သျှမ်းပြည်တောင်ပိုင်း မိုင်းရူးမြို့နယ်အတွင်း စစ်ရေးကွပ်ကဲသည့် စစ်ကောင်စီတိုင်းမှူးများသည် လက်ရှိတွင် မိုင်းရှူးမြို့နယ်အတွင်းမှ ဆုတ်ခွာပြီး SSPP/SSA နှင့် စစ်ရေးတင်းမာမှုကို ဖြေလျှော့နေကြောင်း သတင်းသိရသည်။
အဆိုပါ စစ်ကောင်စီ တိုင်းမှူးများသည် ဇူလိုင် ၂၅ ရက်တွင် အရှေ့ပိုင်းတိုင်းစစ်ဌာနချုပ် (ရပခ)၊ အရှေ့အလယ်ပိုင်းတိုင်းစစ်ဌာနချုပ် (ရလခ) နှင့် တြိဂံဒေသတိုင်းစစ်ဌာနချုပ် (တသခ) တို့မှ တိုင်းမှူးများသည် ကား ၆ စီးဖြင့် မိုင်းရှူးမြို့နယ်သို့ ရောက်ရှိလာသည်။
ထို့နောက် ထိုတိုင်းမှုးများ ဇူလိုင် ၃၀ ရက်မှ စတင်ပြီး SSPP/SSA စခန်းအနီး အင်အားဖြည့်တင်းမှု ဖြေလျှော့လာကြောင်း ဒေသအတွင်း SSPP နှင့် နီးစပ်သူ တစ်ဦးက သျှမ်းသံတော်ဆင့်ကို ပြောသည်။
“၂၆ ရက်နေ့ လောက်မှာ စစ်ကောင်စီ တိုင်းမှူးကိုယ်တိုင်က ဒီမိုင်းရှူးက စစ်ကြောင်းကို ဦးစီးဖို့အတွက် ရောက်နေတဲ့ သတင်းထွက်ပြီးနောက် စစ်ဆင်ရေး စတော့မှာလိုလို စစ်ရေးတင်းမာမှုက ဆိုးခဲ့တယ်၊ တိုင်းမှူးတွေ ပြန်သွားပြီးတဲ့နောက် ဇူလိုင် ၃၀ ရက်မှာ စစ်ဆင်ရေးတွေလည်း လျှော့ခဲ့တယ်၊ စစ်အင်အားက အရင်အတိုင်းပဲ ထပ်မတိုးလာဘူး” ဟု အထက်ပါ ပုဂ္ဂိုလ်က ပြောသည်။
သို့သော် ထိုစစ်ကောင်စီတိုင်းမှူးများ တပ်ဆုတ်မှုနှင့် ပတ်သက်ပြီး အတည်ပြုချက်မရရှိသေးပေ။
“ကျနော်တို့ သိထားရသလောက်ဆိုရင် တြိဂံတိုင်းမှူး နဲ့ ရလခ တိုင်းမှူးက ပြန်သွားကြပြီတဲ့၊ ဒါပေမဲ့ ရပခ တိုင်းမှူးက နေရာထပ်ပြောင်းလိုက်သလား ပြန်သွားသလား ဆိုတာ ကျနော်တို့ဘက်က အတည်မပြုနိုင်သေးဘူးဖြစ်နေတယ်” ဟု အထက်ပါ ပုဂ္ဂိုလ်က ဆက်လက်ပြောဆိုထားသည်။
ယင်းကဲ့သို့ စစ်ကောင်စီတိုင်းမှူးမှ ၎င်းတို့နေရပ်အသီးသီးထံ ပြန်သွားပြီးနောက်တွင် မိုင်းရှူးမြို့နယ်အတွင်းမှ SSPP နှင့် စစ်ကောင်စီ စစ်ရေးတင်းမာမှုတွေလည်း လျှော့ကျလာကြောင်း မိုင်းရှူးဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ဇူလိုင် ၃၀ ကစပြီး ရှိထားတဲ့ စစ်ကြောင်းတွေ ပြန်မဆုတ်သေးပေမဲ့ အခုချိန်ထိတော့ ထူးခြားပြီး လှုပ်ရှားတာ မရှိတော့ဘူး၊ လေယာဥ်တွေနဲ့ ကင်းလှည့်တာလည်း မရှိတော့ဘူး၊ စစ်ရေးတင်းမာမှုတွေ လျှော့လာတယ်လို့ ပြောရမှာ” ဟု ၎င်းအမျိုးသမီးက ပြောသည်။
ထိုကိစ္စဖြစ်စဥ်များနှင့် ပတ်သက်ပြီး SSPP ပြောရေးဆိုခွင့်ကို သျှမ်းသံတော်ဆင့်မှ အကြိမ်ကြိမ် ကြိုးစားဆက်သွယ် ခဲ့သော်လည်း အဆက်အသွယ်မရှိခဲ့ပေ။
Leave a Comments