တရုတ်နိုင်ငံထွက် အာလူးကို မြန်မာနိုင်ငံသို့ တင်သွင်းမှုဆိုသည့် သတင်းကြောင့် သျှမ်းပြည် အာလူးစျေးကွက် ပျောက်လာနိုင်ကြောင်း တောင်သူများက ပြောဆိုလိုက်သည်။
တရုတ်နိုင်ငံ ၊ ကမ်းစုဒေသထွက် အာလူးတန်ချိန် ၃၅၀ ကို မြန်မာနိုင်ငံသို့ တင်ပို့ရန်အတွက် တရုတ်အကောက်ခွန်ဌာနက စိစစ်ခွင့်ပြုလိုက်ပြီးဖြစ်ကြောင်း နိုဝင်ဘာ ၇ ရက်တွင် ပေါက်ဖော် လူမှုကွန်ရက်စာမျက်နှာ၌ ထုတ်ပြန်ရေးသားထားသည်။
စစ်အာဏာရှင်မှ တရုတ်နိုင်ငံထွက် အာလူးကို မြန်မာပြည်သို့ တင်ပို့ ရောင်းချပါက ပြည်သူတောင်သူ အာလူးစျေးကွက်များ ပျောက်ကွယ်လာနိုင်သည်။
သျှမ်းပြည်တောင်ပိုင်းသည် အာလူးအထွက်နှုန်းများပြားသည့် ဒေသဖြစ်သည့်အလျောက် တရုတ်ပြည်မှ စစ်အာဏာရှင်များ တန်ချိန်များစွာ အားလူးတင်သွင်းလာပါက ပြည်တွင်းအာလူးစိုက်ပျိုးထားသူများ၏ ဈေးကွက်သည် ပိုပြီး ခက်ခဲလာမည် ဟု အောင်ပန်းမြို့ အာလူးစိုက်ပျိုးသည့် အမျိုးသားတစ်ဦးက သျှမ်းသံတော်ဆင့်ကို ပြောသည်။
“ အခက်ခဲတွေအများကြီးရှိလာနိုင်တယ်။ တရုတ်ကဝင်လာတဲ့ အာလူးကို ဈေးက နိမ့်ပြီးရောင်းလို့ရတယ်။ ကျနော်တို့က အရင်းအနှီးကြီးနဲ့ စိုက်ထားရတယ်လေ။ ဈေးကွက်တွေပျောက်ဆုံးလာနိုင်တယ်။ ဈေးနှုန်းတွေ လုယူလာရနိုင်တယ်လေ” ဟု သျှမ်းတောင် အောင်ပန်းမြို့ အာလူးစိုက်ပျိုးတဲ့သူတစ်ဦးက ပြောသည်။
သျှမ်းတောင် အာလူးကိုစိုက်ပျိုးရန်အတွက် ၁ ဧဏလျှင် ကျပ် သိန်း ၃၀ မှ ၃၅ အထိ အရင်းအနှီးရှိသဖြင့် တရုတ်နိုင်ငံမှ တင်သွင်းသည့် အာလူးသည် စျေးနှုန်းအနည်းငယ်ဖြင့်ရောင်းပါက တောင်သူများအတွက် အရှုံးပေါ်လာနိုင်သည်။
“ အာလူးစိုက်ရင်တစ်ဧကကို ၃၅ သိန်းလောက်ကုန်တယ်။ တရုတ်ဘက်ကနေတင်လာတော့ ကျနော်တို့အတွက်က အရှုံးပေါ်တယ်။ အခုလည်းရောင်းတဲ့အချိန်ဖြစ်နေပြီ။ အရင်က တရုတ်ဘက်က မတင်သွင်းဘူးဆိုရင် ကျနော်တို့ တောင်သူတွေအတွက် အမြတ်အနည်းငယ်ကျန်ရှိသေးတယ်” ဟု အထက်ပါ သူက ပြောသည်။
အဆိုပါ တရုတ်နိုင်ငံဘက်မှ အာလူးများကို တင်သွင်းလာသောကြောင့် တောင်သူများက စစ်ကောင်စီသည် မလုပ်ဆောင်သင့်သော ဈေးကွက်ကို ဖော်ဆောင်ကြောင်း ပြောကြသည်။
တရုတ်နိုင်ငံသည် ကိုဗစ်- ၁၉ အကြောင်းပြချက်ဖြင့် မြန်မာနိုင်ငံမှ တရုတ်နိုင်ငံဘက်သို့ ကုန်တင်သွင်းမှုကို မကြာခဏ ပိတ်ဆိုင်းမှုပြုလုပ်ကာ မြန်မာပြည် ကုန်သည်များ၊ စိုက်ပျိုးရေးသမားများအခက်အခဲများစွာ ရင်ဆိုင်ခဲ့ရသည်။သက်ဆိုင်ရာ အစိုးရအနေဖြင့် မြန်မာပြည်သူများ၏ အခြေအေနကို ကြည့်ပြီး ကုန်သွယ်ရေးပိုင်းအဆင်ပြေအောင် တရုတ်အစိုးရနှင့် ညှိနှိုင်းဆောင်ရွက်ပေးသင့်ကြောင်း နမ့်ခမ်းမြို့ စိုက်ပျိုးရေး လုပ်ဆောင်သည့် အမျိုးသားတစ်ဦးက သျှမ်းသံတော်ဆင့်ကိုပြောသည်။
“ အရင်နှစ်ဆိုလည်း ကျနော်တို့ကြံတွေအများကြီး လွှင့်ပစ်ခဲ့ရတယ်။ တစ်ချို့ဖရဲသီးကုန်သည်တွေဆိုလည်း လမ်းမှာပစ်ရတယ်။ သူတို့ဘက်ကတင်သွင်းလာပြီးတော့ ကျနော်တို့ဘက် တင်သွင်းခွင့်ပိတ်ထားတယ်ဆိုတော့ တရားမျှတမှုမရှိဘူး” ဟု ၎င်းစိုက်ပျိုးရေးသမားက ဆိုသည်။
လက်ရှိအချိန်ထိလည်း တရုတ်နိုင်ငံဘက်မှ ကိုဗစ် ၁၉ ကြောင့် ကုန်တင်ပို့မှုကို ပိတ်ထားဆဲဖြစ်ကြောင်း သိရသည်။
“ တရုတ်တွေက လုပ်ချင်တိုင်းလုပ်တယ်။ ပိတ်ချင်ပိတ်တယ်။ ဖွင့်ချင်ဖွင့်တယ်။ ဒါကို ဒီဘက်က လူတွေက တောင်သူစျေးကွက်ကို မဖော်ဆောင်ဘဲ တရုတ်တွေကို အားပေးနေတယ်။ ကျနော်တို့ကို ဘာမှမငဲ့ညာဘူး” ဟု အထက်ပါ စိုက်ပျိုးရေးသမားက ဆိုသည်။
၂၀၂၀ ခုနစ်မှ စတင်ကာ တရုတ်နိုင်ငံဘက်မှ နယ်စပ်ကုန်သွယ်ရေးကို အတင်းအကြပ်ပြုလုပ်လာပြီး၊ မကြာခဏ ပိတ်ဆိုင်းမှုကြောင့် မြန်မာနိုင်ငံထွက်ကုန် ကြံ၊ဖရဲသီးနှင့် ပြောင်းဖူးတွေ အများအပြားစွန့်ပစ်လိုက်ရသည်။
