ဆီဆိုင် ကုန်းမြင့်မြေ ဖော်ဆောင်ရေးကို ကန့်ကွက်မှုကြောင့် မပြုလုပ်တော့ပေ

သျှမ်းပြည်တောင်ပိုင်း ဆီဆိုင်မြို့နယ် တပ်မှ သိမ်းဆည်းထားသည့် လယ်ယာမြေ အစားထိုးပြန်ပေးရန် ကုန်းမြင့်လယ်ယာမြေ ဖော်ဆောင်ရေးကို ဒေသခံများကန့်ကွက်မှုကြောင့် မပြုလုပ်တော့ကြောင်း စုံစမ်းသိရသည်။

တပ်သိမ်းမြေအစားထိုး ပေးရန် ဖော်ဆောင်မည့် ကုန်းမြင့်မြေ ကို ကန့်ကွက်သည့် ဆီဆိုင်မြို့နယ် ဒေသခံများ ပုံ

ကုန်းမြင့်လယ်ယာမြေ ဖော်ဆောင်မည့် နေရာသည် ဆီဆိုင်မြို့ရှိ ကုန်းဆွတ်ကျေးရွာ နှင့် ပင်စုံကျေးရွာအုပ်စုအတွင်းရှိ နမ့်တောင်းကျေးရွာပိုင် ကုန်းမြင့်လယ်ယာများကိုဖော်ဆောင်ပြီး တပ်သိမ်းမြေ အစားထိုး ပြန်ပေးမည် ဟု ပြောဆိုခဲ့သည်။

တပ်သိမ်းမြေ အစားထိုး အဖြစ် ကုန်းမြင့်မြေ ဖော်ဆောင်ပါက သစ်တော ဧက (၂၀၀) ကျော်ကို ဖျက်ဆီးရမည် ဖြစ်သဖြင့် ဒေသခံ များက ဇူလိုင် (၁၈) ရက်က ကန့်ကွက်ခဲ့ကြသည်။

“ကျနော်တို့ ကန့်ကွက်တဲ့နေရာမှာတော့ မလုပ်ဖြစ်တော့ဘူး။ ဘယ်နေရာရွေ့မှန်းတော့မသိဘူး။ အဲ့နေရာတော့ မလုပ်ဖြစ်တော့ဘူး” ဟု ဆီဆိုင်မြို့နယ် သျှမ်းလူငယ် စိုင်းပွန်းဟန် က သျှမ်းသံတော်ဆင့် ကိုပြောသည်။

ဆီဆိုင်မြို့နယ် တောင်သူများ ပိုင်ဆိုင်သည့် မြေယာမြေ ဧက (၁၉၀၀) ကျော်ကို ဆီဆိုင်အခြေစိုက် ခြေမြန်တပ်ရင်း (၄၂၃) တပ် နှင့် (၄၂၄) တပ်တို့ က သိမ်းဆည်းခဲ့ပြီး ထို သိမ်းဆည်းခဲ့သည့် မြေများအစား နမ့်တောင်းကျေးရွာရှိ သစ်တော ဧက (၂၀၀) ကျော်ကို ကုန်းမြင့်လယ်ယာမြေ ဖော်ဆောင်ပြီး အစားထိုး ပြန်လည်ပေးမည်ဖြစ်ကြောင်း သိရသည်။

ကုန်းမြင့်မြေ ဖော်ဆောင်ရေး မပြုလုပ်တော့ကြောင်း ကို ဇူလိုင် ၂၃ရက် တွင် လာရောက်အကြောင်းကြားခဲ့ပြီး၊ ကုန်းမြင့်မြေ ဖော်ဆောင်ရာတွင် အသုံးပြုမည့် မြေတူးစက်ယန္တရားများ ပြန်လည်ရုပ်သိမ်းသွားပြီဖြစ်ကြောင်း စိုင်းပိန်းဟန် က ပြောပြသည်။

“အရင်ကတော့ သူတို့ မြေတူးကားတွေ တဲတွေ လာထားတာ ရှိတယ်။ အခု အဲ့ဒါတွေလည်း မရှိတော့ဘူး။ အကုန်လုံး ပြန်ရုပ်သိမ်းလိုက်ပြီ” ဟု စိုင်းပိန်းဟန် ကပြောသည်။

မြေယာဖော်ဆောင်မည့် နေရာသည် ကုန်းမြင့်လယ်ယာမြေဖြစ်ပြီး သစ်ပင် သစ်တောများဖြစ်ပြီး ဒေသခံ ရွာသားများက ချက်ပြုတ်ရန်အတွက် ထင်းခုတ်ခြင်း အိမ်ဆောက်ရန်အတွက် အမိုးအကာ သွားယူခြင်းများရှိကြောင်း ဒေသခံများက ပြောဆိုကြသည်။

