိနေကြောင်းလည်း ဒေသခံများက ပြောသည်။

ထို့အပြင် ကျောက်မဲမြို့နယ်မှ အင်ကြင်းတောင်ဘက်ရှိ ဒေသခံများကိုလည်း တပ်သားသစ် အတွက် ဟု ဆိုကာ TNLA တပ်ဖွဲ့က ရွာသားများကို ဖမ်းဆီးခေါ်ဆောင်သွားကြောင်းလည်း သိရသည်။

ထို့အတူပင် ၂၀၂၂ ခုနှစ် ဖေဖော်ဝါရီမှ ဇူလိုင်လ အထိ ကျောက်မဲမြို့နယ်၊ လွယ်ကုံကျေးရွာအတွင်း TNLA တပ်သား သစ် စုဆောင်းမှုများကြောင့် ဒေသခံများသည် ထိုင်းနိုင်ငံဘက်ခြမ်းထိ ထွက်ပြေးနေရကြောင်း လည်း သတင်း သိရသည်။

ယင်းကဲ့သို့ ကျောက်မဲ မြို့နယ်အတွင်း TNLA တပ်ဖွဲ့မှ ဒေသခံများကို တပ်သားသစ် အတွက် ဖမ်းဆီးခေါ်ဆောင် မှုများ နှင့် ပတ်သက်ပြီး TNLA တပ်ဖွဲ့ကို ဆက်သွယ်မေးမြန်းသော်လည်း ပြောရေးဆိုခွင့် ခရီးလွန်နေသည့်အတွက် ဖြေကြားရန် မဖြစ်နိုင်ကြောင်း PSLF/TNLA ပြန်ကြားရေးက သျှမ်းသံတော်ဆင့်ကို ပြောသည်။

“စစ်ရေးတွေနဲ့ ပတ်သက်ပြီး ပြောဆိုပိုင်ခွင့်က ဗိုလ်မှူးကြီး တားအိုက်ကျော်ကိုပဲ လွှဲအပ်ပေးထားတာပါ၊ အခုက ပြောရေးဆိုခွင့်က ခရီးလွန်နေလို့ ၊ နောက် ၃ ရက်လောက်မှ ပြန်ရောက်မယ်၊ ဖြေကြားပေးဖို့ အဆင်မပြေပါဘူး” ဟု PSLF/TNLA ပြန်ကြားရေးက သျှမ်းသံတော်ဆင့်ကို ပြောသည်။

ပြီးခဲ့သည့် ဖေဖော်ဝါရီလ ၁ ရက်နေ့တွင် TNLA တပ်ဖွဲ့မှ တအာင်း (ပလောင်) လူမျိုးများကို အခွန်ကောက်ခြင်း၊ စစ်သားကောက်ခြင်းများ မပြုလုပ်ရန် SSPP/SSA တပ်ဖွဲ့ကို လိပ်မူပြီး တားမြစ် ထုတ်ပြန် ပြောဆိုမှု ရှိခဲ့သည်။

ယင်းကဲ့သို့ TNLA ၏ ထုတ်ပြန်ပြောဆိုချက်များ နှင့် ပတ်သက်ပြီး ရှမ်းပြည် တိုးတက်ရေးပါတီ၊ ရှမ်းပြည် တပ်မတော် SSPP/SSA တို့အနေဖြင့် နှစ်ဖက်တာဝန်ရှိသူများ တွေ့ဆုံပြီး ဆွေးနွေးညှိနှိုင်းဖို့ အစီအစဉ်ရှိကြောင်း သျှမ်းသံတော်ဆင့် ပြောဆိုထားသည်။

Leave a Comments

- Advertisement -spot_img

Latest article