Saturday, July 13, 2024

နောင်ချို စစ်ဘေးရှောင် ၃၀၀၀ ကျော် နေရာထိုင်ခင်းနှင့် စားနပ်ရိက္ခာအကူအညီ အရေးပေါ်လိုအပ်

Must read

သျှမ်းပြည် နောင်ချိုမြို့နယ်တွင် တကျော့ပြန် တိုက်ပွဲအတွင်း ထွက်ပြေးတိမ်းရှောင်နေရသည့် စစ်ဘေးရှောင် ၃၀၀၀ ကျော်အတွက် စားနပ်ရိက္ခာ အရေးပေါ်လိုအပ်နေကြောင်း စုံစမ်းသိရသည်။

သင်္ကြန်ကာလ ဧပြီ ၁၄ ရက်တွင် ပြင်ဦးလွင် စစ်တက္ကသိုလ်ကို မန္တလေး-PDF တပ်ဖွဲ့က ရှော့တိုက်ဒုံးဖြင့် ပစ်ခတ်တိုက်ခိုက်ခဲ့ပြီးနောက် ပြင်ဦးလွင်နှင့် နောင်ချိုအကြားရှိ ကျေးရွာများကို စစ်ကောင်စီတပ်က လက်နက်ကြီး ပစ်ခတ်မှုနှင့် လေကြောင်းဗုံးကြဲ တိုက်ခိုက်မှု အပြင်းအထန် ပြုလုပ်ခဲ့သည်။

ယခုဖြစ်ပွားနေသည့် စစ်ကောင်စီတပ်နှင့် မန္တလေး-PDF တပ်ဖွဲ့တို့၏ တကျော့ပြန်တိုက်ပွဲအတွင်း သျှမ်း-မန္တလေးနယ်စပ် နောင်ချိုမြို့နယ်အတွင်းရှိ ကျေးရွာ (၃၀) ကျော်မှ ဒေသခံပြည်သူ ၃၀၀၀ ကျော် ထွက်ပြေးတိမ်းရှောင်နေရပြီး နေရာထိုင်ခင်းနှင့် စားနပ်ရိက္ခာ အရေးပေါ် လိုအပ်နေကြောင်း နောင်ချိုဒေသခံများက ပြောသည်။

“ရွာလုံးကျွတ် ထွက်ပြေးရတော့ အစားအသောက် ခက်ခဲတယ်၊ တော်တော်ဒုက္ခရောက်တယ်။ တိုက်ပွဲကြားကနေ ထွက်ပြေးလာရတော့ စားစရာလည်း ဘာမှ မယူလိုက်ရဘူး။ တချို့ဆို အဝတ်တစ်ထည် ကိုယ်တစ်ခုနဲ့ ထွက်လာရတာ။ လူအများကြီး ဆိုတော့ စားရေးသောက်ရေး အဆင်မပြေဘူး၊ အခုထိ ကူညီတဲ့လူ မရှိသေးဘူး”ဟု နောင်ချိုမြို့နယ် အင်းဝိုင်းကျေးရွာသို့ ထွက်ပြေးတိမ်းရှောင်လာရသည့် စစ်ဘေးရှောင် အမျိုးသမီးတစ်ဦးက ပြောသည်။

ဧပြီလ ၂၀/၂၁ ရက်တို့တွင် ပြင်ဦးလွင်မြို့ ကာကွယ်ရေးအတွက် အရေးပါပြီး မန္တလေး-PDF တပ်ဖွဲ့က သိမ်းပိုက်ထားသည့် နောင်ချိုမြို့နယ် သရက်ကုန်းကျေးရွာရှိ တပ်စခန်းကို ပြန်လည်ရရှိရေးအတွက် စစ်ကောင်စီတပ်မှ လေကြောင်းဖြင့် ထပ်မံဗုံးကြဲတိုက်ခိုက်ခဲ့သည်။

၎င်းလေကြောင်းတိုက်ခိုက်မှုအတွင်း အမျိုးသမီး ၂ ဦး အပါအဝင် စုစုပေါင်း ၄ ဦး သေဆုံးခဲ့ပြီး ဘုန်းကြီးကျောင်းနှင့် ပြည်သူနေအိမ် အများအပြား ထိခိုက်ပျက်စီး၍ သရက်ကုန်း၊ ကံ့ကော်၊ ဇာလီဖြူချောင်၊ ပါဟက်၊ ဆီဆုံ၊ ပန်ခံ၊ နားပျန်၊ ညောင်ကုန်း စသည့် ကျေးရွာပေါင်း (၃၀) ကျော်မှ ဒေသခံပြည်သူများ ထွက်ပြေးတိမ်းရှောင်နေရသည်။

