သျှမ်းပြည် ဆီဆိုင်မြို့သို့ နေရပ်ပြန်သွားသည့် စစ်ရှောင်လင်မယား ၂ဦးကို ပအိုဝ်းပြည်သူ့စစ် (PNO) က သေနတ်ဖြင့် လိုက်ပစ်သဖြင့် အမျိုးသမီးက ပွဲချင်းပြီးသေဆုံးခဲ့ကြောင်း စုံစမ်းသိရသည်။
ဖြစ်စဉ်မှာ ယမန်နေ့ (ဧပြီလ ၁၀)ရက် နံနက် ၆ နာရီအချိန်တွင် စစ်ဘေးရှောင် လင်မယားဖြစ်သည့် ဒေါမူနှင့် ဦးယောင်တို့ နှစ်ဦးသည် စစ်ဘေးရှောင်နေရာမှ နောင်သိမ်ရွာသို့ ပြန်နေစဉ် တောလမ်းတစ်နေရာ၌ PNO စစ်ကြောင်းနှင့်တိုးပြီး သေနတ်ပစ်ခတ်ခံခဲ့ရာ ဇနီးဖြစ်သူဒေါမူ သေဆုံးသွားခဲ့ကြောင်း ဖြစ်စဉ်ကိုသိရှိသူတစ်ဦး က သျှမ်းသံတော်ဆင့်ကိုပြောသည်။
“ပြီးခဲ့တဲ့ ဧပြီလ ၈ ရက်က မြို့တပ်ထဲကနေ စစ်ကောင်စီက လက်နက်ကြီး၊ တင့်ကားတွေနဲ့ နောင်သိမ်ရွာထဲကို ပစ်တာ။ အဲ့နေ့ကတည်းက သူတို့လင်မယားစစ်ရှောင်လာခဲ့တာ။ မနေ့ကမှ ရွာပြန်မယ်ဆိုပြီး စစ်ရှောင်နေရာ ကနေ ရွာကိုပြန်အလာ တောလမ်းတစ်နေရာမှာ စစ်ကောင်စီလက်အောက်ခံ ပအိုဝ်းပြည်သူ့စစ် PNO စစ်ကြောင်းနဲ့တိုးပြီး ပစ်သတ်ခံရတာ။ သူ့ယောက်ျားကတော့ လွတ်တယ်” ဟု ၎င်းကပြောသည်။
အဆိုပါ သေဆုံးသူအလောင်းကို ၃ နာရီကြာမှ ပူးပေါင်းတော်လှန်ရေး အင်းအားစုတပ်ဖွဲ့က သွားယူဆောင်ပေးပြီး အလောင်းကိုပြန်ရခဲ့ကြောင်း သိရသည်။
အလားတူ ဧပြီလ ၈ ရက်တွင်လည်း ဆီဆိုင်မြို့နယ် တွေပူးကျေးရွာအတွင်း ရေခပ်ရန်သွားသည့် ကျောင်းသူ ၃ ဦးသည် လမ်းပေါ်မှာသွားလာနေစဉ် စစ်ကောင်စီ၏ လက်နက်ကြီး ကျရောက်ပေါ်ကွဲမှုကြောင့် ၁ ဦးသေဆုံးပြီး ၂ ဦး ဒဏ်ရာရရှိခဲ့သည်။
ထို့အပြင် ဖေဖော်ဝါရီလ ၁၉ ရက်တွင်လည်း ဆီဆိုင်မြိုသို့ နေရပ်ပြန်ပြီး ပစ္စည်းသယ်ယူကြသည့် စစ်ရှောင်များသည် မွေတော်ဘုရားအရှေ့ဘက်ရှိ ဝါးတောရွာမြောက်ဘက်မှာ ရောက်ရှိနေစဉ် စစ်ကောင်စီ လက်နက်ကြီး ကျရောက်ပေါက်ကွဲမှုကြောင့် ၇ ဦးသေဆုံးခဲ့သည်။
လက်ရှိ ဆီဆိုင်မြို့တွင် နှစ်ဖက်တပ်ဖွဲ့ကြား တိုက်ပွဲဆက်လက်ဖြစ်ပွားနေသေးသောကြောင့် ဒေသခံများအနေဖြင့် မြို့တွင်းသို့ ဝင်ရောက်ခြင်း မပြုကြရန်လည်း ပအိုဝ်းအမျိုးသားလွတ်မြောက်ရေး တပ်မတော် PNLA က တိုက်တွန်းထားသည်။
Leave a Comments