တောင်ကြီးမြို့နယ် ပစ်ခတ်မှုဖြစ်ပွားပြီးနောက် ပုဒ်မ (၁၄၄) ထပ်မံ ထုတ်ပြန်

0

သျှမ်းပြည်တောင်ပိုင်း တောင်ကြီးမြို့နယ်ရှိ ထွေအုပ်ရုံးမှ ဝန်ထမ်းပစ်ခတ်ခံရပြီး သေဆုံးသွားပြီးနောက် ပုဒ်မ (၁၄၄) ထပ်မံ ထုတ်ပြန်ခဲ့ကြောင်း စုံစမ်းသိရသည်။

ယမန်နေ့ (ဩဂုတ် ၂) ရက်တွင် သျှမ်းပြည်တောင်ပိုင်း တောင်ကြီးမြို့နယ်ထဲတွင် လူစုဝေးခြင်း၊ လူ ၅ ဦး ထက်ပိုပြီး လူမစုရခြင်း၊ ည ၁၂ နာရီမှ မနက် ၄ နာရီထိ အပြင်မထွက်ရ ပုဒ်မ ၁၄၄ ကို ထပ်မံထုတ်ပြန်ကြေညာခဲ့သည်။

စစ်အာဏာသိမ်းပြီး လွန်ခဲ့သည့် ၂၀၂၁ ခုနှစ် ဖေဖော်ဝါရီလမှ စတင်ကာ ပုဒ်မ ၁၄၄ ကို တကြိမ်ထုတ်ခဲ့ကြောင်း သိရသည်။

အလားတူ ပြီးခဲ့သည့် ဇူလိုင် ၂၄ ရက်က တောင်ကြီးမြို့ ထွေအုပ်ရုံးဝန်ထမ်းတစ်ဦးက စစ်ကောင်စီ မှားပြီး ပစ်လိုက်ပြီး သေဆုံးသွားခြင်း၊ ထိုမြို့တွင်းပစ်ခတ်မှု နှင့် ဆိုင်ကယ် သူခိုး များပြားလာခြင်းတို့ကြောင့် ပုဒ်မ ၁၄၄ ကို ထပ်မံထုတ်ပြန်လာခြင်းဖြစ်သည်။

“တောင်ကြီးမှာက သေနတ်ပစ်တာတွေ၊ ဗုံးထောင်တာတွေရှိနေတယ်လေ။ သူတို့ (စစ်ကောင်စီ) ပစ်လိုက်လို့ပဲ ထွေအုပ်ရုံးဝန်ထမ်းတစ်ဦး သေသွားတာရှိတယ်လေ။ ပြီးတော့ ဆိုင်ကယ်သူခိုး တွေကို ကာကွယ်ဖို့ ဆိုပြီး ထုတ်တာလားမှမသိတာ” ဟု အသက် ၂၄ ဝန်းကျင်ရှိ အမျိုးသမီးတစ်ဦးက ပြောသည်။

တောင်ကြီးမြို့

လက်ရှိအချိန်မှာ တောင်ကြီးမြို့တွင် ဆန္ဒပြမှုမရှိတော့ကြောင်း၊ စစ်ကောင်စီက အာဏာသိမ်းပြီး နောက်ပိုင်း နိုင်ငံရေးရှုပ်ထွေးမှုဖြစ်ပေါ်လာခဲ့ပြီး ၊ လက်ရှိနောက်ပိုင်းတွင်လည်း ပြည်သူများ ညနေတွင် အိမ်ပြင်သိပ်မထွက်တော့ကြောင်း တောင်ကြီးဒေသခံ အမျိုးသမီးက ပြောသည်။

“သူတို့အရင်ကတည်းက ထုတ်လာခဲ့တဲ့ ပုဒ်မတွေပဲဖြစ်တယ်။ သူတို့ အာဏာသိမ်းလို့ပဲ နိုင်ငံရေး ရှုပ်ထွေးမှုတွေ ဖြစ်တာ။ အခုတလောတောင်ကြီး မြို့တွေထဲမှာ ညဆို လူသွားလူလာသိပ်မရှိတော့ဘူး” ဟု ၎င်း က ဆိုသည်။

သျှမ်းပြည်တောင်ပိုင်းတွင် တောင်ကြီးမြို့နယ်ထဲတွင် ပုဒ်မ ၁၄၄ ထုတ်ပြန်ခဲ့ပြီး သျှမ်းပြည်မြောက်ပိုင်း သီပေါမြို့တွင်လည်း ညမထွက်ရ အမိန့်ကို ယနေ့ချိန်ထိ ထုတ်ထားဆဲဖြစ်ကြောင်းသိရသည်။

သီပေါမြို့တွင် ညမထွက်ရ မာရှယ်လောကို ထုတ်ပြန်ခဲ့တာ ၂ လ ကျော်ကြာလာသော်လည်း KTV များဖွင့်လျက်ရှိကြောင်း၊ သူခိုးလည်းပိုမို များပြားလာကြောင်း သိရသည်။

“မာရှယ်လောကတော့ ရှိနေတာပဲ။ ဒါမဲ့ ပြည်သူတွေကတော့ သွားလာနေကြတာပါပဲ။ ပုံမှန်အတိုင်းပါပဲ။ သွားလာနေတာ။ KTV လည်းဖွင့်နေသေးတယ်။ သူခိုးလည်း ပိုများလာတယ်” ဟု သီပေါမြို့ဒေသခံ အမျိုးသားတစ်ဦးက ပြောသည်။

ထိုသို့ စစ်ကောင်စီက ပုဒ်မ ၁၄၄ နှင့် မာရှယ်လောကို ထုတ်ပြန်လာခြင်းသည် ၎င်းတို့၏ နိုင်ငံရေး လုပ်ကွက်တာဖြစ်ကြောင်း သျှမ်းပြည်အတွင်း လွှတ်တော်ကိုယ်စားလှယ်တစ်ဦးကပြောသည်။

“ဒါတော့ သူတို့လုပ်ကွက်ပဲထင်တယ်။ သူတို့နိုင်ငံရေးလုပ်ကွက်တွေပဲဖြစ်တယ်။ အကြောင်းမဲ့နဲ့တော့ သူတို့မလုပ်ဘူး။ သူတို့ကြောင့်ပဲ ပြည်သူတွေလည်း နည်းမျိုးစုံ ဒုက္ခတွေရောက်နေတယ်” ဟု ၎င်းက ဆိုသည်။

စစ်တပ်က အာဏာသိမ်းပြီးနောက်ပိုင်း လက်နက်ကိုင် PDF တပ်ဖွဲ့များပေါ်ပေါက်လာပြီး နယ်မြေအတွင်း မတည်ငြိမ်မှုများလည်း ဖြစ်ပေါ်လာခဲ့ကြောင်းသိရသည်။ အလားတူ သျှမ်းပြည်အတွင်းဒေသတစ်ချို့တွင်လည်း စစ်ကောင်စီ နှင့် PDF တို့ တိုက်ပွဲဖြစ်ပွားနေလျက်ရှိကြောင်းသိရသည်။

Leave a Comments