“အင်းဝိုင်းဘက်ကို ရောက်လာတာဆိုရင် တချို့က နေစရာမရှိလို့ မိုးကာလေးနဲ့ တဲထိုးပြီး နေရတာ။ ကျမတို့ဆိုရင် အခုတိုက်ပွဲထပ်ဖြစ်တော့ ဒုတိယတစ်ခေါက် ထပ်ပြေးရတာ။ အများစုကတော့ အမျိုးသမီးနဲ့ ကလေးငယ်တွေ များတယ်။ တချို့စစ်ရှောင်တွေလည်း ကြံတင်တဲ့ ကားပေါ်တို့၊ ကားအောက်ပိုင်းတို့မှာ အိပ်နေရတာ”ဟု နောင်ချိုမြို့နယ်မှ ၎င်းစစ်ဘေးရှောင် အမျိုးသမီးက သျှမ်းသံတော်ဆင့်ကို ဆက်ပြောသည်။

လက်ရှိတွင် နောင်ချိုမြို့နယ်အတွင်းရှိ စစ်ဘေးရှောင်များမှာ ပြည်ထောင်စုလမ်းမကြီး အရှေ့ဘက်ရှိ ဘန့်ဘွေးဘုန်းကြီးကျောင်းနှင့် ကျေးရွာထဲတွင် ၁၀၀၀ ဦးခန့်၊ အင်းဝိုင်းဘုန်းကြီးကျောင်းနှင့် ဆွေမျိုးများအိမ်တွင် ၈၀၀ ကျော်၊ ကုန်းလုံ ဘုန်းကြီးကျောင်းတွင် ၃၀၀ နီးပါး ခိုလှုံနေရပြီး ဝက်ဝံ၊ ခြေမြစ်ပင်၊ သဲသိုက်နှင့် အခြားကျေးရွာများသို့ စုစုပေါင်း ၃၀၀၀ ကျော် ထွက်ပြေးတိမ်းရှောင်နေရကြောင်း စစ်ဘေးရှောင်ကူညီသူများထံမှ သိရသည်။

“စစ်ဘေးရှောင်က တစ်ရွာကို အနည်းဆုံး ရွာသား ၅၀၀ ကျော် ရှိကြတော့ ပြောရရင် ထောင်ဂဏန်း ထွက်ပြေးနေရတာပေါ့။ နောက်ပြီးတော့ အခုက ကြံခုတ်ရာသီဆိုတော့ အောက်ပြည်လာတဲ့ အလုပ်သမားတွေလည်း ရှိတော့ သူတို့လည်း အိမ်ရှင်နဲ့ လိုက်ပြီး ထွက်ပြေးရတာပေါ့၊ အဲ့လို အခက်အခဲတွေလည်း ရှိတယ်”ဟု နောင်ချိုမြို့နယ်မှ စစ်ဘေးရှောင်ကူညီပေးနေသူ ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

ယမန်နေ့ (ဧပြီလ ၂၃ ရက်) ည ၁၀ နာရီခန့်တွင်လည်း စစ်ကောင်စီတပ်မှ လေကြောင်းဗုံးကြဲ တိုက်ခိုက်မှု ထပ်မံပြုလုပ်ခဲ့ပြီး စစ်ကောင်စီတပ်က ပွဲကောက်နှင့် ကျောက်မဲလေးကျေးရွား တကြောတွင် နေရာယူတပ်စွဲထားကြောင်း ဒေသခံများထံမှ သိရသည်။

အလားတူ စစ်ကောင်စီတပ်နှင့် မန္တလေး-PDF တပ်ဖွဲ့တို့သည် သျှမ်း-မန္တလေးနယ်စပ် ပြင်ဦးလွင်နှင့် နောင်ချိုမြို့အကြားတွင် မတ်လ ၂၇ ရက်နေ့နောက်ပိုင်း နေ့စဉ်နီးပါး တိုက်ပွဲဖြစ်ပွားလျက်ရှိကြောင်း နောင်ချိုဒေသခံများက ပြောသည်။

Leave a Comments

- Advertisement -spot_img

Latest article