သျှမ်းပြည်မြောက်ပိုင်း ကျောက်မဲမြို့ လူမှုကူညီရေးအသင်းဝင် အမျိုးသမီးတစ်ဦး အပါအဝင် အရပ်သား ၃ ဦးကို တအာင်း (ပလောင်) အမျိုးသားလွတ်မြောက်ရေးတပ်မတော် (TNLA) မှ ဖမ်းဆီးခေါ်ဆောင်သွားခဲ့ကြောင်း ကျောက်မဲဒေသခံများ၏ ပြောကြားချက်အရ သိရသည်။
ယမန်နေ့ (စက်တင်ဘာလ ၁၉ ရက်) နေ့လယ် ၂ နာရီခွဲတွင် ကျောက်မဲမြို့ ပင်ပေါက်ကြီး ဈေးဆိုင်တန်းတွင် နေထိုင်သော အသက် (၃၄) နှစ်အရွယ် နန်းအေးယိင်းသည် ဈေးရောင်းနေစဉ် TNLA မှ အကြောင်းမဲ့လာရောက် ဖမ်းဆီးခေါ်ဆောင်သွားခဲ့ကြောင်း ကျောက်မဲမြို့ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ဈေးရောင်းနေတုန်း လာဖမ်းသွားတာ၊ ဘာကြောင့် ဖမ်းတယ်ဆိုတာလည်း မပြောဘူး။ အခုထိလည်း ပြန်မလွှတ်လာသေးဘူး” ဟု ကျောက်မဲမြို့ဒေသခံ အမျိုးသမီးတစ်ဦးက ပြောသည်။
နန်းအေးယိင်းသည် နမ့်ခုံးရှမ်းများပရဟိတအသင်းဝင် တစ်ဦးဖြစ်ပြီး ဒေသအတွင်း ပရဟိတအကျိုးကို ဆောင်ရွက်နေသော အရပ်သားတစ်ဦးသာ ဖြစ်ကာ မည်သည့် လက်နက်ကိုင်အဖွဲ့အစည်းနှင့် ပတ်သက်ခြင်းမရှိသဖြင့် ချက်ချင်းပြန်လွတ်ပေးရန် ၎င်းက တောင်းဆိုသည်။
အလားတူ ယမန်နေ့တွင် ကျောက်မဲမြို့ အောင်ဆုပန် ကျောင်းတိုက်အနီးရှိ ခေါက်ဆွဲဆိုင်မှ အမျိုးသား တစ်ဦးနှင့် အမျိုးသမီး တစ်ဦးကိုလည်း TNLA မှ ဖမ်းဆီးခေါ်ဆောင်သွားခဲ့ကြောင်း ဒေသခံများက ပြောသည်။
အဆိုပါဒေသခံများအား ဖမ်းဆီးခေါ်ဆောင်သွားခြင်းနှင့် ပတ်သက်၍ တအာင်း (ပလောင်) အမျိုးသားလွတ်မြောက်ရေး တပ်မတော် (TNLA) ပြန်ကြားရေး တာဝန်ခံ လွေးယေဦးကို သျှမ်းသံတော်ဆင့်မှ ဆက်သွယ်မေးမြန်းခဲ့သော်လည် ပြန်လည်ဖြေကြားခြင်း မရှိသေးပေ။
ကျောက်မဲမြို့ဒေသခံ အမျိုးသမီးတစ်ဦးက “မနေ့ နေ့လယ်တုန်းက ကွမ်းယာဆိုင်မှာရှိတဲ့ လူတွေအကုန်လုံး ကိုလည်း ခေါ်သွားတယ်။ အခြေအနေတွေက အဲ့သလောက် ဆိုးလာတာ။ ကျမတို့တော့ အရမ်းစိတ်ပူနေရတယ်။ အခုဖမ်းခေါ်သွားတာ ကလေးတွေရော၊ အမျိုးသမီးတွေရော ပါတယ်။ ပြီးတော့ ဘာကြောင့် ဖမ်းသွားတယ် ဆိုတာလည်း မပြောတော့ အသက်အန္တရာယ်အတွက် တစ်ခုခုဖြစ်သွားမှာကို၊ စစ်သားသွားလုပ်ရမှာကို စိုးရိမ်နေရတယ်” ဟု ပြောသည်။
ပြီးခဲ့သည့် စက်တင်ဘာလ ၁၅ ရက်နေ့ ညတွင်လည်း ကျောက်မဲမြို့ ရပ်ကွက် (၁)၊ ရပ်ကွက် (၂) နှင့် ပန်ပေါင်းရွာ ဒေသခံ စုစုပေါင်း အယောက် (၃၀) ကိုလည်း TNLA မှ အကြောင်းမဲ့ ဖမ်းဆီးခေါ်ဆောင်သွားပြီး ယနေ့အချိန်ထိ ပြန်မလွတ်လာသေးကြောင်း သိရသည်။
TNLA သည် ယခုလဆန်းပိုင်းမှ စတင်၍ ကျောက်မဲမြို့ ကျေးရွာဒေသရှိ ဒေသခံများကို ဖမ်းဆီးခေါ် ဆောင်သွားခြင်း ရှိသကဲ့သို့ မြို့ပေါ် ရပ်ကွက်ရှိ ဒေသခံများကိုလည်း ဖမ်းဆီးခေါ်သွားခဲ့ပြီး ယနေ့အချိန်ထိ ဖမ်းဆီးခံရသူ စုစုပေါင်း (၁၀၀) ကျော်ရှိပြီဖြစ်ကြောင်း ဒေသခံများက ပြောသည်။
ဖမ်းဆီးခံရသည့် ဒေသခံများအချို့သည် တောင်ပေါ်သို့ ဖမ်းဆီးခေါ်ဆောင်သွားခံရသလို အချို့မှာလည်း ကျောက်မဲမြို့ ရဲစခန်းဘက်သို့ ဖမ်းဆီးခေါ်ဆောင်သွားပြီး စစ်ဆေးမေးမြန်းနေကြောင်း သိရသည်။
ယင်းကဲ့သို့ ဒေသခံများကို TNLA မှ အကြောင်းမဲ့ ဖမ်းဆီးခေါ်ဆောင်သွားခြင်းနှင့် ပတ်သက်ပြီး ရှမ်းလူငယ် အဖွဲ့အစည်းများနှင့် ပရဟိတအသင်းများက ချက်ချင်းပြန်လွှတ်ပေးရန် တောင်းဆိုနေလျက်ရှိသည်။
လက်ရှိ ကျောက်မဲမြို့နယ် တွင်လည်း TNLA ပူးပေါင်းတပ်ဖွဲ့နှင့် စစ်ကော်မရှင်တပ်တို့အကြား ထိတွေ့တိုက်ပွဲ ဖြစ်ပွားနေလျက်ရှိကြောင်း ဒေသခံများက ပြောသည်။
ပြီးခဲ့သည့် စက်တင်ဘာလ ၁၇ ရက်တွင် နောင်ပိန်တိုက်နယ်အတွင်းရှိ ခဲလုံကျေးရွာဘက်တွင် TNLA ပူးပေါင်းတပ်ဖွဲ့နှင့် စစ်ကော်မရှင်တပ်တို့ ထိတွေ့တိုက်ပွဲကြား တောထဲ ထွက်ပြေးတိမ်းရှောင်နေရသည့် အရပ်သားတစ်ဦးလည်း သေနတ်ပစ်ခတ်ခံရပြီး စက်တင်ဘာလ ၁၈ ရက်နေ့တွင် သေဆုံးသွားခဲ့ကြောင်း သိရသည်။
Leave a Comments