မိုင်းကိုင်လယ်ယာဧက ၅၀ ရာခိုင်နှုန်း မစိုက်ပျိုးနိုင်

0

သျှမ်းပြည်တောင်ပိုင်း မိုင်းကိုင်မြို့နယ်အတွင်း နိုင်ငံရေး မတည်ငြိမ်မှုများကြောင့် လယ်ယာဧက ၅၀ ရာခိုင်နှုန်း မစိုက်ပျိုးနိုင်ကြောင်း သတင်းရရှိသည်။

မြန်မာနိုင်ငံတွင် စစ်အာဏာသိမ်းပြီးနောက်ပိုင်း စီးပွားရေး ကျဆင်းလာကာ ကုန်ပစ္စည်းများ ၊ မြေသြဇာများ အဆမတန် မြင့်တက်လာသည့် အတွက် စပါးစိုက်ပျိုးရန် စားရိတ်များလာမှုကြောင့် တောင်သူလယ်သမားများ ခက်ခဲလာရသည်။

ထို့အပြင် နိုင်ငံရေး မတည်ငြိမ်မှုများ ဖြစ်လာချိန်မှစ၍ စစ်သားစုဆောင်းမှုများ၊ ဖမ်းဆီးမှုများ ကြောင့် ယခင်က စပါးစိုက်ပျိုးရာသီတွင် မစိုက်နိုင်သလို နိုင်ငံခြားသို့ ထွက်ပြေးတိမ်းရှောင်ပြီး လယ်ယာပေါင်း ဧက (၅၀) ရာခိုင်နှုန်း ပျက်စီးနေကြောင်း မိုင်းကိုင်လယ်သမား အမျိုးသားတစ်ဦးက သျှမ်းသံတော်ဆင့်ကို ပြောသည်။

“ကျနော်တို့ မိုင်းကိုင်ပြည်သူတွေ ခေတ်အဆက်ဆက် ခံလာရပြီးပြီ၊ အခုခေတ်ရောက်လာတော့ ပိုးဆိုးလာတယ်။ အစကတည်းက ကျနော်တို့ စားဝတ်နေရေး ၊ စီးပွားရေးကျဆင်းနေပြီးသား အခုက ဒီလိုဖြစ်လာတော့ ပိုထိခိုက်လာတယ်။ လယ်ယာဧက ၃ ဆရှိရင် တစ်ဝက်လောက်က လယ်ယာမလုပ်တော့ဘူး ။ လယ်ယာတွေ (၅၀) ရာခိုင်းနှုန်းကျော်က ပျက်စီးနေတယ်“ ဟု ၎င်းလယ်သမားတစ်ဦးက ပြောသည်။

လယ်ယာများ ပျက်စီး

သျှမ်းပြည်တွင်း စပါးအများဆုံးထွက်သော ဒေသသည် မိုးနဲမြို့နယ်တွင် စပါးအများဆုံးထွက်သော ဒေသဖြစ်ပြီး ဒုတိယ အများဆုံး ထွက်သော ဒေသသည် မိုင်းကိုင်မြို့နယ်ဖြစ်ပြီး သျှမ်းပြည်မြောက်ပိုင်း အပါအဝင် မြန်မာနိုင်ငံအောက်ပိုင်း မန္တလေးမြို့ နှင့် တရုတ်နယ်စပ်မြို့တွင်လည်း ပို့ဆောင်ကြောင်း သိရသည်။

အလားတူ သျှမ်းပြည်တောင်ပိုင်း ဘန်းယဉ်မြို့နယ် နမ့်ဟူး ၊ နောင်အယ် နှင့် ဘန်းယဉ်အထိတွင် လယ်ယာအများအပြား ပျက်စီးနေကြောင်း ဘန်းယဉ်လယ်ပိုင်ရှင် အမျိုးသား တစ်ဦးက ဆိုသည်။

“စပါးတော့ သိပ်မစိုက်တော့ဘူး။ အရင်ကလယ်ကို ငှားပြီးလုပ်တယ် ၊ အခုနှစ်မှာ ငှားရတာကလုံးဝကို မကိုက်တော့လို့ ပိုင်ရှင်ကို ပြန်ပေးကြတယ်။ ပိုင်ရှင်က မလုပ်တာကြာတော့ စက်မရှိဘာမရှိနဲ့ ပြီးတော့ လူငယ်တွေထွက်ပြေး ကုန်တော့ မလုပ်ဘဲထားလိုက်ကြတယ်“ ဟု ၎င်း လယ်ပိုင်ရှင်က ဆိုသည်။

သျှမ်းပြည်အတွင်း သျှမ်းတပ် (၂) တပ် နှင့် ဟိုပုံးမြို့နယ် ပအိုဝ်းပြည်သူ့စစ် (PNO) တို့မှ တပ်သားသစ်စုဆောင်းမှုဖြင့် လူငယ်အများစု ထိုင်းနိုင်ငံသို့ ထွက်ပြေးတိမ်းရှောင်သွားသည်။

မြန်မာဆန်ဈေးနှုန်း ရွှေဘိုပေါ်ဆန်း တစ်အိတ်မှာ (၇၃,၀၀၀) ကျပ်မှ (၈၀,၀၀၀) ထိရှိနေသော်လည်း သျှမ်းပြည်မှ ထွက်သော ဆန်စပါးများနှင့် တစ်ဝက်သာ ကွာဟနေကြောင်း သိရသည်။

Leave a Comments