သျှမ်းပြည် ကျောက်မဲမြို့ပေါ်သို့ စစ်ကော်မရှင်တပ်သားများ ဝင်ရောက်လာပြီး မြို့ပြင်ဘက်တွင် သေနတ်ပစ်ခတ်သံများ ဆက်ကြားနေရကြောင်း စုံစမ်းသိရသည်။

ယနေ့ (အောက်တိုဘာ ၁ ရက်) နံနက်ပိုင်းမှ စတင်ပြီး တအာင်း(ပလောင်) အမျိုးသားလွတ်မြောက်ရေးတပ်မတော် TNLA ခုခံကာကွယ်ခဲ့သည့် ကျောက်မဲမြို့ပေါ်သို့ စစ်ကော်မရှင်တပ်သားများ ဝင်ရောက်လာပြီး ယမန်နေ့တွင် မီးရှို့ခံထားရသည့် ဌာနဆိုင်ရာရုံးများတွင် နေရာယူထားကြောင်း ဒေသခံများက ပြောသည်။

“မနက်က စစ်တပ်မြို့ထဲ ဝင်လာပြီလို့ ပြောတယ်၊ မနေ့က မီးရှို့ခံရတဲ့ ဌာနဆိုင်ရာ ရုံးတွေမှာ စစ်တပ်က နေရာပြန်ယူထားတယ်။ မြို့အထွက် ငြိမ်းချမ်းရေးကုန်းဘက်မှာ သေနတ်သံကတော့ တချက်တချက် ကြားနေရသေးတယ်၊ လေယာဉ်လည်း လာဝဲနေတယ်။ မနေ့က လက်နက်ကိုင်တွေ မီးရှို့သွားတဲ့ထဲမှာ Alphard လို ကားတွေတောင် ပါတယ်”ဟု ကျောက်မဲရောက် စစ်ရှောင်အမျိုးသမီးတစ်ဦးက သျှမ်းသံတော်ဆင့်ကို ပြောသည်။

လက်ရှိတွင် ကျောက်မဲမြို့ပေါ်မှ TNLA တပ်ဖွဲ့ဝင်များ ဆုတ်ခွာသွားကြောင်း ဒေသခံများက ပြောဆိုနေသော်လည်း သျှမ်းသံတော်ဆင့်မှ အတည်ပြုနိုင်ရန် ဆက်လက်စုံစမ်းနေသည်။

ပြီးခဲ့သည့် ဩဂုတ်လ (၁၈) ရက်မှ စတင်ပြီး ကျောက်မဲမြို့နယ် နောင်ပိန်တိုက်နယ်အတွင်း မြေပြင်ထိုးစစ်ဆင်လာသည့် စစ်ကော်မရှင်တပ်သည် TNLA နှင့် PDF ပူးပေါင်းတပ်ဖွဲ့များကို တစ်လခွဲကျော် တိုက်ခိုက်ခဲ့ပြီးနောက် ကျောက်မဲမြို့ကို ပြန်လည်ထိန်းချုပ်ရဖွယ် ရှိနေသည်။

“၁၀၂၇ စစ်ဆင်ရေး”အတွင်း TNLA ထိန်းချုပ်ထားသည့် မြို့ (၁၂) မြို့ထဲမှ ပြီးခဲ့သည့် ဇူလိုင်လလယ်တွင် နောင်ချိုမြို့ကို စစ်ကော်မရှင်တပ် ပထမဆုံး ပြန်လည်ထိန်းချုပ်ခဲ့ပြီး ကျောက်မဲမြို့သည် ဒုတိယမြို့ ဖြစ်လာသည်။

ကျောက်မဲမြို့နှင့် သီပေါမြို့သည် လာမည့် ဒီဇင်ဘာလတွင် စစ်ကော်မရှင် ရွေးကောက်ပွဲ ကျင်းပပြုလုပ်မည့် မြို့နယ်စာရင်းထဲတွင် ပါဝင်ထားခြင်းကြောင့် ယင်းမတိုင်မီ ပြန်လည်ထိန်းချုပ်နိုင်ရန် TNLA ကို အပြင်းအထန် ထိုးစစ်ဆင် တိုက်ခိုက်နေသည်။