သားသမီးများကို ရိုးရိုးသားသား လုပ်ကိုင်စားသောက်ဖို့ ဆုံးမခဲ့သည်ဟု စစ်ခေါင်းဆောင် မင်းအောင်လှိုင် က နေပြည်တော်၌ ရုရှား သတင်းဌာန TASS နှင့် ပြုလုပ်သည့် အင်တာဗျူးတွင် ဖွင့်ဟပြောဆိုလိုက်သည်။
မကောင်းမှုရှောင်၊ ကောင်းမှုဆောင် ဆိုသကဲ့သို့ အမြဲတမ်း စိတ်ကို သန့်သန့်ရှင်းရှင်းထားဖို့ သားသမီးများအား ဆုံးမပေးသည်ဟု စစ်ခေါင်းဆောင်က မတ်လ ၁၈ ရက်တွင် ပြုလုပ်သည့် အင်တာဗျူးတွင် ပြောဆိုသည်။
သားသမီးများအား မည်သို့ ဆုံးသည်ဆိုသည့် မေးခွန်းနှင့် ပတ်သက်၍ “နောက်တခုကတော့ ရိုးရိုးသားသား လုပ်ကိုင် စားသောက်ခြင်း ဒီစိတ်ဓာတ်ကို ကျနော်က လုပ်တယ်။သူတို့ ရဲ့ အသိပညာဆိုတာလည်း အတွေ့အကြုံကနေ ရတာပဲ” ဟု ၄င်းက ထည့်သွင်းပြောဆိုသည်။
စစ်ခေါင်းဆောင် မင်းအောင်လှိုင် တွင် အောင်ပြည့်စုံ နှင့် ခင်သီရိသက်မွန် ဆိုသည့် သားနှင့် သမီး ရှိရာ ၂ ဦးစလုံးသည် ဖခင်၏ အရှိန်အဝါကို အသုံးပြု၍ အခွင့်ထူးခံ စီးပွားရေး လုပ်ငန်းများစွာ လုပ်ကိုင်ခြင်းဖြင့် ခန့်မှန်းရန် မလွယ်ကူသည့် ငွေကြေး ပမာဏအထိ ချမ်းသာ ကြွယ်ဝသည်ဟု စီးပွားရေး အသိုင်းအဝိုင်းတွင် ကျော်ကြားသည်။
“ဦးသိန်းစိန် လက်ထက်ကတည်းက စစ်တပ် တင်ဒါမှန်သမျှ ကိုအောင်ပြည့်စုံ ရဲ့ ကုမ္ပဏီတွေပဲ ရတယ်။ ကျနော်တို့လို လုပ်ငန်း တကယ်လုပ်တဲ့သူတွေက သူ့နားက ရာခိုင်နှုန်းပေးပြီး ပြန်ယူရတာပေါ့” ဟု အောင်ပြည့်စုံ ပိုင်ဆိုင်သည့် ဆောက်လုပ်ရေး ကုမ္ပဏီ တစ်ခုနှင့် လုပ်ကိုင်ခဲ့သည့် လုပ်ငန်းရှင် တစ်ဦးက ဆိုသည်။
အနီးကပ်ဆုံး အဖြစ် NLD အစိုးရကာလ ကျဆုံး စစ်သား မိသားစုများ နေထိုင်ရန် ရန်ကုန်၊ ရွာသာကြီးဘက်၌ တည်ဆောက်မည့် အခန်းတွဲ တိုက်များ တည်ဆောက်ရေး မူရင်းတင်ဒါ ချပေးငွေမှာ သိန်း ၅,၀၀၀ ဖြစ်ပြီး ကန်ထရိုက် အားလုံး အောင်ပြည့်စုံ ပိုင်ဆိုသည့် ကုမ္ပဏီက ရရှိခဲ့ရာ အမှန်တကယ် ဆောက်လုပ်သူများကိုမူ သိန်း ၃,၅၀၀ နှင့် ပြန်ချပေးခဲ့သည်ဟု ၄င်းကရှင်းပြသည်။
