သျှမ်းပြည်မြောက်ပိုင်း ကျောက်မဲမြို့တွင် အောက်ဆီဂျင်ကျနေသည့် ကိုဗစ် လူနာများကိုသာ ဆေးရုံတင်ခွင့်ပြုကြောင်း စုံစမ်းသိရသည်။
ကျောက်မဲမြို့ ပြည်သူ့ဆေးရုံတွင် အောက်ဆီဂျင် ကျနေသည့် ကိုဗစ်-၁၉ လူနာကိုသာ ဆေးရုံတင်ခွင့်ပြုပြီး ပုံမှန် ကိုဗစ်- ၁၉ ကူးစက်ခံရသူများကို လက်ခံကုသပေးခြင်းမရှိကြောင်း ကျောက်မဲမြို့ နမ့်ခုံးပရဟိတအဖွဲ့ဝင်တဦးက ပြောသည်။
“ ဟုတ်ပါတယ်။ ဒီမှာလူနာအားလုံးကို ဆေးရုံးက လက်မခံဘူး။ ဘာလို့လဲဆိုရင် ဆေးရုံကလူနာတွေပြည့်နေပြီးလေ။ လူနာထားစရာမရှိတော့ ပိုးတွေ့လူနာအားလုံးကို ဆေးရုံမှာမပေးတင်ထားတော့ဘူး။ အရေးပေါ်လူနာတွေကိုပဲ အဓိကကုပေးနေကြရတာပေါ့။” ဟု ကျောက်မဲမြို့ နမ့်ခုံးပရဟိတ အဖွဲ့ဝင်တဦးက ပြောသည်။
ကျောက်မဲမြို့တွင် ကိုဗစ်-၁၉ ပိုးကူးစက်ခံရသူ မည်မျှရှိနေသည်ကို အတိကျမသိရှိနိုင်ကြောင်း၊ စစ်ဆေးရန် ပစ္စည်းက မရှိသောကြောင့် ကိုဗစ်- ၁၉ လက္ခဏာပြမှသာ ပိုးရှိသည်ကို သိရှိနိုင်ကြောင်း သိရသည်။
ထိုအပြင် ကိုဗစ်-၁၉ ပိုးကူးစက်ခံထားရပြီး ဆေးရုံသို့သွားပြပါက အရေးပေါ်အခြေအနေရောက်မှသာ လက်ခံကုသပေးလျက်ရှိကြောင်း သိရသည်။
“ ကျောက်မဲမှာ ဘယ်လောက်ရှိလဲကျနော်တို့ အတိကျမသိရတော့ဘူး။ စစ်ဆေးဖို့ ပစ္စည်းတွေ၊ Task Kit ကမရှိတော့ဘူး။ ဘယ်သူက ကူးနေလဲဆိုတာမသိတော့ဘူး။ လက္ခဏာပြလာမှ ကိုဗစ် ဖြစ်တယ်ဆိုတာကို သိရတယ်။ လက္ခဏာပြပြီးဆိုရင်လဲ အခြေနေမဆိုးရင် ကိုယ်အိမ်မှာဘဲ ဆေးကုသကြရတယ်။” ဟု နမ့်ခုံးပရဟိတက ပြောသည်။
ကျောက်မဲမြို့တွင် ယနေ့ ဩဂုတ် ၁၇ ရက်မနက်ပိုင်းအချိန်တွင် ကိုဗစ်-၁၉ ကြောင့် ပြည်သူ (၂) ဦးထပ်မံသေဆုံးသွားကြောင်း သိရသည်။
ကျောက်မဲမြို့တွင် ကိုဗစ်-၁၉ တတိယလှိုင်းတွင် သေဆုံးသွားသည့် ပြည်သူများ စုစုပေါင်း (၃၀) ကျော်ရှိကြောင်း သိရသည်။
Leave a Comments