ပြည်ထောင်စုမြန်မာနိုင်ငံအတွင်း ကိုဗစ်နိုင်တင်း ရောဂါ ကူးစက်ပျံ့နှံ့မှု ထိုင်းသို့ ကူးစက်ခြင်းမပြုနိုင်စေရန်အတွက် မြန်မာရွှေ့ပြောင်းအလုပ်သမား နေထိုင်ရာသို့ ရှောင်တခင် ဝင်ရောက်စစ်ဆေးမှုများ ဆက်တိုက်ပြုလုပ်လာနေသည်။

စက်တင်ဘာလ လယ်ပိုင်းမှစ၍ ယနေ့အထိ ထိုင်းနိုင်ငံမြောက်ပိုင်း လမ်းပွန်း၊ လမ်းပန်း၊ ချင်းမိုင်၊ ချင်းရိုင်းခရိုင်အတွင်း ကိုဗစ်နိုင်တင်းရောဂါ ထိန်းချုပ်ရန်၊ ထိုရောဂါထိန်းချုပ်နိုင်ရေးအတွက် မြန်မာပြည်မှ လာသည့် ရွှေ့ပြောင်းအလုပ်သမား နှင့် စပ်ဆိုင်သည့် မိဘဆွေမျိုးများ ထိုင်းအတွင်း တရားမဝင် ဝင်ရောက်မှု ရှိမရှိ၊ တရားမဝင်ရွှေ့ပြောင်းအလုပ်သမားများ ထိုင်းနိုင်ငံအတွင်း အသစ် ထပ်မံဝင်ရောက်မှုရှိမရှိ ထိုင်းနိုင်ငံအတွင်း ရွှေ့ပြောင်းအလုပ်သမားများ ခရီးသွားရာဇဝင်မှတ် တမ်းများ အား ထိုင်းအာဏာပိုင်များမှ စစ်ဆေးမှု ဆက်တိုက်ပြုလုပ်လာနေသည်။

“ကျမတို့ငှားနေတဲ့ နေအိမ်ကို ဝင်စစ်တယ်။ မနေ့က။ ပုလိပ်တွေ ၊ စစ်သားတွေ၊ မြို့နယ်၊ ရပ်ကွက် အုပ်ချုပ်ရေးမှူးတွေ ထိုင်းလဝကတွေ အပါဝင် ဌာနဆိုင်ရာ အစုံဘဲ လာစစ်တယ်။ လက်မှတ်စစ်တယ်။ ကဒ်ရှိမရှိ ။  ဒုက္ခ ရောက်တာက ကျမတို့အမေပေါ့ သူက အသက်ကြီးပြီ အလုပ်သမားကဒ်လဲမရှိဘူး။ သူ့ကို ခြံထဲ ပို့ထားရတယ်။ ဒုက္ခရောက်တာပေါ့။ ကျမတို့အလုပ် သွားလုပ်နေတဲ့ သရက်ခြံထဲ လာမစစ် ဘူးဆိုတာ မပြောနိုင်ဘူးလေ” – ဟု လမ်းပွန်းခရိုင် လမ်းပွန်းမြို့ ရောက် ရွှေ့ပြောင်းအလုပ်သမား နန်းအေးခမ်းမြ ကပြောသည်။

ထိုင်းနိုင်ငံမြောက်ပိုင်း ချင်းမိုင်၊ ချင်းရိုင်း၊ နန့်၊ ဖယောဝ်း၊ လမ်းပွန်း၊ လမ်းပန်း ခရိုင်အတွင်း ပြည် ထောင်စု မြန်မာနိုင်ငံသား ရွေ့ပြောင်းအလုပ်သမားသိန်းဂဏန်းနေထိုင်နေကြောင်း၊ နယ်စပ်တ ကြောသျှမ်းပြည်နယ်နှင့်ထိစပ်သောကြောင့် သျှမ်းအလုပ်သမားအများဆုံးဖြစ်ကြောင်း၊ ချင်းမိုင် ခရိုင်အတွင်း ၈ သောင်းကျော်ရှိကြောင်း ချင်းမိုင်ရွှေ့ပြောင်းအလုပ်သမားဌာန စာရင်းဇယား အရသိရ သည်။

“ကျနော်တို့ က ရွှေ့ပြောင်းအလုပ်သမားငှားနေတဲ့အိမ်ဘဲမဟုတ်ဘူး၊ သူတို့ ထိုင်း သဌေးနဲ့ နေရင် အဲ့ဒီ့သဌေးအိမ်ကိုလဲ ဝင်စစ်ပါတယ်။ ကိုဗစ်နိုင်တင်း ထိန်းချုပ်မှု နိုင်ငံတော်ချမှတ်တဲ့ အမိန့် အတိုင်းလုပ်ရတာပါ” – ဟု ရွှေ့ပြောင်းအလုပ်သမားနေထိုင်ရာသို့ ဝင်ရောက်စစ်ဆေးစဉ် ထိုင်းအရာ ရှိတဉီးက မီဒီယာသို့ပြောသည်။

ပြည်ထောင်စုမြန်မာနိုင်ငံအတွင်း ကိုဗစ်နိုင်တင်း ဒုတိယ လှိုင်းရိုက်ခတ်မှုကြောင့် ထိုင်း – မြန်မာ နယ်စပ်တကြောရှိ တရားဝင်ဂိတ်စခန်း၊ တရားမဝင်ဂိတ်စခန်းများ အားလုံး ၊ ထိုင်း – မြန်မာနယ်စပ် တကြောလုံး လုံခြုံရေးအထူးတင်းကြပ်နေကြောင်း၊ ထိုင်းသို့ တရားမဝင် ဝင်ရောက်လာ သူများ အားလုံးလည်းဖမ်းဆီးပြီး မြန်မာအစိုးရထံ ပြန်လည်အပ်နှံကြောင်း၊ ထိုင်းဘက်တရားမ ဝင်နယ်စပ်ဖြတ် ကျော်သည့်ရွှေ့ပြောင်းအလုပ်သမားများအားပစ်ခတ်ခွင့်ရထားသည် ဆိုသည့်ကိစ္စမဟုတ်မှန်ကြောင်း၊ သို့သော် ကိုဗစ်ကာလ အပေါ် အခွင့်ကောင်းယူပြီး ထိုင်းသို့ မူးယစ်မှောင်ခိုသမားများအား ပစ်ခတ် ဖမ်းဆီးခွင့်တော့အပြည့်အဝ ရှိကြောင်း ထိုင်းနယ်စပ်လုံခြုံရေး အရာရှိတဉီးက သျှမ်းသံတော် ဆင့်သို့ပြောသည်။

လက်ရှိပြည်ထောင်စုမြန်မာနိုင်ငံတွင် ကိုဗစ်နိုင်တင်းရောဂါ ကူးစက်သူ ၅၂၆၃ ဉီးရှိပြီးသေဆုံးသူ ၈၁ ဉီး အထိ တိုးလာသည်။ သြဂုတ်လ တတိယ အပတ်က ကူးစက်သူ ၃၀၀ ကျော်၊ သေဆုံးသူ ၆ ဉီးသာ ရှိရာမှ ထိုသို့ အရှိန်တဟုန်ထိုး တိုးမြင့်ကူးစက်လာခြင်းဖြစ်သည့်အတွက် တရုတ်အပါ အဝင် အိမ်နီးချင်းထိုင်းနိုင်ငံတို့က မျက်ခြေမပြတ် လုံခြုံရေးတိုးမြှင့်စောင့်ကြပ် လာခြင်းဖြစ်သည်။