သျှမ်းပြည်မြောက်ပိုင်း ကျောက်မဲမြို့ နိုဝင်ဘာ ၈ ရက် ခရိုင်ရဲတပ်ဖွဲ့ ဗုံးပေါက်ကွဲမှုဖြစ်စဥ်သည် စစ်ကောင်စီလက်အောက် ရဲတပ်သားများ ပါဝင်ပတ်သက်နေသည် ဟု စုံစမ်းသိရသည်။
အဆိုပါ ဗုံးပေါက်ကွဲမှုတွင် ရဲတပ်သား (၂)ဦး ထိခိုက်ဒဏ်ရာရရှိခဲ့ပြီး၊ ကျောက်မဲမြို့နယ် အတွင်း နယ်မြေလုံခြုံမှုမရှိသည်ကိုပြသချင်သည့် သဘောဖြင့် ပြုလုပ်ခြင်းဖြစ်သည် ဟု ရဲတပ်ဖွဲ့နှင့် နီးစပ်သည့်အသိုင်းအဝန်းက ပြောသည်။
စစ်ကောင်စီ လက်အောက်ခံရဲတပ်သားများကို လက်ရှိ နိုင်ငံရေး ပဋိပက္ခဖြစ်ပွားသည့် နယ်မြေသို့ပြောင်းရွှေ့ရန် အမိန့်ကျလာတိုင်းမှာ ယခုကဲ့သို့ ဗုံးပေါက်ကွဲမှုကို ပြုလုပ်ခဲ့သည်။
ယခုနှစ် အောက်တိုဘာ ၅ရက် ည (၉)နာရီတွင်လည်း ကျောက်မဲမြို့ ခရိုင်ရုံးတွင် ဗုံးပေါက်ကွဲမှုတစ်ကြိမ်ဖြစ်ခဲ့ဖူးသည်။
“ အဲဗုံးပေါက်ကွဲတာက သူတို့ ဖန်တီးပြီးလုပ်တာ။ ဘာလို့လဲဆိုတော့ သူတို့က အခု စစ်ကိုင်းတို့ တိုက်ပွဲဖြစ်တဲ့ နေရာကို မပြောင်းချင်ဘူးလေ။ အဲကြောင့်အခု ဒီမြို့မှာလဲ ငြိမ်းချမ်းမှုမရှိဘူးလို့ ပြချင်တာ။ ဒီလိုတော့ပြပြီးတော့ မပြောင်းရအောင်လို့ လုပ်ကြတာပေါ့” ဟု ရဲနှင့်နီးစပ်သည့် အမျိုးသားတစ်ဦးက သျှမ်းသံတော်ဆင့်ကို ပြောသည်။
ထို့ကြောင့် သက်ဆိုင်ရာ အထက်မှ အမိန့်တခုခုကျလာတိုင်းမှာ ကျောက်မဲမြို့အတွင်း ဗုံးပေါက်ကွဲမှု နှင့် သေနတ်ပစ်ဖောက်မှုများပြုလုပ်လေ့ရှိသည်။
ထို့အပြင် ယခုလ (နိုဝင်ဘာ ၉)ရက် မွန်လွဲပိုင်း ဗုံးပေါက်ကွဲမှု အပြီးတွင်လည်း လူငယ် (၂)ဦးကို စစ်ကောင်စီ ဘက်တော်သားများက ကွင်ဆင်ဖမ်းဆီးမှုများပြုလုပ်ခဲ့သည်။
“ လူငယ် ၂ ယောက် ဖမ်းဆီးခံရတာတော့ဟုတ်တယ်။ ဘယ်သူလဲ၊ ဘယ်ရပ်ကွက်မှာနေလဲဆိုတာတော့ မသိဘူး။ ဗုံးပေါက်ကွဲမှုနဲ့လည်း သက်ဆိုင်မှုတော့ ရှိမရှိတော့မသိဘူး” ဟု ကျောက်မဲမြို့ အသက် ၅၀ ဝန်ကျင်းအမျိုးသားတစ်ဦးက ပြောသည်။
ဖမ်းဆီးခံရသည့် လူငယ်၂ ဦးသည် စစ်ကောင်စီက မန္တလေးသို့ ပစ္စည်းတင်ပို့သည့် ကား စစ်ဆေးပြီး မသင်္ကာသည့် အထုတ်တွေ့ရှိသောကြောင့် ထိုအထုတ်ပိုင်ရှင်ကိုဖုန်းဆက်ခေါ်ပြီး ဖမ်းဆီးလိုက်ကြောင်း ကျောက်မဲမြို့ဒေသခံတစ်ဦးက ပြောသည်။
“ အဲနှစ်ယောက်ကို တစ်ယောက်ကိုတော့ ဖုန်းဆက်ခေါ်ပြီးတော့ ပစ္စည်းရောက်တယ်ဆိုပြီးတော့ ဖမ်းခေါ်လိုက်တာတဲ့။ ကျန်တဲ့တစ်ယောက်တော့ ကျောက်မဲမြို့ထဲမှာလာဖမ်းခေါ်သွားလို့ကြားတယ်။ ကျနော်တို့လည်း အသေးစိတ်တော့မသိရသေးဘူး။ သူတို့က မန္တလေးကို ပစ္စည်းကို ပို့ရင်နဲ့ ကားကလမ်းမှာ စစ်ဆေးခံရပြီးတော့ မသင်္ကာလို့ဆိုပြီးတော့ ဖမ်းဆီးသွားတယ်” ဟု ကျောက်မဲမြို့ ဒေသခံတစ်ဦးက ပြောသည်။
လက်ရှိမှာ ကျောက်မဲမြို့အတွင်း ကွမ်းယာဆိုင်၊ တံမြက်စည်း၊ ဖျာ နှင့် စောင်များ လာရောက် လှည့်ပတ်ရောင်းသူများလာကြောင်းလည်း ကျောက်မဲဒေသခံ အသိုင်းအဝန်းက ပြောပြလာသည်။
“ ကျောက်မဲမြို့မှာ ကွမ်းယာဆိုင်တွေ၊ တံမြက်စည်းရောင်းတဲ့သူတွေ များလာတယ်။ တစ်ခြားမြို့ကသူတွေလည်း လာနေထိုင်တာ များလာတယ်။ လမ်းမှာသွားလာပြီးရောင်းနေတဲ့သူတွေကလည်း စစ်ကောင်စီက လူတွေပါပဲ ။ သူတို့လွတ်ထားတဲ့သူတွေဖြစ်တယ်။ ကျောက်မဲက ခရိုင်မြို့ဖြစ်တော့ သူတို့က လုံခြုံရေးကို တင်းကြပ်စွာနဲ့ စောင့်ကြည့်နေတာပေါ့ “ဟု ကျောက်မဲမြို့တွင်း နေထိုင်သည့် အမျိုးသမီး တစ်ဦးက ပြောသည်။
လက်ရှိကျောက်မဲမြို့နယ်ထဲတွင် နိုင်ငံရေးနှင့်တက်ကြွလှုပ်ရှားသူ ၆ ဦး ဖမ်းဆီးခံထားရပြီး သံသယဖြင့် ၁၀ ဦးဝန်းကျင်က ဖမ်းဆီးခံထားရကြောင်းသိရသည်။
Leave a Comments