သျှမ်းပြည်တောင်ပိုင်း တောင်ကြီးမြို့ နှင့် လွိုင်လင်မြို့တွင် မိုးသည်းထန်စွာ ရွာသွန်းမှုကြောင့် အနိမ့်ပိုင်းရှိ နေအိမ်တချို့ ရေကြီးရေလျှံပြီး ပျက်စီးမှုများ ရှိနေကြောင်း စုံစမ်းသိရသည်။

တောင်ကြီးမြို့ ယမန့်နေ့ ည (၈ ) နာရီခွဲ မှ စတင်ကာ မိုးသည်းထန်စွာ ရွာသွန်းသဖြင့် အနိမ့်ပိုင်းရှိ နေအိမ်တချို့ ရေဝင်ပြီး၊ တချို့နေအိမ်ခြံတံခါးများ ပျက်စီးမှုများလည်း ရှိကြောင်း တောင်ကြီးဒေသခံ အမျိုးသမီးတစ်ဦးက သျှမ်းသံတော်ဆင့် ကို ပြောသည်။

“မနေ့ညက မိုးသည်းထန်ရွာတော့ လမ်းမကြီး (မိန်းလမ်း) အနိမ့်ပိုင်းရှိတဲ့ အိမ်ထဲရေဝင်တယ်။ လမ်းတွေပြိုကျ၊ အိမ်ခြံဝန်းတွေ တံခါးတွေပြိုကျတယ်” ဟု ၎င်းအမျိုးသမီးက ပြောသည်။

ယခင်က တောင်ကြီးမြို့ပေါ်ရှိ ရေမြောင်းများကို မြို့နယ်စည်ပင်များက ဖြေရှင်းပေးနေသော်လည်း စစ်အာဏာ သိမ်းပြီးနောက်ပိုင်း မြို့နယ်စည်ပင်များက ရေမြောင်းများကို လာရောက်ဖြေရှင်းပေးမှုမရှိသောကြောင့် အနိမ့်ပိုင်းရှိ နေအိမ်တချို့များ ရေကြီးဒဏ်ကို ကြုံတွေ့နေရကြောင်း တောင်ကြီးဒေသခံ လူငယ်တစ်ဦးက သျှမ်းသံတော်ဆင့်ကို ပြောသည်။

“ အရင်နှစ်တွေက အဲ့လောက်ရေမကြီးဘူး ၊ တချို့မြောင်းတွေလည်း အမှိုက်ပိတ်လို့ ရေမြောင်းတွေကို မရှင်းလို့ပါ။ အရင်ဆို မြို့နယ်စည်ပင်က ရေမြောင်းတွေ လာရှင်းပေးနေကြလေ၊ အခု သူတို့က ရေမြောင်းတွေကို မလာရှင်းသေးတာပါ “ ဟု ၎င်းလူငယ်တစ်ဦးက ပြောသည်။

အဆိုပါ မိုးများ သည်းထန်စွာ ရွာသွန်းပြီးလျှင် ရေးကြီးရေလျှံဒဏ်ကို အဓိက ခံစားရသော ပြည်တော်သာရပ်ကွက် ၊ ညောင်ဖြူစခန်းရပ်ကွက် နှင့် ဦးကြီးခမ်း ရပ်ကွက်ရှိ အနိမ့်ပိုင်း နေအိမ်များ ရေကြီးဒဏ် ကြုံတွေ့ရကြောင်း သိရသည်။

အလားတူ လွိုင်လင်မြို့ ယမန်နေ့ (သြဂုတ် ၆) ရက် ညတွင် မိုးသည်းထန်ရွာသွန်းပြီး ရေကြီးရေလျှံသောကြောင့် တောင်ပေါ် ရေစီးအားကြောင့် တချို့အိမ်တွင် အုတ်တံတိုင်းများ ပြိုကျမှုရှိကြောင်း လွိုင်လင် ဒေသခံ အမျိုးသားတစ်ဦးက ပြောသည်။

“ မုန်တိုင်းကြောင့်ထင်တယ်ဗျ။ ရွာလိုက်တိတ်လိုက် နဲ့ ရေကတော့ တစ်ဝက်ပဲကျသေးတယ်ဗျ၊ ပါကေးခင်းထားရင် ရေကြောင့် ဖောင်းပွလာတယ်။ အောက်ထပ်ရေဝင်လို့ ကြမ်းခင်းတွေပျက်စီးတယ်။ နှစ်ထပ်တိုက်ဆို အပေါ်တက်အိပ်ရတယ်။ တချို့အိမ်အုတ်တံတိုင်းတွေ ပြိုကျတယ် “ ဟု ၎င်း အမျိုးသားတစ်ဦးက ပြောသည်။

ယခုနှစ် မိုးရာသီကာလအတွင်း တောင်ပေါ်ဒေသများတွင် ရေကြီးရေလျှံမှုများဖြစ်ပွားမှုကို စတင်ကြုံတွေ့နေရသည်။

ထိုကဲ့သို့ ရေကြီး၊ ရေလျှံမှုဖြစ်ခြင်းသည် တောတောင်များ သစ်ပင်များဖြုန်းတီးလာခြင်း၊ တောင်များကို ဖြိုကာ မြေကွက်ရိုက်ရောင်းချခြင်းနှင့် ရေမြောင်းများ စီမံခန့်ခွဲမှု အားနည်းခြင်းတို့ကြောင့် ဖြစ်သည်ဟု သဘာဝပတ်ဝန်းကျင်ထိန်းသိမ်းရေး လုပ်ဆောင်နေသူများက ပြောဆိုလိုက်သည်။