“ခုလက်ရှိ ကန့်ကွက်နေတာသည် ကုန်းမြင့်လယ်ယာဖော်ဆောင်ရေး စီမံကိန်း ကို ကန့်ကွက်နေတာမဟုတ်ဘူး။ ကျနော်တို့ နေရာကိုပဲ ကန့်ကွက်နေတာ။ တကယ့်တောထဲကို ဖြိုပြီးတော့ လုပ်မယ်ဆိုတော့ ဒါက သဘာဝ မကျဘူး နည်းလမ်း လည်း မဟုတ်သေးဘူး” ဟု စိုင်းပိန်းဟန် ကပြောသည်။

လယ်ယာ သိမ်းခံရသည့် ဆီဆိုင် ပအိုဝ်း တောင်သူများကို အစားထိုးမြေယာ အဖြစ် ကုန်းမြင့်လယ်ယာမြေ ဧကာ ၂၀၀ ကျော်ဖော်ဆောင်မည့် ကိစ္စကို ပအိုဝ်းတောင်သူများလည်း လက်မခံကြောင်း၊ မြေယာဖော်ဆောင်သည့်အခါ သစ်ပင်များ ခုတ်ရပြီး သစ်တောပြုန်းတီးမှုများဖြစ်လာသည့်အတွက် လက်မံနိုင်ကြောင်းလည်း လယ်ယာသိမ်းဆည်းခံရသည့် ပအိုဝ်းတောင်သူများကပြောသည်။

လက်ရှိ ကုန်းမြင့်မြေ ဖော်ဆောင်မှုရပ်ဆိုင်းသည့် ကိစ္စနှင့် ပတ်သက်ပြီး လယ်ယာသိမ်းခံရသည့် ဒေါ်ချိုချိုဝင်း က “ဒီလို ကြားရတော့ စိတ်ချမ်းသာတယ်။ ပအိုဝ်း နဲ့ သျှမ်း တွေလည်း တစ်ယောက်နဲ့ တစ်ယောက် အထင်လွဲမှားမှုတွေ မရှိတော့ဘူး။ သံသယတွေ ကင်းတယ်။ ဒီသစ်တောကို မဖျက်စီးတဲ့ခါကျတော့ သျှမ်း နဲ့ ပအိုဝ်းတွေ ငြိမ်းချမ်းရေးဖြစ်သွားတယ်” က ပြောသည်။

အစားထိုး မြေယာများ ပြန်ပေးမည့် ကုန်းမြင့်လယ်ယာမြေ ဧက (၂၀၀) ကျော်ကို ဖော်ဆောင်မည်ဟု သိရှိရပြီး မြေယာများကို ဖော်သည့်အခါ သစ်ပင်များ ခုတ်ရမည်ဖြစ်ပြီး သစ်တောပြုန်းမှုများ ဖြစ်လာနိုင်သည့်အတွက် ကန့်ကွက်ရခြင်းဖြစ်ကြောင်း ဒေသခံများက ပြောဆိုကြသည်။

တပ်သိမ်းမြေ အစားထိုးအဖြစ် သစ်တောများကို ဖျက်ဆီးပြီး တောင်သူများကို ပြန်လည်ပေးသည့် ကိစ္စ သည် အဓိပ္ပာယ်မရှိကြောင်း၊ သစ်တောများ ဖျက်ဆီးပြီး ပြန်ပေးသည် မြေယာများကိုလည်း မလိုချင်ကြောင်း လယ်ယာသိမ်းဆည်းခံရသည့် ဒေါ်ချိုချိုဝင်း ကပြောသည်။

“ အန်တီတို့အနေနဲ့ ကိုယ့်မြေကိုယ်ယာပဲ ပြန်ရချင်တယ်။တပ်ဘက်က သိမ်းဆည်းပေမယ့် သူတို့က အကောင်အထည် ဖော်ထားတာမရှိဘူး။ ဘာမှ လည်း မစိုက်ပျိုးထားဘူး။ အန်တီတို့က သူတို့ သိမ်းစဉ်ကတည်းက စိုက်တယ်” ဟု ဒေါ်ချိုချိုဝင်း က ဆိုသည်။

ကုန်းမြင့်မြေ ဖော်ဆောင်ပါက သစ်တောများ ပျက်စီးစေမည် ဖြစ်သဖြင့် ကောင်းကျိုးထက် ဆိုးကျိုးပိုများဖြစ်ကာ ဆီဆိုင်မြို့နယ် ဒေသခံများက ကန့်ကွက်ခဲ့ ကြကြောင်း သိရသည်။

Leave a Comments