သျှမ်းပြည် ကလောမြို့တွင် စစ်မှုမထမ်းချင်သည့် လူငယ်တစ်ဦး ကိုယ့်ကိုကိုယ်သေကြောင်းကြံ ခဲ့ကြောင်း စုံစမ်းသိရသည်။
သျှမ်းပြည် ကလောမြို့ ရပ်ကွက် ၈ တွင် ပြီးခဲ့သည့် မတ်လ ၁၈ ရက်တွင် သက်ဆိုင်ရာ အုပ်ချုပ်ရေးမှူးရုံးက စစ်မှုထမ်းရန် မဲနှိုက်ဖို့ ဆင့်ခေါ်ချိန် စစ်မှုမထမ်းချင်သည့် အမျိုး သားတစ်ဦး ကိုယ့်ကိုကိုယ် သေကြောင်းကြံခဲ့ကြောင်း ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။
“ကြိုဆွဲချပြီး ကိုယ်ဟာကိုသတ်သေသွားတယ်ဆိုတာ ဟုတ်ပါတယ်။ ရက်ကွက် ၈ မှာ ၁၈ ရက် နေ့ကပဲ ဆုံးသွားတာ။”ဟု ကလောမြို့ အသက် ၃၀ ဝန်းကျင် အမျိုးသားတစ်ဦးက ပြောသည်။
ထိုသေဆုံးသွားသည့် အမျိုးသားသည် အသက် ၂၄ မောင်ထက်ဝေအောင် ကလောမြို့ ရပ်ကွက် ၈ တွင် နေထိုင်ကြောင်း သိရသည်။
ထိုပြင် စစ်ကောင်စီမှ ပြည်သူ့ စစ်မှုထမ်းရန် စာရင်းကောက်ပြီးနောက် စစ်မှုထမ်း အကျုံးဝင်သူများ ထွက်ပြေး တိမ်းရှောင်မည်ကို စိုးရိမ်သဖြင့် ခရီးသွားလာခွင့်များ ယခင်ကထက် ပိုတင်းကြပ်လာကြောင်း သိရသည်။
လွန်ခဲ့သည့် ဖေဖော်ဝါရီ ၁၀ရက်တွင် စစ်ရေး အဖက်ဖက်ရှုံးနိမ့်နေသည့် စစ်ကောင်စီသည် အသက်ပြည့်ပြီး နိုင်ငံသားတိုင်း မဖြစ်မနေ စစ်မှုထမ်းရမည့် ပြည်သူ့စစ်မှုထမ်း ဥပဒေကို စတင်ကျင့်သုံး တော့မည်ဟု ထုတ်ပြန်ခဲ့သည်။
ထိုဥပဒေတွင် အမျိုးသားဖြစ်လျှင် အသက် ၁၈နှစ်မှ အသက် ၃၅နှစ် မပြည့်ခင်အထိ သတ်မှတ်ထားကာ အမျိုးသမီးများ ဖြစ်လျှင် အသက် ၁၈နှစ်မှ အသက် ၂၇နှစ်မပြည့်ခင်အထိ သတ်မှတ်ထားသည်။
ထို့အပြင် အတတ်ပညာ အသက်မွေး ဝမ်းကျောင်း ပြုသည့် ကျွမ်းကျင်သူများဖြစ်ပါက အမျိုးသား အသက် ၁၈နှစ် မှ ၄၅နှစ် အမျိုးသမီး အသက် ၁၈နှစ်မှ ၃၅နှစ်ထိသတ်မှတ်ထားသည်။
