သျှမ်းပြည် ကျောက်မဲမြို့ကို စစ်ကော်မရှင်တပ် ပြန်လည်ထိန်းချုပ်ခဲ့ပြီးနောက် ပထမဆုံးအကြိမ် ပြည်သူ့စစ်မှုထမ်း စတင်ခေါ်ယူနေကြောင်း စုံစမ်းသိရသည်။

ဖေဖော်ဝါရီလ ပထမပတ်မှ စတင်ပြီး စစ်ကော်မရှင်တပ် ပြန်လည်ထိန်းချုပ်ထားသည့် ကျောက်မဲမြို့ပေါ်နှင့် ပြည်ထောင်စုလမ်းမကြီးဘေးရှိ ကျေးရွာများတွင် ပထမဆုံးအကြိမ် ပြည်သူ့စစ်မှုထမ်း စတင်ခေါ်ယူနေပြီး စစ်မှုထမ်းစေလွှတ်ရန် လူမရှိခြင်းကြောင့် လူစားထိုးရန် အုပ်ချုပ်ရေးမှူးများမှ ငွေကောက်ခံနေကြောင်း ကျောက်မဲဒေသခံများက ပြောသည်။

“ကျောက်မဲမြို့ပေါ် ၃ ယောက်ဆိုပြီး တောင်းတယ်၊ မြို့ထဲမှာတော့ စစ်မှုထမ်းအတွက် ပေးစရာ လူမရှိလို့ တစ်ယောက်ကို သိန်း ၁၀၀ နဲ့ လူရှာထည့်ပေးမယ်လို့ ပြောနေကြတယ်။ အုပ်ချုပ်ရေးမှူးတွေက ငွေကောက်ပြီး လူစားထိုး ရှာပေးရမှာပေါ့။ နောင်ပိန်နဲ့ စခန်းသာဘက်လည်း မြို့ပေါ်နဲ့ အတူတူပဲ၊ ငွေကောက်ပြီး လူစားထိုး ရှာထည့်ကြမှာ” ဟု ကျောက်မဲမြို့နေ ဒေသခံအမျိုးသမီးတစ်ဦးက သျှမ်းသံတော်ဆင့်ကို ပြောသည်။

လက်ရှိတွင် ကျောက်မဲမြို့ပေါ်ရှိ ရပ်ကွက် (၉) ခုနှင့် အနီးအနားကျေးရွာများ၊ ပြည်ထောင်စုလမ်းမကြီးတလျှောက် နောင်ပိန်၊ စခန်းသာ၊ ချောင်းချောက်၊ ပန်ဟုတ်၊ နားခေါ် စသည့် ကျေးရွာအုပ်စုများတွင် တစ်အိမ်လျှင် စစ်မှုထမ်းကြေး ကျပ် ၂ သောင်းမှ ၅ သောင်းအထိ မဖြစ်မနေ ထည့်ပေးရခြင်းကြောင့် အခက်အခဲများ ကြုံတွေ့နေရကြောင်း ဒေသခံများက ပြောသည်။

ကျောက်မဲမြို့ကို ယမန်နှစ် ၂၀၂၅ အောက်တိုဘာလတွင် တအာင်း(ပလောင်) အမျိုးသားလွတ်မြောက်ရေးတပ်မတော် TNLA လက်ထဲမှ စစ်ကော်မရှင်တပ် ပြန်လည်တိုက်ခိုက်ပြီး ထိန်းချုပ်နိုင်ခဲ့သော်လည်း ကျောက်မဲမြို့နယ်ထဲ ပါဝင်သည့် မိုင်းလုံမြို့နှင့် မိုင်းငေါ့မြို့တို့ကို TNLA မှ ဆက်လက်ထိန်းချုပ်ထားသည်။

ရွေးကောက်ပွဲ တတိယပိုင်းထဲ ပါဝင်သည့် ကျောက်မဲမြို့နယ်သည် မြို့နယ်တစ်ခုလုံး၏ (၆) ရာခိုင်နှုန်းဖြစ်သည့် မြို့ပေါ်ရပ်ကွက် (၉) ခုနှင့် မြို့အနီးအနား ကျေးရွာအုပ်စု (၅) စု၌သာ အရေးပေါ်အခြေအနေ ကြေညာထားသည့်ကြား ရွေးကောက်ပွဲ ကျင်းပနိုင်ခဲ့ပြီး ပြည်ထောင်စုကြံ့ခိုင်ရေးနှင့် ဖွံ့ဖြိုးရေးပါတီ USDP မှ လွှတ်တော်သုံးရပ်စလုံး အနိုင်ရရှိခဲ့သည်။

အလားတူ ဇန်နဝါရီလ နောက်ဆုံးပတ်မှ စတင်ပြီး စစ်ကော်မရှင် ပြန်လည်ထိန်းချုပ်ထားသည့် လားရှိုးမြို့ပေါ် ရပ်ကွက် (၁၂) ခုတွင် အုပ်ချုပ်ရေးမှူးများမှ နေအိမ်များထဲ လူဦးရေစာရင်း ဝင်ရောက်စစ်ဆေးခဲ့ပြီး စစ်မှုထမ်းကြေး စတင်ကောက်ခံနေကြောင်း လားရှိုးဒေသခံများထံမှ သိရသည်။