သျှမ်းမြောက် ကျောက်မဲမြို့နယ်တွင် ပြီးခဲ့သည့် သြဂုတ်လ (၁၅)ရက် မနက် (၁၀)နာရီဝန်းကျင်တွင် မျှစ်သွားချိုးသည့် သားအဖ (၂)ဦး မိုင်းထိကာ ဒဏ်ရာရရှိခဲ့ကြောင်း သိရသည်။
ကျောက်မဲမြို့မှ (၁၂)မိုင်ခန့် ကွာဝေးသည့် နမ့်မန်းကျေးရွာအနီးတွင် မျှစ်သွားချိုးတာဖြစ်ပြီး သားအဖ(၂)ဦးလုံး ဒဏ်ရာရရှိခဲ့တာဖြစ်ကြောင်း ဒေသခံများထံမှ သိရသည်။
“မျှစ် သွားချိုးရင်းနဲ့ မိုင်းကို သွားထိမိတာ၊ အဖေက ညာဖက် ပေါင်မှာ ထိတယ်၊ သားဖြစ်သူက ဒူးခေါင်းမှာ ဒဏ်ရာရခဲ့တယ်” ဟု အဆိုပါ သားအဖနှင့်နီးစပ်သူ အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါမိုင်းထိသူမှာ ဦးအောင်လေး (၄၈)နှစ်နှင့် သားဖြစ်သူ စိုင်းလိန် (၂၄)နှစ်တို့ဖြစ်ပြီး ကျောက်မဲမြို့ ရပ်ကွက်(၈)တွင် နေထိုင်သူများဖြစ်ကြောင်း၊ ယခင်ရက်များတွင်လည်း ထိုနေရာသို့ မှိုရှာ၊ မျှစ်ရှာ သွားရောက်နေကြဖြစ်ကြောင်း ဖခင်ဖြစ်သူက ယခုလို ပြောသည်။
“နမ့်မန်းရွာဖက်ကို အရင်ရက်တွေကလည်း သွားနေကြပဲ၊ မှိုရှာ၊ မျှစ်ရှာတဲ့ အခြားသူငယ်ချင်းတွေလည်း အဲ့ဖက်ကို သွားတာများတယ်၊ အဲ့နေ့ကတော့ ကံဆိုးသွားတယ်။” ဟု ဦးအောင်လေးက သျှမ်းသံတော်ဆင့်ကို ပြောသည်။
ထိုဒေသတွင် တိုင်းရင်းသားလက်နက်ကိုင်များဖြစ်သည့် သျှမ်းပြည်ပြန်လည်ထူထောင်ရေးကောင်စီ၊ သျှမ်းပြည်တပ်မတော် (RCSS/SSA)၊ သျှမ်းပြည်တိုးတက်ရေးပါတီ၊ သျှမ်းပြည်တပ်မတော် (SSPP/SSA)၊ တအာင်း(ပလောင်) အမျိုးသားလွှတ်မြောက်ရေးတပ်မတော် (TNLA)တို့ သွားလာလှုပ်ရှားသည့် နေရာဖြစ်ကြောင်း စုံစမ်းသိရသည်။
ထို့ကြောင့် အဆိုပါနေရာအနီး မှိုရှာ၊ မျှစ်ချိုးသွားသူများအနေဖြင့် မိုင်းအန္တရာယ်ကို သတိထားသင့်ကြောင်း ဒေသခံတစ်ဦးက ပြောသည်။
“နမ့်မန်းအနီး (၁၁)မိုင်း၊ (၁၂)မိုင်နေရာက မှိုရှာ၊ မျှစ်ရှာတဲ့သူတွေ ပေါတယ်၊ ခုရာသီကလည်း မှိုရှာ၊ မျှစ်ရှာတဲ့ ရာသီဆိုတော့ အများစုက အဲ့ဖက်ကို သွားကြတာ၊ ဒါပေမယ့် လက်နက်ကိုင်တွေ လှုပ်ရှားတဲ့ နေရာဆိုတော့ မိုင်းတွေကို သတိထားသင့်တယ်” ဟု ကျောက်မဲမြို့မှ ဒေသခံ အမျိုးသားတစ်ဦးက ပြောသည်။
ကျောက်မဲတွင် ကိုဗစ်ပိုးပျံ့နှံ့နေမှုကြောင့် အလုပ်အကိုင်ရှားပါးမှုများဖြစ်လာသည့်အတွက် ရာသီအလိုက် မှိုရှာ၊ မျှစ်ရှာကာ မိသားစု စားဝတ်နေရေးအတွက် လုပ်ကိုင်လာကြသူ ပိုများလာကြောင်း ၎င်းက ဆိုသည်။
ယခု သြဂုတ်လအတွင်း ကျောက်မဲမြို့နယ် ပန်လင်းကျေးရွာအုပ်စုတွင်လည်း လက်ဖက်ခြံအနီး မှိုသွားရှာသူ (၂)ဦး မိုင်းထိကာ ဒဏ်ရာရရှိခဲ့ကြောင်း သိရသည်။
Leave a Comments