“အဲတုန်းက တလုံးဆောက်ပြီး မကိုက်လို့ ဆက်မယူတော့တာ။ အရည်အသွေး အရမ်းလျှော့ဆောက်ရင်တော့ ကျန်တာပေါ့။ နောက်တခု မိထ္တီလာ လေတပ်ထဲက အဆောက်အုံတွေ ဆောက်ဖို့ ကန်ထရိုက်လည်း အဲလိုပဲ။ ဖြတ်တဲ့ ရာခိုင်နှုန်းများလို့ ကျနော် သွားကြည့်ပြီး လက်လျှော့လိုက်ရတယ်” ဟု ၄င်းက ထပ်မံပြောဆိုသည်။
ထို့အပြင် စစ်တပ် လက်နက် ဝယ်ယူရေး တင်ဒါ အများစုကို မင်းအောင်လှိုင် သားနှင့် သမီးသာ အများဆုံးရရှိခဲ့ပြီး အရည်အသွေး မမှီသည့် ဒရုန်းများနှင့် စစ်လက်နက် ပစ္စည်းများစွာကို တရုတ်နိုင်ငံသား လုပ်ငန်းရှင်များနှင့် ပူးပေါင်း တင်သွင်းခြင်းဖြင့် များစွာ အကျိုးအမြတ် ရရှိခဲ့သည်ဟု စစ်တပ် စီးပွားရေး အသိုင်းအဝိုင်းနှင့် နီးစပ်သူများက ပြောဆိုသည်။
“စစ်တပ် တင်ဒါမှာ အမြတ်ကြမ်းတာက အဆင့်မြင့် စစ်လက်နက်နဲ့ နည်းပညာဆိုင်ရာ ပစ္စည်းတွေ၊ တိုက်လေယာဥ် အပိုပစ္စည်းတွေ၊ လေကြောင်းရန် ကာကွယ်ရေး အဲလို ပစ္စည်းတွေ။ အကုန်လုံးနီးပါး အောင်ပြည့်စုံနဲ့ သူတို့အုပ်စုပဲရတယ်။ အရည်အသွေးနိမ့်တာတွေ သွင်းတော့ အကျိုးအမြတ် တအားရမှာပေါ့” ဟု စစ်တပ် တင်ဒါနှင့် နီးစပ်သည့် လုပ်ငန်းရှင် တစ်ဦးက ရှင်းပြသည်။
၂၀၂၁ ခုနှစ် စစ်အာဏာသိမ်းပြီးနောက် စစ်တပ် တင်ဒါများသာမက အရပ်ဖက် လုပ်ငန်း တင်ဒါများပါ မင်းအောင်လှိုင် မိသားစုက လက်ဝါးကြီး အုပ်ခဲ့ပြီး ပြီးခဲ့သည့် လပိုင်းက ကျပ်ဘီလီယံများစွာ တန်ဖိုးရှိသည့် တင်ဒါ ၁၃ ခု ထပ်မံ ရရှိခဲ့သည်ဟု သတင်းများ ထွက်ပေါ် ခဲ့သည်။
စစ်ကောင်စီ မီဒီယာများတွင် ဖော်ပြသည့် ရုရှား TASS သတင်းဌာနနှင့် အင်တာဗျူးတွင် စစ်ရှုံးနေသည့် စစ်ခေါင်းဆောင် မင်းအောင်လှိုင်က “နိုင်ငံတည်ငြိမ်အေးချမ်းရင် တနိုင်ငံလုံးမှာ ဥပဒေအရ ရွေးကောက်ပွဲ မကျင်းပနိုင်တောင်မှ တတ်နိုင်တဲ့ နေရာတွေမှာ ရွေးကောက်ပွဲကျင်းပဖို့ ကျနော်တို့ အစီအစဉ်ရှိတယ်” ဟုလည်း ထည့်သွင်းပြောဆိုသည်။
သို့သော် ရွေးကောက်ပွဲ အချိန်ကာလကိုမူ ထည့်သွင်း ပြောဆိုခြင်း မရှိပေ။ ယင်းသို့ ပြောဆိုမှုသည် စစ်ရှုံးပြီး စစ်တပ်တွင်း ထောက်ခံမှု ကျဆင်းနေသည့် စစ်ခေါင်းဆောင် အနေဖြင့် နိုင်ငံရေးအရ အသက်ရှူချောင်ရေး အတွက်သာဖြစ်သည်ဟု လေ့လာသူများ ဝေဖန်သုံးသပ်ထားသည်။
